Read Alur Luka 12 Bible Online

Luka 12 - Alur bible

Luka 12

¹I kinde maeca, kan udul dhanu rubanga dupa gicokri karacelo, ketho ginyondri, elar emaku wacu ni julubne kumae, Wukuru ni thobi mi Jufarisayo, ma en e ambili.

²Ento gin moko mbe ma umbre, ma ku binyuthre ngo; ma kandre de ma ku bing’eire ngo.

³Kum kumeno gin ma tek wuwacu i mudho ebiwinjre i der; gin ma wuyero ku the ith i kusika biyere wi udi.

⁴Man awacu iwu jurimba, Kud wulwor ju ma nego kum, ma yo ku ng’eye gin moko mbe ma gicopo timo.

⁵Ento apoyowu kum ng’atu ma wubilworo: Wulwor ng’atu, ma tego pare nuti yo ng’ei nek m’enego m’ebolo ko i gehena; eyo, awacu iwu, Wulwore.

⁶Juloko kira abic ku sente ario ngo? acel de mbe i kindgi m’urwinyo i wang’ Mungu.

⁷Ento yukwiwu ceke kwandre. Kud wulwor: wu ber ma sagu kira dupa.

⁸Man awacu iwu kumae, Ku ba dhanu ceke ma bituca i wang’ dhanu, Wod dhanu de bituce i wang’ malaika pa Mungu:

⁹ento ng’atu ma bikwera i wang’ dhanu jubikwere bende i wang’ malaika pa Mungu.

¹⁰Man ku ba dhanu ma biyero lembe kum Wod dhanu, jubiweko lembene ire woko: ento ng’atu m’uyero lembacidi kum Tipo Maleng’ ebiwekre woko ngo.

¹¹Ka gibiterowu de i wang’ cokri, ku jubim, ku weg ng’ol de, cwinywu kud uringi maram wubiloko ko lembe, kadi ang’o ma wubiloko, kadi ang’o ma wubiyero:

¹²kum Tipo Ma leng’ biponjowu i saa maeni nini ku gin ma maku wuyer.

¹³Ng’atu acel ma kind udul dhanu wacu ire kumae, Japonji, wac ni umira nia epok camupacu wakude.

¹⁴Ento ewacu ire kumae, Ng’atu e, ng’a m’uketha ni japoklembe kadi japokpiny i wiwu?

¹⁵Ewacu igi kumae, Wubed ku weng’wu, man wukuru giwu ni gin ceke mi kethocwiny hai kum piny: kum kwo pa dhanu mbe i gin m’esagre kudo.

¹⁶Man eyero lembabola igi, ewacu kumae, Podho pa jalonyo moko cego cam hai:

¹⁷man eporo lembe i ie gire, ewacu kumae, Abitimo ang’o, kum kamoko mbe ira m’aketh ie cam para?

¹⁸Ewacu kumae, Abitimo mae: Abimugo dero para, man abigoyo mange ma dit ma sagu; e abiketho cam para ceke ku piny para de keca.

¹⁹Abiwacu ni kwo para kumae, Kwo, ibedo ku piny dit m’akana mi rundi dupa; yom, cam, madhi, anyong’a negi de.

²⁰Ento Mungu wacu ire kumae, In i jakasegu, diewor maeni jubilwong’o kwoni i beng’i; man gin m’iyiko, bidong’ ni ng’a?

²¹Kum ng’atu m’ukanu piny m’akana ire gire bedo kumeni, m’elony ungo de ku ba Mungu.

²²Ewacu ni julubne kumae, Ka kumeno awacu iwu kumae, Cwinywu kud uring pi kwo mu, pi gin ma wubicamu; kadi pi kumwu, pi gin ma wubikendo.

²³Kum kwo sagu cam, kum de sagu kendi.

²⁴Iwu pid pi ngoro nia gicoyo ngo, gikayu de ngo; ma odkancam migi ku dero de mbe; ento Mungu mio igi cam: piwu sagu pi winyo dit apila!

²⁵Ng’a m’i kindwu ma copo medo kadongone bot acel ni cwinye m’uringo?

²⁶Ka kumeno tek wucopo timo gin maeno ngo ma nyathigi, nedi cwinywu ringo kum gin mange?

²⁷Iwu pid pi thiuboko, maram gidongo ko: gimuli ku tic ungo, gicwio de ngo; ento awacu iwu kumae, Cil Suleman i dwong’ pare ceke eronjre ngo calkud acel ma kind maeni.

²⁸Ento tek Mungu ronyo lum m’i thim kumeno, ma nuti tin, urwo de jubaye i mac; ebironyowu dit ma sagu ngo, E wun ma yioyic mu noki?

²⁹Man kud wuyeny gin ma wubicamu, ku gin ma wubimaahu, kadok pidoic mu de kud ubed jiji.

³⁰Kum gin maeni ceke thek m’i ng’om giyenyo: ento Wegwu ng’eyo nia can gin maeni ceke ni i kumwu.

