Read Alur Luka 14 Bible Online

Luka 14 - Alur bible

Luka 14

¹Man etimbre, kan emondo i ot pa ng’atu acel ma kind jubim mi Jufarisayo i ceng’ sabatu nicamu kwen, nia gibekenge.

²Man nen, ng’atu moko nuti i wang’e ma won tho mir ayidha mi pwe.

³E Yesu loko lembe ewacu ni jueuthecik ku Jufarisayo, ewacu kumae, Cik uyio jukei kum i ceng’ sabatu, kadi ngo?

⁴Ento giling’. Man egame, ekeyo kume, eweko ecidho.

⁵E ewacu igi kumae, Ng’a m’i kindwu ma ka dhiang’ pare kadi kana podho i vur, ma k’ewodhe ngo ndhu ndhu nica i ceng’ sabatu?

⁶E gicopo loko lembe ngo kum gin maeni.

⁷Man eyero lembabola ni ju ma julwong’ogi kan eneno maram gifoyo ko kom m’usagu wagi; ewacu igi kumae,

⁸Ka ng’atu moko lwong’i ni cemo mir ambadha, kud ijany wi kom ma sagu wagi; poinyo elwong’o ng’atu moko ma dwong’ ma segi,

⁹e ng’atu m’ulwong’i ku ng’atuno de bibino biwacu iri kumae, Yikri ni ng’atuni; e kan ibimaku dok i ka ma nweng’ ku lewic.

¹⁰Ento ka julwong’i, koicibed ka ma nweng’; kara ka ng’atu m’ulwong’i bino, ewac iri kumae, Jarimo, cidh i ka ma krr: kan ibibedo ku yung i wang’ dhanu ceke ma wubedo kugi dhu cam.

¹¹Kum ku ba dhanu nzu m’utingre gire jubijwige: man ng’atu m’ujwigre gire jubiyunge.

¹²Man ewacu ni ng’atu m’ulwong’e de kumae, Kan itimo cam mi dieceng’ kadi mir uthieno, kud ilwong’ jurimbi, kadi utumeru, kadi wat peri, kadi judhugola peri ma julonyo; gin bende gimaru lwong’i ka wang’ maeni, e wang’e bicule iri.

¹³Ento kan itimo agba, lwong’ jucan, ku weg abala mi bot, ku weg abala mi tielo ku ju ma abinga:

¹⁴e mugisa bikwenyi: kum gin moko mbe kugi ma gicul kawang’e: kum ebicule iri i cer mi weg bedopwe.

¹⁵Ka ng’atu acel m’i kind ju m’ubedo dhu cam karacelo kude winjo gin maeno, ewacu ire kumae, Mugisa ni ng’atu ma bicamu kwen i ker pa Mungu.

¹⁶Ento ewacu ire kumae, Ng’atu moko timo cemo ma dit mir uthieno; man elwong’o dhanu dupa:

¹⁷i kinde mi cemo mir uthieno eoro jamiru pare niwacu ni ju ma julwong’ogi kumae, Wubin; kum gin ceke bedo ayika kawono.

¹⁸Kagi ceke ku pidoic acel gimaku yenyo lembe m’ugony lembe m’i wigi. Ma kwong’ane wacu ire kumae, Ang’iewo podho, akoeinene be; akweii gony lembe m’i wia.

¹⁹Mange wacu kumae, Ang’iewo koni dhiang’ ma ku mberembere abic, man acimulogi; akweii gony lembe m’i wia.

²⁰Ng’atu mange wacu kumae, Agamu dhaku, ka kumeno acopo bino ngo.

²¹Jamiru bino, eyero gin maeni ni rwoth pare. E ng’ecwiny ulund umaku won ot, man ewacu ni jamiru pare kumae, Ci pio i gengi kud i yo ma i adhura de, ikel i ie kakeni jucan, ku weg abala mi bot, ku ju ma abinga, man weg abala mi tielo.

²²Jamiru wacu kumae, Rwoth, gin m’ing’olo timbre, kabedo re dong’.

²³Rwoth uwacu ni jamiru kumae, Ci woko i gengi ku dhugang’ de, man idhulgi gibin gimondi, kara ot para pong’.

²⁴Kum awacu iri, nia jumaco maeno ma julwong’o moko mbe ma bibilo cemo para mir uthieno.

²⁵Nie udul dhanu dupa gicidho gikugi; man elokre, ewacu igi kumae,

²⁶Tek ng’atu moko bino i bang’a, ma k’edagu won mire ngo, ku min mire, ku cege, ku nyithindhe, ku utumin, ku nyimin de, eyo, ku kwo pare bende, ecopo bedo jalubna ngo.

²⁷Ng’atu ma tek kuyeyo yen m’athara pare ngo, elubo ko ng’eya, ecopo bedo jalubna ngo.

²⁸Kum ng’a m’i kindwu, m’uyenyo egom ot ma wiu, ma k’elar ebed piny ungo ekwan wel piny, tek ebedo ku m’ecopo dare ko?

²⁹Marmoko, kan edaru ketho kathere, man ecopo dare ngo, dhanu ceke m’uneno gimaku caye,

³⁰giwacu kumae, Ng’atuni maku gomo, man daru loye.

³¹Kadi ubimo ma kani, ma kan ecirombo kud ubimo wagi i lwiny, ma k’ebilar bedo piny ungo epor lembe tek ebicopo ku dhanu rubanga apar nirombo ku ng’atu m’ubino i bang’e ku dhanu rubanga pier ario?

³²Kadi tek ecopo ngo, e eoro kwenda ka fodi wadi ni bor, man epenjo lembe mi kwiocwiny.

³³Ka kumeno ng’atu ma tek ni i kindwu m’ukuno gin ceke m’ebedo ko ngo, ecopo bedo jalubna ngo.

³⁴Ka kumeno kadu bedo mit: ento tek kadu midone rwinyo, jubidwoko midone kud ang’o?

³⁵Eromo ngo ni ng’om kadi ni kaweyo de: jubaye woko. Ng’atu m’ubedo ku ithe m’ewinjo ko, wek ewinji.