Read Alur Matayo 8 Bible Online

Matayo 8 - Alur bible

Matayo 8

¹E kan eai wi got eloro piny, udul dhanu ma dit gilubo ng’eye.

²Man nen, ng’atu ma won joi ubino i bang’e, erwo ire de, ewacu kumae, Rwoth, tek iyenyo, icopo dwoka leng’.

³Man erieyo cinge, emulo ko kume, ewacu kumae, Ayenyo; dong’ kumi dok leng’. E eni eni joi pare lony.

⁴Man Yesu wacu ire kumae, Nen kud iyer ni ng’atu moko ki; ento cidhi, nyuthri ni julam, iwodh giramia de ma Musa ng’olo, ni lembatuca igi.

⁵E ka Yesu mondo i Kapernaum, jego acel ubino i bang’e, ekwaye,

⁶ewacu kumae, Rwoth, jatic para vuto i ot ku tho ma nego kum dhanu nding’, man esende dit.

⁷Ewacu ire kumae, Abibino abikeyo kume de.

⁸Man jego loko lembe ire kumae, Rwoth, aromo ngo ya imond i ot para; ento dong’ iwac lembe kende ci, e kum jatic para bikei.

⁹Kum an bende an a ng’atu ma the ng’ol, man asikari de anuti kudo i tienda: e awacu ni ng’atu maeni kumae, Cidhi, e ecidho; man ni mange kumae, Bin, e ebino; man ni jamiru para kumae, Tim mae, e etimo.

¹⁰E ka Yesu winjo maeni, ie wang’ lii, ewacu de ni ju m’ulubo ng’eye kumae, Awacu iwu andha kumae, Fodi anwang’u yioyic ma rokeni ngi ngo, ungo, i Israel de ngo.

¹¹Man awacu iwu, nia dupa biai yo nyangu ku yo reto bende, man gibibedo piny gikud Ibrahimgi, man Isak, ku Yakobo, i ker m’i polo:

¹²ento wot mi ker jubibayu cen i mudho ma woko: ywak ku kayu lak de bibedo nuti.

¹³Man Yesu wacu ni jego kumae, Cidhi; dong’ etimbre iri, calu iyio. E kum jatic de kei i saa nica.

¹⁴Man ka Yesu mondo i ot pa Petro, eneno dhamaru Petro vuto ku tho ma cego kum.

¹⁵Egam emulo cinge, e cekkum uweke; man eai malu, etimo ire de.

¹⁶E ka piny udoko uthieno, gikelo weg pajogi dupa i bang’e: man ewodho pajogi woko ku lembe acel, ekeyo kum weg tho de ceke:

¹⁷kara lembe ma yang’ Isaya ma jabila yero timbre kakare, m’ewacu kumae, Eting’o mulima mwa en, man ecoko tho mwa i kume.

¹⁸Nie ka Yesu neno udul dhanu ma dit utieke, e eng’olo nia giai gici lokaca.

¹⁹E jagorcik moko bino, ewacu ire de kumae, Japonji, abilubo ng’ei ka ma tek icidho i ie ceke.

²⁰E Yesu wacu ire kumae, Kaki bedo ku odng’om, winyo ma kor polo de gibedo ku odgi; ento Wod dhanu bedo ku kamoko ngo m’ejeng ie wie.

²¹Mange ma kind julubne wacu ire kumae, Rwoth, wek alar aci yik vwa.

²²Ento Yesu wacu ire kumae, Lub ng’eya; wek ju m’utho giyik ju m’utho migi gigi.

²³E kan eidho i yei, julubne gilubo ng’eye.

²⁴Man nen, wavuvu ma dit utuk i nam, m’uketho mukura umo yei: ento en ebenindo.

²⁵Man gibino i bang’e, gicewe de, giwacu kumae, Bodhwa, Rwoth; waberwinyo.

²⁶Man ewacu igi kumae, Lworo benegowu nedi, wun ma wunok i yioyici? Elund eai malu, man ejuko yamu ku nam; e piny ucungo ndhu ti.

²⁷Dhanu de igi wang’ lii, giwacu kumae, Ng’atuni e dhanu manedi, ma cil yamu ku nam de giwore e?

²⁸E kan ewok lokaca i ng’om mi Jugadareni, weg pajogi ario girombo gikugi, ma giai kud i odliel, gi ngoi dit, ketho ng’atu moko mbe ma copo kadhu kud i yojuno.

²⁹Man nen, gikok akoka, giwacu kumae, Wabedo kud ang’o wakudu, in i Wod Mungu? ibino kuni nisendowa ma fodi kanindone kutundo ngo?

³⁰Nwang’u ku bor cen kud i kumgi udul kul dupa gibecamu.

³¹Pajogi de gikwaye, giwacu kumae, Tek iwodhowa woko, orwa cen i udul kul.

³²Ewacu igi de kumae, Wucidhi. E giai woko, gimondo de i kul: man nen, udul bo konjri piny ku ka ma lung’ i nam, man githung’ i pi.

³³E ju m’ukwayugi giringo, gicidho i adhura, giyero lembe ceke de, ku gin m’uwok i kum weg pajogi de.

³⁴Man nen, dhanu ceke ma i adhura gibino rombo ku Yesu: ka ginene de, gikwaye ya eai kud i kieu migi.