Read Alur Marko 7 Bible Online

Marko 7 - Alur bible

Marko 7

¹E Jufarisayo, ku jumoko ma kind jugorcik ma giai Yerusalem, gicokri i bang’e,

²ma gineno nia julubne moko camu kwen migi ku cing’gi ma ie ju cilo, thelembene, cing’gi ma aloga ngo.

³(Kum Jufarisayo, ku Juyahudi ceke, tek gilogo cing’gi mii ngo, gicamu ngo, ma giworo ko lemkei mi judongo:

⁴e ka giai i katali, tek gijom ungo, gicamu ngo; ku gin mange de dupa, ma gijolo ya giwor, lwoko kikombe, kud agulu, kud agulu mi mola.)

⁵Jufarisayo ku jugorcik de gipenje kumae, Nedi julubni giwotho calku lemkei mi judongo ngo, ento gicamu kwen migi ku cilo i cing’gi?

⁶Ewacu igi kumae, Isaya yang’ uewo piwu dre wu weg ambili, calu jugoro kumae, Dhanu maeni giyunga ku dendhoggi, Ento adundegi bor kuda.

⁷Ento girwo ira mananu, Ma giponjo cik mi dhanu ni ponji migi.

⁸Wuweko lembang’ola pa Mungu, wudong’ wubani wi lemkei mi dhanu.

⁹Man ewacu igi kumae, Dre no yo, wukwero cik pa Mungu, kara wuwor lemkei mu.

¹⁰Kum Musa wacu kumae, Yung wuru ku meru; man, ng’atu m’uyero rac kum won kadi min, wek etho athoa:

¹¹ento wun wuwacu kumae, Tek ng’atu moko biyero ni won kadi min kumae, Gin ma nwang’u ande acopi ko en e Korbani, thelembene, jumio ni Mungu;

¹²wuyio ngo nia ng’atuno tim gin moko kendo ni won kadi min;

¹³wuranju lembe pa Mungu ku lemkei mu, ma wuketho: man wutimo gin mange de dupa ma kumeno.

¹⁴Man elwong’o udul dhanu kendo i bang’e, ewacu igi kumae, Kewu ceke wuwinj lem para, wung’ei de:

¹⁵gin moko mbe ma yo woko ba dhanu, ma tek umondo i ie copo eide; ento gin ma ai yor i dhanu e ma cido i dhanu.

¹⁶Ng’atu moko ma ithe nuti m’ewinjo ko, wek ewinji.

¹⁷Kan eweko udul dhanu emondo i ot, julubne gipenje kum the lembabola nini.

¹⁸Ewacu igi kumae, Wun bende ng’eyong’ec umbe kudu kumeno? Wung’eyo ngo, nia gin ma yo woko ma mondo i dhanu, copo eide ngo;

¹⁹kum emondo i adunde ngo ento i cinoie, ewok woko de i odbari? Maeni ewacu, ma dwoko cemo ceke leng’.

²⁰Man ewacu kumae, Gin ma ai i dhanu, e ma cido dhanu.

²¹Kum kud i ic, ku i adunde dhanu, pidoic ma rac wok, tarwang’, ku kwalukwo, ku negonek, ku gieri,

²²ku ketho cwiny hai kum piny, ku camuco, kud abombi, kud awanya ma rac, ku wang’ ma rac, ku cayucac, kud ahaye, man lemkasegu:

²³gin ma rac maeni ceke ai kud i ic, e ma cido dhanu.

²⁴Eai ku keca, man ecidho i kieu mi Turo ku Sidon. Emondo de i ot, eyenyo ngo ya ng’atu moko ng’ei maeni; ere ecopo pondo ngo.

²⁵Ento ndhu ndhu nica dhaku, ma nyathi nyare won tipo m’ucido, kan ewinjo pire, ebino epodho the tiende.

²⁶Nwang’u dhakune Dhayunani, ma Surufenisa. E ekwaye nia ewodh pajogi kud i nyare.

²⁷Ewacu ire kumae, Wek nyithindho gilar giyeng’: kum emaku piny ungo ya jugam kwen mi nyithindho jubole ni gwogi.

²⁸Ento eloko lembe ewacu ire kumae, Eyo, Rwoth; cil gwogi ma the mesa de gicamu kum ng’ili kwen mi nyithindho.

²⁹Ewacu ire kumae, Kum lembe maeni cidhi; pajogi daru wok kud i nyeri.

³⁰E edok i ot pare, enwang’u jupielo nyathin wi kavuto, pajogi de daru wok.

³¹Eai kendo kud i kieu mi Turo, ekadhu ku i Sidon cil ku dhu nam mi Galilaya, ku kind kieu mi Dekapoli.

³²Man gikelo ng’atu ma ithe dhing’ i bang’e, ma jaragwong’o de; e gikwaye eketh cinge i kume.

³³Ecoro kude cen nyalwe ku kind udul dhanu, eroyo lwete de i ithe, man eng’ulo lau, emulo ko lebe;

³⁴eng’ayu wang’e de malu i polo, egamu cwinye, man ewacu ire kumae, Efatha, thelembene kumae, Yebri.

³⁵E ithe yabre, twic mi lebe de gonjre, man eweco terere.

³⁶Eng’olo igi ya ku giyer ni ng’atu moko: ento ku ba ng’olo m’eng’olo ko igi hai, e girweyo lembene hai m’usagu.

³⁷E igi wang’ lii apila, giwacu kumae, Etimo gin ceke ber; eketho ju ma ithgi dhing’ giwinjo, man ajuba de giweco.