Read Alur Marko 9 Bible Online

Marko 9 - Alur bible

Marko 9

¹Man ewacu igi kumae, Andha ayero iwu kumae, Jumoko nuti kind ju m’ucungo keni, ma gibibilo tho ki ngo, cil ma gineno ko ker pa Mungu bino ku tego.

²Yo ng’ei ceng’ abusiel Yesu gamu Petro giku Yakobo, man Yohana, man eterogi kakendgi wi got ma wiu: e kite lokre i wang’gi;

³e kendi pare rieny, udoko tar pr, ma jabodho moko mbe m’i ng’om ma copo dwoke tar kumeca.

⁴E Elia giku Musa giwok i wang’gi: gibeweco giku Yesugi.

⁵E Petro loko lembe ewacu ni Yesu kumae, Japonji, ber iwa kum wani keni: wek watim odbak adek; acel iri, acel ni Musa, acel ke ni Elia.

⁶Kum eng’eyo ngo lem m’eloki, kum lworo benegogi dit.

⁷Afuru bino ketho tipo i wigi: dwal uai i afuru de wacu kumae, Maeni Woda ma jamerna: wuwinje.

⁸E eni eni nik ginen kun ku kun, gineno ng’atu moko ngo kendo, ndhu Yesu kende re gikugi.

⁹Kinde ma gibeloro got, eng’olo igi ya ku giyer pi gin ma gineno ni ng’atu moko, ento ka Wod dhanu bicer kendo ku kind ju m’utho.

¹⁰E gikanu lembene, gipenjri gigi rama thelembe mi cer kendo ku kind ju m’utho bedo ko.

¹¹E gipenje, giwacu kumae, Ebedo nenedi ma jugorcik giwacu nia Elia bikolar bino be e?

¹²Man ewacu igi kumae, Elia lar ubino andha, man edwoko gin ceke: pi Wod dhanu ke jugoro nenedi, nia ebisendre ku gin dupa jubidwoke doko mananu de?

¹³Ento awacu iwu, nia Elia daru bino, man gitimo gin ceke ma giyenyo i kume, cil calu egore pire.

¹⁴E ka gibino ba julub, gineno udul dhanu ma dit ung’ino i kumgi, jugorcik de ma gibepenjri gikugi.

¹⁵Ndhu ndhu nica udul dhanu ceke, ka ginene, igi wang’ lii, man giringo aringa i bang’e gimothe.

¹⁶Man epenjogi kumae, Wupenjru kugi ku lembang’o?

¹⁷E ng’atu acel ma kind udul dhanu dwoko lembe ire kumae, Japonji, akelo woda i beng’i, m’ubedo ku tipo m’ajuba;

¹⁸man ka ma tek tipo te re i ie ceke, eredhe piny: voyo de dhure i dhoge, man ekayu lake, emoge de: e awacu ni julubni ya giwodhe woko; e ecopre igi ngo.

¹⁹Man eloko lembe igi ewacu kumae, E dhanum’utuk ma yioyic umbe kugi, abibedo kudu rokani? abitwio cwinya i kumwu rokani? kele i bang’a.

²⁰Gikele de i bang’e: e kan enene, e eni eni tipone yece dit; man epodho i ng’om, emaku ng’iele’ voyo de wok.

²¹E epenjo won kumae, Gin maeni make ugambre awene? Man ewacu ire kumae, Ma fodi e nyathin.

²²Ebederedhe i mac kud i pi bende wang’ udul, nik enyothe: ento tek icopo timo gin moko, bed ku ngisi i kumwa, ikonywa.

²³Yesu wacu ire kumae, Tek icopo! Gin ceke copre ni ng’atu m’uyio.

²⁴E ndhu ndhu nica won nyathin ukok, ewacu kumae, Ayio; konya ku yioyic para m’umbe.