³¹Ento wuyeny ker pa Mungu, e giki maeni bimedre iwu.

³²Kud wulwor, wun udul ma nyanok; kum enyayu mutoro i Wegwu nimio iwu ker.

³³Wulok piny ma wubedo ko, man wumi giramia ni jucan; wukwoi gbethe ma biti ngo iwu giwu, piny m’akana ma thum ungo i polo, ka ma jakwo tundo ceng’ni i ie ngo, kadok ukoko de nyotho ngo i ie.

³⁴Kum ka ma piny m’akana mu ni ie, adimdewu bibedo keca bende.

³⁵Dong’ pierwu bed atwia, thala mu de bed m’eliel;

³⁶wun giwu wubed calu dhanu m’ukio rwoth migi, kan ebiai i agba mir ambadha; kara, kan edwogo edwong’o de, giyab ire pio pio.

³⁷Mugisa ni jumiru maeno, ma ka rwoth migi bino ebinwang’u gibekuro: andha awacu iwu, nia ebitwire gire, e ebiketho gibed piny dhu cemo, man ebibino ebitimo igi.

³⁸Man tek ebino i kur mir arionde, man tek i mir adege de, enwang’ugi kumeno de, mugisa ni jumiru maeno.

³⁹Ento wung’ei maeni, nia tek won ot ung’eyo saa ma jakwo bino i ie kuno di ekuro, man eweko ot pare ngo ya jutur.

⁴⁰Wuyikru bende: kum i saa ma wuwacu nyo ngo e Wod dhanu bino.

⁴¹Petro wacu kumae, Rwoth, iyero lembabola maeni iwa, kadi ni dhanu ceke?

⁴²Rwoth uwacu kumae, Ka ku meno ng’a ma jakurpiny mandha ma riek de, ma rwoth pare bikethe wi juode, nimio igi cemo maka migi ka nindone tundo?

⁴³Mugisa ni jamiru maeno, ma ka rwoth pare bino ebinwang’u etimo kumeno.

⁴⁴Andha awacu iwu, nia ebikethe wi gin ceke m’ebedo ko.

⁴⁵Ento tek jamiru maeno biwacu i adundene kumae, Rwoth para galu ku bino pare; man ebimaku fodo jutic wadi ma co ku ma nyir de, man ecamu emadhu de, emer de ku kong’o;

⁴⁶rwoth pa jamiru maeno bibino i ceng’ m’ewacu nyo ebibino i ie ngo, i saa de m’eng’eyo ngo, man ebigoye ma tek, ebiketho maka pare karacelo ku mi jumandha ngo.

⁴⁷Jamiru maeno, m’ung’eyo yeny ma ii rwoth pare yenyo, eyikre de ngo, etimo de ngo calu yeny ma ii rwodhe yenyo, jubigoye ku goc dupa;

⁴⁸ento ng’atu m’ung’eyo ngo, man etimo gin m’uromo ku goc de, jubigoye ku goc ma nok. Man ng’atu ma tek jumio ire dupa, jubilwong’o dupa i bang’e: man ng’atu ma tek juketho gin ma dit i kore, e jubikwayu ma sagu i bang’e.

⁴⁹Abino bolo mac wi ng’om; e ang’o m’ayenyo, tek edaru opo?

⁵⁰Ento baputisi para nuti ma jubimio ira; man cwinya ng’abre dit ma foketimbre kakare ngo!

⁵¹Wuwacu nyo abino kelo kwiocwiny i ng’omi? Awacu iwu kumae, Ungo; ento ma sagu pokri:

⁵²kum ugambre kawono dhanu abic m’i ot acel bipokre, adek bijai ni ario, ario ke ni adek.

⁵³Gibipokri, wego kum wodo, wodo ke kum wego; mego ke ku nyare, nyaku ke ku min mire; wang’u ke ku ci wodo, ci wodo ke ku wang’u mire.

⁵⁴Ewacu ni udul dhanu bende kumae, Ka wuneno afuru jire yo reto, ndhu ndhu nica wuwacu kumae, Koth ubebino; e etimbre kumeno.

⁵⁵Man ka wuneno yamu m’uai yor ariwa bekoto, wuwacu kumae, Lietho ma kec bibino; e etimbre de.

⁵⁶Wu weg ambili, wung’eyo maram wung’io ko wang’ ng’om ku polo; ento nedi wung’eyo ngo maram wung’i ko nindo maeni?

⁵⁷Nedi wun giwu wuluro gin m’ubedo pwe ngo?

⁵⁸Kum kinde m’ibecidho i wang’ jabim wuku jadegini, wuyik lembe wukude mor mor ma fodi wuni i yo; emaru ywei ba japoklembe, japoklembe maru mii ni asikari, asikari de maru boli i odkol.

⁵⁹Awacu iri kumae, Ibiai kakeca ki ngo, ma fodi k’iculo wang’ sente pet kubang’e ngo.