Read Alur Luka 15 Bible Online

Luka 15 - Alur bible

Luka 15

¹Nie weg ajok ceke ku judubo bende gibecoro ceng’ni i bang’e kara giwinje.

²Man Jufarisayo ku jugorcik ging’ur, giwacu kumae, Ng’atuni jolo judubo, ecamu kugi de.

³Man eyero igi lembabola mae, ewacu kumae,

⁴Ng’a ma ni i kindwu ma won rombe dak, ma kan acel m’i kindgi rwinyo ire, eweko pier abung’wen wi abung’wen ungo i yamba, ecidho de eyenyo maeni m’urwinyo ngo, maram enwang’e ko?

⁵Man kan enwang’e, e ekethe wi goke, k’anyong’a.

⁶Kan etundo i ot pare, elwong’o jurimbe ku judhugola pare karacelo, ewacu igi kumae, Anyong’a negwu wakudu, kum anwang’u rombo para m’urwinyo.

⁷Awacu iwu, nia anyong’a bibedo nuti kumeno i polo kum jadubo acel m’uloko cwinye, ma sagu mi dhanu ma pwe pier abung’wen wi abung’wen, ma can loko cwiny umbe kugi.

⁸Kadi dhaku makani ma won sente apar, tek ng’ete acel urwinyo ire, ecwinyo thala ngo, eyweyo ot de, eyenyo mor mor ungo maram enwang’e ko?

⁹E kan enwang’e, elwong’o jurimbe ku judhugola pare karacelo, ewacu kumae, Anyong’a negwu wakudu, kum anwang’u ng’et sente m’urwinyo ira.

¹⁰Cil kumeno, awacu iwu, Anyong’a nuti i wang’ malaika pa Mungu kum jadubo acel m’uloko cwinye.

¹¹Man ewacu kumae, Ng’atu moko bedo ku wote ario:

¹²wode ma nok uwacu ni won kumae, Vwa, mi ira ng’et jupiny peri maka para. Man epoko igi piny pare.

¹³Yo ng’ei ceng’ ma nyanok, wode ma nok ucoko piny pare ceke karacelo etugo woth ecidho i ng’om ma bor; man edhenyo piny pare ku bedo mir awagu.

¹⁴E kan elalu ceke, ndra ma dit upodho i ng’om maeno; man emaku bedo ku can piny.

¹⁵E ecidho eribre gire ba ng’atu acel ma kind dhanu m’i ng’ombuno; man eore i podho pare emi cam ni kul.

¹⁶Man eyenyo eyeng’ ku cung’ cam ma kul ucamu: e ng’atu moko mbe m’umio ire.

¹⁷Ento kan enwang’u rieko gire ewacu kumae, Jutic pa vwa mi sukulia adi m’ubedo ku kwen ma romogi donge dong’ de, ka an atho keni ku kec!

¹⁸Abiai abicidho ba vwa, abiwacu ire kumae, Vwa, adubo ni polo man i weng’i de;

¹⁹aromo ngo kendo nia julwong’a wodi; keth abed calu jatic peri acel mi sukulia.

²⁰E eai, ebino de ba won. Ento ka fodi eni bor, won unene, ngisi nege de, man eringo, egwaku ng’ute, ecwio limbe de.

²¹Wode wacu ire kumae, Vwa, adubo ni polo, kud i weng’i de: aromo ngo kendo ya julwong’a wodi.

²²Ento won uwacu ni jumiru pare kumae, Wuwodh kendi ma sagu wagi pio, wurony i kume; wuroi lagith de i lwete, ku wara de i tiende:

²³man wukel nyathi dhiang’ m’ucwe, wuthume, man wek wacam, watim anyong’a de:

²⁴kum woda maeni ma nwang’u utho, ebedo kwo kendo; erwinyo, man enwangre. E gimaku bedo kud anyong’a.

²⁵Nwang’u wode ma jadit ni i thim: e kan ebino edhingo ot de, ewinjo bang’ adungu ku miel de.

²⁶E elwong’o ng’atu acel i bang’e ma kind jutic, man epenjo nia kuno nyo gin maeni ang’o.

²⁷Ewacu ire kumae, Umeru dwogo en; e wuru thumo nyathi dhiang’ m’ucwe, kum ejole museme bo de.

²⁸Ento ng’ecwiny umake, man eyio ngo emondi: e won uwok woko, man ecuke.

²⁹Ento eloko lembe ewacu ni won kumae, Nen, rundi maeni dupa atimo iri, man akadhu ku wi lembang’ola peri ki ngo; ento fodi imio ira nyathi diel de ngo, kara atim anyong’a ku jurimba:

³⁰ento ka wodi maeni dwogo, m’ecamu piny m’itungri kudo ku weg tarwang’ ithumo ire nyathi dhiang’ m’ucwe.

³¹E ewacu ire kumae, Woda, ibedo i bang’a asu, gin ceke ma para en e peri.

³²Ento emaku jutim anyong’a jubed ku mutoro de: kum nwang’u umeru maeni tho, man ebedo kwo kendo; erwinyo, man enwangre.