²⁵E ka Yesu neno nia udul dhanu gibering’ni karacelo, ejuko tipo m’ucido, ewacu ire kumae, In i tipo ma weco ngo ma winjo de ngo, ang’olo iri wok woko kud i ie, kud i dong’ imond i ie kendo.

²⁶Kan ekok, ejake ma tek, e eai woko: man nyathin ubedo calu ng’atu m’utho; ketho nia dhanu kucel ma dit giwacu kumae, Etho.

²⁷Ento Yesu maku cinge, eting’e ko malu; e eai.

²⁸E kan emondo i ot, julubne gipenje nyalwe kumae, Nedi wacopo wodhe ngo?

²⁹ewacu igi kumae, Wagi gino wodhre ku gin moko ngo, ndhu ku rwo.

³⁰E giai kuca, gikadhu ku kind Galilaya; eyenyo ngo ya ng’atu moko ng’ei.

³¹Kum eponjo julubne, ewacu igi kumae, Wod dhanu jumie i cing’ dhanu, man gibinege; ka junege de, yo ng’ei ceng’ adek ebicer kendo.

³²Ento ging’eyo thelembe nini ngo, lworo de cerogi ku penje.

³³E gibino Kapernaum: kan eni i ot epenjogi kumae, Ande wuporo lembang’o i gengi?

³⁴Ento gibedo ling’: kum ande gipiembri i yo, nia ng’a ma dit ma sagu.

³⁵Ebedo piny, man elwong’o juapar wi ario; ewacu igi kumae, Tek ng’atu moko yenyo ebed ma kwong’ane, ebibedo cen ma sagu ceke, man jatic mi ceke.

³⁶E egamu nyathin ma nyanok, ekethe i kindgi: e kan eting’e wi bote, ewacu igi kumae,

³⁷Ng’atu ma tek bijolo acel mi wagi nyithindho ma thindho ku nyinga, nwang’u ejolo an; man ng’atu ma tek ujolo an, nwang’u ejolo an ungo, ento ng’atu m’uora.

³⁸Yohana wacu ire kumae, Japonji, waneno ng’atu acel m’ubewodho pajogi ku nyingi; e wacere, kum elubowa ngo.

³⁹Ento Yesu wacu kumae, Kud wukwere: kum ng’atu moko mbe ma bitimo tic ma dit ku nyinga, ma bicopo yero pira rac pio pio.

⁴⁰Kum ng’atu ma tek ubedo jadhogwa ngo nwang’u en e jabang’wa.

⁴¹Kum ng’atu ma tek bimio iwu pi i kikombe wumadhi, kum wu ju pa Kristu, andha ayero iwu, nia sukulia pare birwinyo ire ki ngo.

⁴²Man ke ng’atu ma tek biketho ng’atu acel ma kind nyithi ju maeni ma giyia ukier, ni ng’atuca cika jung’ab pom ma dit i ng’ute, jubaye ko i nam.

⁴³Man tek cingi ketho ikier, thume woko: cika imond i kwo kud abala, sagu ma tek icidho i gehena ku cingi ario, i mac ma negre ngo,

⁴⁴ka ma ukoko migi tho ngo, macne de negre ngo.

⁴⁵Man tek tiendi ketho ikier, thume woko: cika imond i kwo kud abala sagu ma tek ibedo ku tiendi ario ma jubibei ko i gehena,

⁴⁶ka ma ukoko migi tho ngo, macne de negre ngo.

⁴⁷Man ke tek weng’i ketho ikier, fudhe woko: cika imond i ker pa Mungu ku weng’i acel sagu ma tek ibedo ku weng’i ario ma jubei ko i gehena,

⁴⁸ka ma ukoko migi tho ngo, macne de negre ngo.

⁴⁹Kum ku ba dhanu jubimulogi ku kadu ku mac.

⁵⁰Kadu ber: ento tek kadu lake tho, wubidwoko lake kud ang’o? Wubed ku kadu i iwu giwu, cwinywu de kwi wuku juwedu.