Read Alur Luka 16 Bible Online

Luka 16 - Alur bible

Luka 16

¹Man ewacu ni julubne bende kumae, Jalonyo moko nuti m’ubedo ku jakurpiny; judoto ng’atuno i bang’e nia edhenyo piny pare.

²Man elwong’e, ewacu ire kumae, Lem mae m’awinjo piri e ang’o? wodh wel mi kuropiny peri; kum icopo bedo jakurpiny kendo ngo.

³Jakurpiny uwacu i ie gire kumae, Abitimo ang’o, kum rwoth para kabu tic mi kuropiny i bang’a? Tekra mbe mi furofur; lewic de nega kum kwayu piny.

⁴Ang’eyo gin m’abitimo, nia, ka jukaba woko kud i tic mi kuropiny, gibin gijola i udigi.

⁵E kan elwong’o jubanja pa rwodhe kubang’gi nzu i bang’e, ewacu ni ma kwong’ane kumae, Banja peri adi m’igamu ba rwoth para?

⁶Ewacu kumae, Mo mukero dak. Man ewacu ire kumae, Gam waraga peri, ibed piny pio igor pier abic.

⁷Elund ewacu ba ng’atu mange kumae, In ke banja peri adi? Ewacu kumae, Nganu mukero dak acel. Ewacu ire kumae, Gam waraga peri, igor pier abora.

⁸Rwoth pare foyo jakurpiny m’ugondre kum etimo ku rieko: kum wot mi ng’om maeni i kind dhanum’utuk migi gi riek ma sagu wot mi der.

⁹Man awacu iwu kumae, Wumak jurimo iwu giwu ku piny mi gondri; kara, kan ebithum, gibijolowu i hema ma nja.

¹⁰Ng’atu ma en e mandha i gin ma nyathigi en e mandha bende i gin ma dit: man ng’atu m’ugondre i gin ma nyathigi egondre bende i gin ma dit.

¹¹Ka kumeno tek wubedo mandha ngo i piny mi gondri ng’a ma bimio iwu piny mandha ni sumba?

¹²Tek wubedo mandha ngo i maeno ma pa ng’atu mange, ng’a ma bimio iwu ma mu ma dhe?

¹³Jatic umbe ma copo timo ni judongo ario: kum kadi ebidagu acel, ebimaru mucelo; kadi ebimoko bang’ acel, man ebicayu mucelo. Wucopo timo ni Mungu ku lonyo de ngo.

¹⁴E Jufarisayo, ma jumar sente, giwinjo gin maeni ceke; e gicaye.

¹⁵Ewacu igi kumae, Wun wu ju ma wugonyo lembe m’i wiwu giwu i wang’ dhanu; ento Mungu ng’eyo adundewu: kum gin m’utingre ku ba dhanu en e gin mir adegi kud i wang’ Mungu.

¹⁶Cik ku jubila ginuti cil kum Yohana: ugambre i nindo maeca lembanyong’a ma juboth ko mi ker pa Mungu juyero, man ku ba dhanu nzu gimondo i ie ku kero.

¹⁷Ento kadhu woko mi polo ku ng’om e yot, ma sagu podho mi ng’et nyiguta acel mi cik.

¹⁸Ku ba dhanu ndri ma tek uweko cege, man egamu mange, nwang’u egiero gier: ng’atu m’ugamu ng’atu ma cware weke nwang’u egiero gier.

¹⁹Nwang’u jalonyo moko nuti, m’uronjre kud uluga ku bongu ma nwang’ ma ber, man ecamu cemo ma mit ceng’ ceke:

²⁰e jakwaipiny moko ma nyinge Lazaro nuti ma juketho dhugang’ pare, ma rem uromo kume ceke,

²¹m’eyenyo eyeng’ ku ng’ili cam m’uoi ku dhu mesa pa jalonyo; eyo, cil gwogi gibino ginang’u wang’ rem pare.

²²Man etimbre, nia jakwaipiny utho, malaika de giyeye gitere kor Ibrahim: jalonyo bende tho, e juyike.

²³Man eng’ayu wang’e malu kud i Hadeya, ma eni i ndiba, e eneno Ibrahim ku bor, man Lazaro de ni kore.

²⁴E ekok ewacu kumae, Vwa Ibrahim, bed ku kisa i kuma, man ior Lazaro, kara eroi wi lwete i pi, ekwi ko leba; kum abedo i ndiba i lebmac maeni.

²⁵Ento Ibrahim wacu kumae, Woda, poi nia i rundi m’ibedo ie kwo inwang’u gin peri ma ber, Lazaro de kumeno enwang’u gin ma rac: ento kawono ejukre keni, in ke ini i ndiba.

²⁶M’umedo maeni ceke, i kindwa wakudu longro ma dit nuti, kara ju m’uyenyo giai kakeni gikadh i beng’i ku gicopi, kara jumoko ma kuno de kadhu i bang’wa kud ucopre igi.

²⁷Man ewacu kumae, Ka kumeno akweii, vwa, iore i ot pa vwa;

²⁸kum abedo ku utumira abic; kara eyer igi, kara gin bende ku gibin i ka ndiba maeni.

²⁹Ento Ibrahim wacu kumae, Gibedo ku Musa ku jubila de, wek giwinjgi.

³⁰Man ewacu kumae, Ungo, vwa Ibrahim: ento tek ng’atu acel ucidho i bang’gi m’uai i kind ju m’utho, e gibiloko cwinygi.

³¹E ewacu ire kumae, Tek giwinjo Musa ku jubila de ngo, gibicukri ngo, kadok ng’atu moko ai ku kind ju m’utho.