Read Alur Marko 5 Bible Online

Marko 5 - Alur bible

Marko 5

¹Man giwok loka nam, i ng’om mi Jugadareni.

²E kinde m’eloro kud i combo, e aruca ruca nica girombo ku ng’atu m’uai i odliel ma wie ju tipo m’ucido,

³ma kabedo pare ni i odliel: ng’atu moko mbe ma copo twic kendo, ungo, kadok ku nyoro de ngo;

⁴kum jubejugoyo kongo i tiende jutwie ku nyoro de bang’ udul, e erwadu nyoro, eturo i kongo de nziki nziki: ng’atu moko mbe de ma tek ma dwoke mol.

⁵Thiri thiri, diewor ku dieceng’ de, i odliel i gudi de ebedekok akoka, man ethumbre gire ku kidi.

⁶E kan eneno Yesu ku bor, eringo aringa erwo de i bang’e:

⁷ekok ku dwande ma tek, ewacu kumae, Lembe mwa ang’o wakudi, Yesu, in i Wod Mungu ma Malu Ngbir. Aketho ikwong’o ba Mungu, kud imi ira ndiba.

⁸Kum ewacu ire kumae, Wok woko kud i ng’atuno, in i tipo m’ucido.

⁹Man epenje kumae, Nyingi ng’a? En ke ewacu ire kumae, Nyinga Udul; kum wa dupa.

¹⁰E epaku dhoge ire ma tek ya kud eriemgi woko kud i ng’ombuni.

¹¹Nwang’u udul kul ma dit ubecamu kor got.

¹²E gikwaye, giwacu kumae, Orwa i kul, kara wamond i igi.

¹³E eyio igi. Tipo m’ucido de giwok woko, gimondo i kul: e udul ukonjre kro ku ka ma lung’ i nam, welgi yenyo romo rubanga ario; man githung’ i pi.

¹⁴E ju m’ukwayugi giringo giyero lembene i adhura, ku i thim de. E gibino nineno gin m’utimbre.

¹⁵E gibino ba Yesu, gineno ng’atu ma naka wie ju pajogi de bedo, ekendo kendi pidoie de cu, en e ng’atu ma naka wie ju udul: e lworo negogi.

¹⁶E ju ma gineno maeni giyero igi ram etimbre ko ni ng’atu ma naka wie ju pajogi, man pi kul.

¹⁷E gimaku kwaye nia eai woko i kieu migi.

¹⁸E kan ebeidho i combo, ng’atu ma naka wie ju pajogi kwaye ya gibed giku de.

¹⁹Man eyio ire ngo, edong’ ewacu ire kumae, Dok i ot peri ba jurimbi, yer igi rama Rwoth utimo ko gin ma dit iri, man rama kisa nege ko i kumi de.

²⁰E ecidhone emaku rweyo i Dekapoli rama Yesu timo ko tic ma dit ire: e dhanu ceke igi wang’ lii.

²¹E ka Yesu kadhu kendo lokaca ku combo, udul ma dit gicokri i bang’e; man ebedo dhu nam.

²²Nie ng’atu acel ma kind judongo m’i kacokri ma nyinge Yairo, bino; e kan enene de, epodho the tiende,

²³ekwaye de ma tek, ewacu kumae, Nyathi nyara dhingo tho: akwei, ya ibin iketh cingi i kume, kara kume kei, ebed kwo de.

²⁴E gicidho gikude; udul dhanu ma dit de gilubo ng’eye, man gicungri acung’a i kume.

²⁵Man dhaku moko, ma rimo mol i kume doko rundi apar wi ario,

²⁶man esendre dit ba jukeikum dupa edaru piny pare ceke de, ento eloko kamoko ngo, ento edoko rac ma sagu,

²⁷e kan ewinjo pi Yesu, ebino ku kind njuru dhanu ma yor i ng’eye, emulo kendi pare.

²⁸Kum ewacu kumae, Tek amulo kendi pare ci, e kuma bikei.

²⁹E ndhu ndhu nica dhu rimbe ng’ol ndhu; eng’eyo de kud i ie nia kume kei ni tho pare.

³⁰E aruca ruca nica Yesu, m’ung’eyo i ie gire ya tego ai i bang’e wok woko, elokre kind njuru dhanu, ewacu kumae, Ng’a mulo kendi para?

³¹Julubne giwacu ire kumae, Ineno udul dhanu ma gicungri i kumi, man iwacu kumae, Ng’a mulo kuma?

³²E eneno kun ku kun kara enen ng’atu m’utimo gin maeno.

³³Ento dhaku ma lworo benege kume de bemiel, m’eng’eyo gin m’utimbre ire, ewok epodho piny i wang’e eyero ire lemandha ceke.

³⁴En ke ewacu ire kumae, Nyara, yioyic peri e m’ukeyo kumi; ci ma cwinyi kwio, kumi bed leng’ de ni tho peri.

³⁵Kinde ma fodi ebeweco, ju m’uai ba jadit mi kacokri, giwacu kumae, Nyen tho: isendo Japonji nedi kendo?

³⁶Ento Yesu, m’uwinjo lembe ma juyero, ewacu ni jadit mi kacokri kumae, Lworo kud unegi, yi kende.

³⁷Man eyio ngo ya ng atu moko lub ng’eye, ndhu Fetro, man Yakobo, man Yohana m’umin Yakobo.

³⁸E gibino giwok ba ot pa jadit mi kacokri; man eneno yakni, ku dhanu dupa m’ubeywak m’ubewero wejawu de dit.

³⁹Kan emondo, ewacu igi kumae, Nedi wutimbru swa, wuywak de? nyathinuno tho ngo, ento enindo aninda.

⁴⁰Gidong’ ging’iere ang’iera gicaye ko. Ento en kan ewodhogi ceke woko, egamu won nyathin ku min mire de ku ju ma gibedo gikugi bende, e gicidho ka ma nyathin ni ie.

⁴¹Emaku nyathin ku cinge, ewacu ire kumae, Talitha kumi; thelembene, ka juloke edoko kumae, Nyane awacu iri kumae, Ai malu.

⁴²E ka dhoge nica nyano ai malu, ewotho; kum nwang’u rundi pare doko apar wi ario. E eni eni igi wang’ lii ku wang’uic ma dit.

⁴³Man eng’olo igi ma tek nia ng’atu moko kud ung’ei maeni: e eng’olo ya jumi ire cam moko ecam.