Read Alur Luka 10 Bible Online

Luka 10 - Alur bible

Luka 10

¹Nie yo ng’ei gin maeni Rwoth uketho jumange pier abiro, eorogi ario ario i wang’e kubang’ adhura kubang’ adhura ceke, ka ma en gire eyenyo etund i ie.

²Man ewacu igi kumae, Mwoka bedo dit andha, ento jutic e ma gi nok: ka kumeno wukwai Rwoth mi mwoka, nia eor jutic i mwoka pare.

³Wucidhi; nen, aorowu calu nyithi rombe i kind urudi.

⁴Kud wuting’ gbethe, ku mangala, ku wara, kud wumoth ng’atu moko i yo.

⁵I ot de ma tek wumondo i ie, wular wuwac kumae, Kwiocwiny ubed ba ot maeni.

⁶Man tek wod kwiocwiny ni i ie, kwiocwiny mu bibedo i kume: ento tek umbe i ie, ebidwogo i kumwu kendo.

⁷Man wudong’ i ot maeno, ku camu ku madhu gin ma gimio: kum jatic romo ku sukulia pare. Kud wuci ku ba ot ku ba ot.

⁸Man adhura ceke ma tek wumondo i ie, gijolowu de, wucam gin ma juketho i weng’wu:

⁹wukei kum ju ma kumgi lith ma gini i ie, wuwac igi kumae, Ker pa Mungu bino ceng’ni i vutwu.

¹⁰Ento adhura ceke ma tek wumondo i ie, gijolowu de ngo, wuwok woko i gengine wuwac kumae,

¹¹Cil utur m’uai i adhura mu, m’umoko kum tiendwa, wayweyo woko i kumwu: ento wung’ei maeni, nia ker pa Mungu bino ceng’ni.

¹²Awacu iwu kumae, I ceng’ maeno Sodom bibedo ber ma sagu adhura maeno.

¹³Can i wii, Korazin! can i wii, Bethsaida! kum tek tic ma tek m’utimbre i iwu utimbre i Turo ku Sidon, kuno di gilokri con, ku bedo i usuba man vuru.

¹⁴Ento lembe mi Turo ku Sidon bibedo ber ma sagu mu, i ceng’ pokolembe.

¹⁵In de, Kapernaum, jubidodi malu i polo? jubijwigi piny i Hadeya.

¹⁶Ng’atu m’uwinjowu nwang’u ewinjo an; ng’atu m’ukwerowu nwang’u ekwero an; man ng’atu m’ukwero an nwang’u ekwero ng’atu m’uora.

¹⁷Ju ma pier abiro gidwogo ku mutoro, giwacu kumae, Rwoth, cil pajogi gibedo wor iwa ni kum nyingi.

¹⁸Man ewacu igi kumae, Aneno Jok upodho kud i polo calu lukoth.

¹⁹Nen, amio iwu ng’ol ma wunyon ko thwol man ith, man wi tego ceke pa jakwor: gin moko de mbe ma bitimowu rac.

²⁰Ento anyong’a kud unegwu kum maeni, nia tipo gibedo wor iwu; ento anyong’a negwu kum nyingwu gore i polo.

²¹I saa maeni anyong’a nege i Tipo Maleng’, ewacu kumae, Afoii, E Vwa, Rwoth m’i polo ku ng’om, kum imung’o gin maeni ni jurieko ku weg ng’eyong’ec, man inyuthogi ni mukere: eyo, Vwa; kum ebedo ni mutoro i weng’i kumeno.

²²Vwa mio ira gin ceke: ng’atu moko mbe de m’ung’eyo nia Wod en e ng’a, ndhu Wego kende; kadi m’ung’eyo nia Wego de en e ng’a, ndhu Wod kende, ku ng’atu ma Wod uyenyo enyuthe ire.

²³Elokre ba julubne, ewacu mung’ mung’ kumae, Mugisa ni wang’ m’uneno gin ma wuneno:

²⁴kum awacu iwu, nia jubila dupa ku ju m’ubimo bim giyenyo ginen gin ma wuneno, ere ginenogi ngo; man giyenyo giwinj gin ma wuwinjo, ere giwinjogi ngo.

²⁵Man nen, jaeuthecik acel ucungo malu emulo ie, epenje kumae, Japonji, atim ang’o kara acam pacu mi kwo ma rondo ku rondo?

²⁶E ewacu ire kumae, Ang’o m’ugore i ciki? isomo nenedi?

²⁷Eloko lembe ewacu kumae, Ibimaru Rwoth Mungu peri kud adundeni ceke, ku ng’eyong’ec peri ceke, man ku tegoni ceke, ku pidoii ceke de; man wedu calu in giri.

²⁸Man ewacu ire kumae, Idwoko lembe cu: tim maeni, e ibibedo kwo.

²⁹Ento en, m’eyenyo enyuthre nia e pwe, ewacu ni Yesu kumae, Wada en e ng’a?

³⁰Yesu dwoko lembe kumae, Ng’atu acel uai Yerusalem uloro piny Yeriko; epodho i kind jukwo, m’uwodho bongu pare man gifode, e gicidho, giweke ceng’ni tho.

³¹Etimbre nia jalam acel ubeloro piny kud i yojuno: e kan enene, ekadhu ku ng’et yo kucel.

³²Jalawi bende kumeca, kan ewok kakeca, enene de, e ekadhu ku ng’et yo kucel.

³³Ento Jasamaria acel, i woth pare, ewok ka ma eni i ie: kan enene de, ngisi nege i kume,

³⁴ebino de i bang’e, ekonjo mo ku pigulok i wang’ rem pare, etwio de; man ekethe wi kana pare gire, etere de i odwelo, man egwoke.

³⁵Urwone ewodho denarii ario, emio ni won ot, ewacu kumae, Gwoke; piny peri m’uoi ma sagu, kan adwogo, abiculo wang’e iri.

³⁶I kind juadek maeni, iwacu nyo, makani m’unyuthre nia en e wadi ng’atu m’upodho kind jukwo?

³⁷Ewacu ire kumae, Ng’atu ma kisa nege i kume. E Yesu wacu ire kumae, Cidhi, itim kumeno.

³⁸Nie ka gicidho i yo migi, emondo i pacu acel: e dhaku acel ma nyinge Marsa jole i ot pare.

³⁹Nyamin mire nyinge Mariamu, m’ubedo the tiend Rwoth man ewinjo lem pare.

⁴⁰Ento Marsa besendre ku giratima dupa; e ebino i bang’e, ewacu kumae, Rwoth, lembe pido ii ngo nia nyamira weka atim tic akenda? ka kumeno wac ire nia ekonya.

⁴¹Ento Rwoth udwoko lembe ewacu ire kumae, Marsa, Marsa, cwinyi pido edieng’ de kum giki dupa:

⁴²ento can lembe acel nuti: kum Mariamu foyo maka pare ma ber, ma jubimayu woko kud i bang’e ngo.