Read Alur Marko 8 Bible Online

Marko 8 - Alur bible

Marko 8

¹I ceng’ maeno, kan udul dhanu ma dit gicokri kendo, cam migi de mbe, elwong’o julubne i bang’e, man ewacu igi kumae,

²Ngisi benega kum udul dhanu, kum gibedo i bang’a kawono doko ceng’ adek, ma cam umbe kugi:

³tek alalugi ya gidok thugi ku kec, gibivoc i yo; jumoko m’i kindgi de giai bor.

⁴Julubne giloko ire lembe kumae, I ka ma ngele keni jucopo nwang’u kwen m’ang’ina ma ci yeng’o dhanu maeni kani?

⁵Epenjogi de kumae, Lungu kwen adi ma ni i beng’wu? Giwacu kumae, Abiro.

⁶Man eng’olo ya udul dhanu gibed piny i ng’om: man eting’o lungu kwen abiro, kan emio foyofoc de, eng’weko ie, emio de ba julubne, giketh i wang’gi: e gikethogi i wang’ udul dhanu.

⁷Nwang’u rec moko ma thindho ni i bang’gi: e kan emio mugisa i wie, eng’olo ya juketh maeni bende i wang’gi.

⁸Gicamu de, giyeng’: man gicoko padune m’udong’, katoko abiro.

⁹Man giyenyo romo rubanga ang’wen: e elalugi.

¹⁰E eni eni eidho i combo ku julubne de, man ebino i ng’et Dalmanutha.

¹¹E Jufarisayo giwok, man gimaku penjri gikugi, gibeyenyo giranyutha i polo i bang’e gibidhe ko.

¹²Man egamu cwinye kwede kud i ie, ewacu kumae, Dhanum’utuk maeni gibeyenyo giranyutha nedi? andha awacu iwu kumae, Giranyutha moko mbe m’umire ni dhanum’utuk maeni.

¹³E ewekogi, eidho i combo kendo ekadhu ko lokaca.

¹⁴E wigi wil ku ting’o kwen; gimbe kude i combo ndhu lungu kwen acel pii.

¹⁵Man eng’olo igi, ewacu kumae, Wubed ku weng’wu, wukuru ni thobi mi Jufarisayo ku thobi pa Herode.

¹⁶E giporo lembe i kindgi, giwacu kumae, Kwen umbe kudwa.

¹⁷E Yesu m’ung’eyo maeni ewacu igi kumae, Wuporo lembe nedi, kum kwen mu mbe? fodi wuneno ngo, kadok ang’eya de wung’eyo ngo? adundewu doko nwang’i?

¹⁸Wubedo ku weng’wu, wuneno de ngo? man wubedo ku ithwu, wuwinjo de ngo? wupoi de ngo?

¹⁹Kinde m’ang’weko i lungu kwen abic ni dhanu rubanga abic, wucoko padune m’udong’ upong’o katoko adi? Giwacu ire kumae, Apar wi ario.

²⁰Man abiro i kind rubanga ang’wen, wucoko padune katoko adi? Giwacu ire kumae, Abiro.

²¹Man ewacu igi kumae, Fodi wukung’eyo ngo?

²²Giwok Bethsaida. Man jukelo ng’atu m’abinga i bang’e, gikwaye de emul kume.

²³E emaku cing’ ng’atu m’abinga, man ewodhe woko kud i pacu; e kan eng’ulo lau i wang’e, eketho cinge de i kume, epenje kumae, Ineno piny moko?

²⁴Eting’o wang’e malu, man ewacu kumae, Aneno dhanu; kum anenogi va yen, m’ubewotho.

²⁵E elund eketho cinge kendo i wang’e; ng’atuca de neno piny tel, man edok kakare, edong’ eneno gin ceke terere.

²⁶Man eore edok thugi, ewacu kumae, Kadok i pacu de kud imondi.

²⁷E Yesu ai, ku julubne, gicidho i pacu Kaisaria Filipi: i kinde ma gini i yo epenjo julubne, ewacu igi kumae, Dhanu giwacu ya an a ng’a?

²⁸E giyero ire, giwacu kumae, Yohana ma Jabaputisi; jumange de, Elia; ento jumange re, Acel ma kind jubila.

²⁹Man epenjogi kumae, Wun ke wuwacu ya an a ng’a? Petro dwoko lembe ewacu ire kumae, In i Kristu.

³⁰Man eng’olo igi ya ku giyer pire ni ng’atu moko.

³¹Emaku ponjogi de, nia Wod dhanu bikosendre be ku gin dupa, judongo ku julam ma dongo ku jugorcik de gibikwere, jubinege de, man ka ceng’ adek ukadhu ebicer kendo.

³²Man eyero lembene igi kele. E Petro make, emaku kwere.

³³Ento elokre, e kan eneno julubne, ejuko Petro, ewacu kumae, Dok i ng’eya Jok; kum ii pido pi gin pa Mungu ngo, ento gin mi dhanu.

³⁴E elwong’o udul dhanu gibin i bang’e ku julubne, man ewacu igi kumae, Tek ng’atu moko yenyo elub ng’eya, wek ekwere gire, eting’ yen m’athara pare, elub ng’eya.

³⁵Kum ng’atu ma tek uyenyo ebodh kwo pare ebirwinye; ng’atu ma tek birwinyo kwo pare de pira ku lembanyong’a ma juboth ko de e ebibodhe.

³⁶Kum kuloka ang’o ni dhanu, kadok egam ng’om ngung’, ma kwo pare ke rwinyo?

³⁷Kum girang’o ma ng’atu moko biwilo ko kwo pare?

³⁸Kum ng’atu ma tek lewic binege i kuma kum lembe para de i kind dhanum’utuk maeni mi gier ku dubo de, Wod dhanu bende lewic binege i kume, kan ebino i dwong’ pa Won ku malaika maleng’ de.