Read Alur Matayo 9 Bible Online

Matayo 9 - Alur bible

Matayo 9

¹Man emondo i yei, ekadhu ko lokani, ebino de i adhura ma thugi ma dhe.

²Man nen, gikelo ng’atu ma won tho ma nego kum nding’ i bang’e, m’evuto wi kavuto: e Yesu m’uneno yioyic migi ewacu ni won tho ma nego kum nding’ kumae, Wodo, cwinyi bed tek: dubo peri wekre woko.

³Man nen, jugorcik moko giwacu kud i igi kumae, Ng’atuni yanyu Mungu.

⁴E Yesu m’ung’eyo pidoic migi ewacu kumae, Adundewu bepido gin ma rac nedi?

⁵Kum makani ma yot ma sagu, wacu kumae, Dubo peri wekre woko; kadi wacu kumae, Ai malu, iwothi?

⁶Ento kara wung’ei nia Wod dhanu bedo ku ng’ol wi ng’om m’eweko ko dubo woko (elund ewacu ni won tho ma nego kum nding’ kumae), Ai malu, ting’ kavuto peri, ici ba ot peri.

⁷Man eai malu, ecidho ba ot pare de.

⁸Ento kan udul dhanu gineno maeni, lworo makugi, e giyungo Mungu, ma mio ng’ol ma kumeni ni dhanu.

⁹Man ka Yesu bekadhu ku kakeca, eneno ng’atu acel, ma nyinge Matayo, m’ubedo ka ma jujoko ie ajok: ewacu ire de kumae, Lub ng’eya. E eai malu, elubo ng’eye.

¹⁰Etimbre de, kinde m’ebedo dhu cam i ot, nen, weg ajok ku judubo de dupa gibino gibedo piny giku Yesugi man julubne.

¹¹E ka Jufarisayo gineno maeni, giwacu ni julubne kumae, Japonji mu ke gibecamu giku weg ajok ku judubo de nedi?

¹²Ento kan ewinjo maeni, ewacu kumae, Ju ma kumgi leng’ can jakeikum negogi ngo, ento ju ma kumgi lith re.

¹³Ento wucidh wung’ei ka thelembe nini, ayenyo kisa, lam re ngo: kum abino lwong’o weg bedopwe ngo, endre judubo.

¹⁴Julub Yohana gilund gibino i bang’e, giwacu kumae, Nedi waku Jufarisayo waweko cam wang’ udul, ento julubni giweko cam ungo?

¹⁵Yesu wacu igi kumae, Juwagi won ambadha can copo negogi, ma fodi ginuti giku won ambadhagi? ento ceng’ biwok, ka jubikabu won ambadha woko kud i bang’gi, ka gibilund weko cam.

¹⁶Ng’atu moko mbe de ma ketho kurembo bongu ma nyen wang’ kendi m’uti; kum maeno ma juketho ya eum wang’e, eyeco kendi, wang’e de doko rac ma sagu.

¹⁷Kadi dhanu de mbe ma piko pigulok ma nyen i usaupigulok m’uti: tek gipiko usaupigulok yec, man pigulok oi, usau de nyothre: ento gipiko pigulok ma nyasa i usaupigulok ma nyen, e gin ario gibedo bo.

¹⁸E kinde m’eyero gin maeni igi, nen, jabim moko bino, erwo de i bang’e, ewacu kumae, Kawono nyara en e avu: ento ibin iketh cingi i kume, man ebibedo kwo.

¹⁹E Yesu ai malu, man elubo ng’eye, giku julubne.

²⁰Man nen, dhaku, ma rimo pare cwir udoko rundi apar wi ario, ebino yor i ng’eye, emulo dhu kendi pare de:

²¹kum ewacu kumae yor i ie, Tek amulo kendi pare kende ci, e kuma bikei.

²²Ento Yesu lokre enene de man ewacu kumae, Nyara, cwinyi bed tek; yioyic peri bodhi. E dhaku both ndhu ugambre i saa nica.

²³E ka Yesu bino i ot pa jabim, eneno ju m’ukudho bilo, ku njuru dhanu m’ubeyakni,

²⁴ewacu kumae, wudok cen: kum nyaku tho ngo, ento enindo aninda. E gidong’ ging’iere hai.

²⁵Ento ka julalu njuru dhanu woko, emondo, emaku cinge; e nyaku ai malu.

²⁶E lembene yik i ng’om maeno ceke.

²⁷E ka Yesu ai ku kakeca, dhanu ario m’abinga gilubo ng’eye, gikok akoka, giwacu kumae, Bed ku kisa i kumwa, in i wod Daudi.

²⁸E kan emondo i ot, dhanu m’abinga gibino i bang’e: e Yesu wacu igi kumae, Wuyio nia eni timbre ira? Giwacu ire kumae, Eyo, Rwoth.

²⁹Elund emulo wang’gi, ewacu kumae, Dong’ etimbre iwu calku yioyic mu.

³⁰E wang’gi yabre. Man Yesu ng’olo igi ma tek, ewacu kumae, Wunen ng’atu moko kud ung’ei maeni.

³¹Ento gicidho, girweyo pire mba mba i ng’om maeno ceke.

³²E kinde ma giwok woko, nen, jukelo ng’atu acel m’ajuba ma won pajogi de i bang’e.

³³Ka juwodho pajogi woko, e ng’atu m’ajuba weco: e i udul dhanu wang’ lii, giwacu kumae, Fodi jukuneno gin ma kumeno ki ngo i Israel.

³⁴Ento Jufarisayo giwacu kumae, Ewodho pajogi ni kum jadit mi pajogi.

³⁵Man Yesu cidho i adhura ceke ku ba pacu de ceke, ku ponjo i kacokri migi, ku yero lembanyong’a mi ker de, man ku keyo tho ceke ma kwonde tung’ tung’ m’unyang’ i kum ku tho mange ceke ma kwonde tung’ tung’.

³⁶Ento kan eneno udul dhanu, ngisi nege i kumgi, kum givoc gilal de, calu rombe ma jakwac umbe kugi.

³⁷Elund ewacu ni julubne kumae, Mwoka bedo dit andha ere jutic gilam.

³⁸Ka kumeno wukwai Rwoth mi mwoka, ya eor jutic i mwoka pare.