Read Alur Marko 13 Bible Online

Marko 13 - Alur bible

Marko 13

¹E kan eai i hekalu, jalubne acel uwacu ire kumae, Japonji, nen, maram kidi ku udi de bedo ko!

²e Yesu wacu ire kumae, Ineno udi ma dongo maeni? kidi acel de mbe ma bibedo wi wadi ma jubibolo piny ungo.

³E kan ebedo piny wi got Zeituni yo ba hekalu, Petro giku Yakobo man Yohana kud Andrea gipenje nyalwe kumae,

⁴Yer iwa, gin maeni bitimbre awene? ang’o ma bibedo ni giranyutha ka gin maeni ceke dhingo timbre?

⁵E Yesu maku yero igi kumae, Wukuru, kara ng’atu moko kud uwingwu.

⁶Dhanu dupa bibino i nyinga, gibiwacu kumae, An a en; man gibiwingo dhanu dupa.

⁷E ka wubiwinjo pir ali ku rwong ali de cwinywu kud ung’abre: gin maeni bikotimbre be; ento kajikne fodi.

⁸Kum thek bijai kum thek wadi, ker de kum ker wadi; digidi de bibedo nuti tak tak; ndru de bipodho: gin maeni en e landu wi can.

⁹Ento dong’ wukuru giwu: kum jubikethowu i wang’ dilo i kacokri de jubifodowu; wubicungo i wang’ jubim ku ju m’ubimo de pira, ni lembatuca igi.

¹⁰Man lembanyong’a ma juboth ko jubikolar yero be ni thek ceke.

¹¹E ka gipeyowu ba titi, gimiowu de, cwinywu kud ular uring kum lembe ma wubiyero: ento gin ma tek bimire iwu i saa maeno, wuyer maeno; kum en e wun ungo m’uyero, ento Tipo Maleng’.

¹²Man umego bij ting’o umego wang’ tho, won nyathin de nyathin pare; nyithindho de bijai kum junyodo migi, man gibiketho juneggi.

¹³E dhanu ceke gibidaguwu kum nyinga: ento ng’atu ma biciro cil i kajikne, ng’atuno e ma biboth.

¹⁴Ento ka wuneno gin mir adegi mi nyoth ucungo ka ma maku kud ecung i ie (e dong’ ng’atu m’usomo ung’ei), i nindo maeni dong’ ju ma gini i Yahudi giring i got:

¹⁵man ng’atu ma ni wi ot kud elor piny, kadi kud emond i ie, niwodho gin moko ma ni i ot pare:

¹⁶man ng’atu ma ni i podho kud edwog nigamu kanzu pare.

¹⁷Ento can wi mon ma igi nuti ku mon ma nyithindho dhodhogi i ceng’ maeno!

¹⁸Wurwo de kara kud ebed i nindo mi koyo.

¹⁹Kum masendi bibedo nuti i ceng’ maeno, ma wagi maeno ubedo umbe ugambre i thangambere mi giracwia ma Mungu cwio cil ku kawono nini de, man ebibedo nuti kendo de ngo.

²⁰Man tek Rwoth kujwigo ceng’ne ngo, kuno di kum moko mbe m’uboth; ento kum ju ma jugoyo nying’gi, m’efoyo, ejwigo ceng’ne.

²¹I nindo maeno tek ng’atu moko biwacu iwu kumae, Nen, Kristu eni: kadi, Nen, kuca: kud wuyi:

²²kum ju ma Kristu mi ndra ku jubila mi ndra i de gibiwok, gibinyutho giranyutha ku musana de, kara giwing ko ju ma jugoyo nying’gi de, tek ecopre.

²³Ento wukuru: nen, alar ayero iwu gin ceke.

²⁴Ento i ceng’ maeno, yo ng’ei masendi maeno, ceng’ biyutho, dwi de birij eny ungo,

²⁵cero de bipodho kud i polo, tego mi polo de biyengre.

²⁶E i nindo maeno gibineno Wod dhanu bebino i afuru ku tego ma dit ku dwong’ bende.

²⁷Man i nindo maeno ebioro malaika, man ebicoko jupare ma jugoyo nying’gi karacelo ku yo the yamu ang’wen, kud i tung’ ng’om ku tung’ polo de.

²⁸Nie wumak ng’eyo lembabola mir ulam bang’ ulam: kinde ma jange doko yom, elodho ithe de, wung’eyo nia cwir i udhingo:

²⁹e kumeno wun bende, ka wuneno gin maeni betimbre, wung’ei nia eni ceng’ni, cil dhugola.

³⁰Andha awacu iwu kumae, Dhanum’utuk maeni bikadhu woko ngo, ma fodi gin maeni ceke kutimbre kakare ngo:

³¹polo ku ng’om de bikadhu woko: ento lembe para bikadhu woko ngo.

³²Ento ceng’ maeno kadi saa maeno ng’atu moko mbe m’ung’eyo, cil malaika mi polo, kadok Wod de, ento Wego re.

³³Wukuru, wuki man wurwo: kum wung’eyo kanindone ngo.

³⁴En e calu ng’atu moko, m’uci wotho i ng’om mange, m’eweko ot pare, m’emio ng’ol de ni jumiru pare, ni ng’atuman tic pare man tic pare, eng’olo ni jakurdhugola de nia eki.

³⁵Ka kumeno wuki: kum wung’eyo ngo kabino pa rwoth ma won ot, tek en e uthieno, kadi diewor ma ling’, kadi i kok pa gweno, kadi kugweno;

³⁶kara tek ebino pio kud enwang’ wunindo.

³⁷Man gin m’awacu iwu awacu ni dhanu ceke, Wuki.