Read Alur Marko 12 Bible Online

Marko 12 - Alur bible

Marko 12

¹Man emaku yero igi ku lembabola kumae, Ng’atu moko pidho podho mir ulok, epidho arara de i kume, ekunyo vur ma jubiyo ie nying ulok de, man egomo odtra, e emie ni sumba ba jutipodho, en ke ecidho i ng’om mange.

²Ka kacekne tundo eoro jamiru ba jutipodho, kara egam kum nying ulok moko m’i podho mir ulok ba jutipodho.

³E gigame, gifode de, giketho edok mananu.

⁴Man eoro jamiru mange kendo i bang’gi; e gitong’o lero i wie, man gitime rac dit.

⁵Man eoro mange; e ginege: ku mange de dupa; moko gifodo, moko ke ginego anega.

⁶Udong’ ng’atu acel i bang’e, en e wode ma jamer: eore macen i bang’gi, ewacu kumae, Gibijwigri ni woda.

⁷Ento jutipodho maeno giwacu i kindgi gigi kumae, Maeni jacampacu; wubin, wanegue, kara camupacu dong’ iwa.

⁸E gimake, ginege de, man gibaye woko kud i podho mir ulok.

⁹Ka kumeno rwoth ma won podho mir ulok bitimo ang’o? ebibino ebinyotho jutipodho, man ebimio podho mir ulok ni jumange.

¹⁰Fodi wusomo lembagora pa Mungu maeni ngo ma kumae, Kidi ma jugomot gikwero, Kidine judwoke ni wi gui;

¹¹Maeni ai ba Rwoth, Man en e gin ma wang’u ijo i wang’wa?

¹²E giyenyo gimake; ere gilworo udul dhanu; kum ging’eyo nia ebolo lembene i kumgi: e giweke, man gicidho.

¹³Man gioro jumoko ma kind Jufarisayo ku m’i kind Juherodiano de i bang’e, kara gimake i wec.

¹⁴E ka giwok, giwacu ire kumae, Japonji, wang’eyo nia in i andha, man ipara pi ng’atu moko ngo; kum ineno dhanu ni wang’gi ngo, ento andha’ iponjo yo pa Mungu: Cik uyio ya jumi ajok ni Kaisari, kadi ku jumi?

¹⁵Wami, kadi ku wami? Ento en, m’eng’eyo ambili migi, ewacu igi kumae, Wumulo ia nedi? wukel denarius i bang’a, anen.

¹⁶E gikele. Man epenjogi kumae, Meni ayi ng’a ku ramblembene de? Giwacu ire kumae, Pa Kaisari.

¹⁷Yesu wacu igi kumae, Wumi ni Kaisari gin ma pa Kaisari, ni Mungu de gin ma pa Mungu. E igi wang’ lii i kume.

¹⁸Man Jusadukayo, ma giwacu nia cer umbe, gibino i bang’e; gipenje, giwacu kumae,

¹⁹Japonji, Musa goro iwa kumae, Tek ng’atu moko umin utho, ma cege ke dong’, m’eweko nyithindho de ngo, ya umin udong’ ulag dhakune, enyol kodhidhanu de ni umin mire.

²⁰Nwang’u utumego abiro nuti: ma kwong’ane gamu dhaku, etho de m’eweko kodhi ngo;

²¹mir arionde lage, de etho, m’eweko kodhi ngo i ng’eye; mir adege de kumeca:

²²gin abiro de giweko kodhi ngo. Yo ng’eigi ceke dhaku de tho.

²³I cer ebidong’ bedo ci ng’a i kindgi? kum ebedo dhaku migi gin abiro.

²⁴Yesu wacu igi kumae, En e kum lembe nini ngo nia wukieri, kum wung’eyo lembagora pa Mungu ngo, kadi tego pa Mungu de?

²⁵Kum ka gibicer ku kind ju m’utho, gigambri ngo, jumio de ngo ya jugam; ento gibedo va malaika m’i polo.

²⁶Ento pi ju m’utho, ma nia gicer; fodi wusomo ngo i kitabu pa Musa, i ka m’uyere pi Yen m’udinyo, maram Mungu weco ko i bang’e, ewacu kumae, An a Mungu pa Ibrahim, man Mungu pa Isak, man Mungu pa Yakobo?

²⁷En e Mungu mi ju m’utho ngo, ento mi ju ma kwo: wukier dit.

²⁸Ng’atu acel ma kind jugorcik ubino, ewinjo gibepenjri i kindgi, eng’eyo de nia eloko igi lembe dre, e epenje kumae, Lembang’ola makani ma ma kwong’a ceke?

²⁹Yesu loko lembe kmnae, Ma kwong’ane ende, Wuwinji, E Israel; Rwoth Mungu mwa, en e Rwoth acel:

³⁰man imar Rwoth Mungu peri kud adundeni ceke, ku ng’eyong’ec peri ceke de, ku pidoii ceke de, man ku tegoni ceke de.

³¹Mir arionde ke e, Imar wedu calu in giri. Lembang’ola mange mbe ma dit ma sagu maeni.

³²Jagorcik uwacu ire kumae, Andha, Japonji, iwacu dre nia en e acel: man mange mbe ndhu en:

³³man mare kud adunde ceke, ku ng’eyong’ec ceke de, man ku tego ceke, man maru wadijo calu jogijo, esagu giramia m’awang’a ma bo ceke ku lam bende.

³⁴E ka Yesu neno nia edwoko lembe ku rieko, ewacu ire kumae, In i bor ungo ku ker pa Mungu. Y o ng’ei maeno ng’atu moko mbe ma cwinye tek m’epenje ko ku penji moko.

³⁵Yesu loko lembe ewacu kumae, kan eponjo i hekalu, Jugorcik giwacu nenedi nia Kristu en e wod Daudi?

³⁶Daudi en ewacu kumae, ku Tipo Maleng’, Rwoth uwacu ni Rwoth para kumae, Jany yo ku cinga ma yor acwic, Ram aketh ko jukwoji ni kom mi tiendi.

³⁷Daudi en elwong’e Rwoth; e kan ebedo wode nenedi? E dhanu ma sai giwinje ku mutoro.

³⁸Man eyero kumae, i ponji pare, Wukuru ni jugorcik, ma gimaru wotho ku kendi ma lor lor, ku bedo ku moth ma i katali de,

³⁹ku bedo wi kom ma sagu wadi i kacokri, ku ka ma sagu wagi i agba:

⁴⁰gi ju ma gicamu udi mi mon ma coggi tho, ni abombi migi de girwo ku rwo ma bor; joni gibinwang’u lembapoka ma dit m’usagu.

⁴¹Man ebedo piny vut kakanpiny, man eneno rama udul dhanu gibolo ko sente i kakanpinyne: dupa de ma gi julonyo gibolo lwar i ie.

⁴²Nie dhaku ma cware tho ma jacan ubino ebolo sente ario i ie, ma romo gwilo acel.

⁴³Man elwong’o julubne i bang’e ewacu igi kumae, Andha awacu iwu kumae, Dhaku maeni ma cware tho ma jacan ebolo ma sagu ma dhanu ceke gibolo i kakanpiny:

⁴⁴kum gin ceke gibolo i ie kum sagri migi; ento en kum canpiny pare ebolo i ie ceke m’ebedo ko, ma en e ceke m’etungre kudo.