Read Alur Luka 19 Bible Online

Luka 19 - Alur bible

Luka 19

¹Man emondo i Yeriko ebekadhu akadha.

²Man nen, ng’atu ma nyinge Zakayo nuti; en e jadit mi weg ajok, elony de.

³Man eyenyo enen Yesu ya en e ng’a; ento ecopo ngo ni njuru dhanu, kum etwil.

⁴Man etelo yo ku ng’wec, eidho malu wi ulemo kara enene: kum ebikadhu i yo maeno.

⁵Ka Yesu wok kakeca, eng’ayu wang’e malu, man ewacu ire kumae, Zakayo, lor piny pio; kum tinuni akobedo i ot peri be.

⁶Man etimo pio, eloro piny, ejole de ku mutoro.

⁷Ka gineno maeni, kagi ceke ging’ur, giwacu kumae, Emondo nibedo ku ng’atu ma jadubo.

⁸Zakayo cungo, man ewacu ni Rwoth kumae, Nen, Rwoth, ng’et piny para kucel amio ni jucan; man tek avugo ng’atu moko ku riu, adwoko wang’e wang’ ang’wen.

⁹E Yesu wacu ire kumae, Tinuni both ubino ba ot maeni, kum en bende en e wod Ibrahim.

¹⁰Kum Wod dhanu bino niyenyo nilaru de ju m’urwinyo.

¹¹E ka giwinjo gin maeni, emedo eyero de ku lembabola, kum eni ceng’ni Yerusalem, man kum giwacu nyo nia ker pa Mungu binyuthre pio.

¹²Ka kumeno ewacu kumae, Jadit acel ucidho i ng’om ma bor, nigamu ker ire gire, kan edwogo.

¹³E elwong’o jumiru pare apar, emio igi nyol mola apar, man ewacu igi kumae, Wulok maeni cil m’abino.

¹⁴Ento dhanu pare gidage, gioro kwenda i toke, m’uwacu kumae, Wayenyo ngo nia ng’atu maeni bim wiwa.

¹⁵Man etimbre, kan edwogo kendo, ma nwang’u emaku ker, nia eng’olo ya julwong’ jumiru maeni i bang’e, m’emio igi sente, kara eng’ei piny ma giloko.

¹⁶Ma kwong’ane bino i bang’e, ewacu kumae, Rwoth, nyol mola peri tundo nyol mola apar mange.

¹⁷Man ewacu ire kumae, Itimo dre, in i jamiru ma ber: kum junwang’u ibedo mandha i lem ma nyathigi, ibed ku ng’ol wi adhura apar.

¹⁸E mir arionde bino, ewacu kumae, nyol mola peri, Rwoth, utundo nyol mola abic mange.

¹⁹Ewacu ire bende kumae, In bende ibed wi adhura abic.

²⁰E mange bino, ewacu kumae, Rwoth, nen, nyol mola peri eni, m’akanu aboyo ku kitambala:

²¹kum alwori, kum in i ng’atu ma tek: iting’o gin m’iketho piny in ungo, ikayu de gin m’icoyo in ungo.

²²Ewacu ire kumae, Abipoko lembe peri ku lembe m’uai i dhogi, in i jamiru ma rac. Ing’eyo nia an a dhanu ma tek, m’ating’o gin m’aketho piny an ungo, akayu de gin m’acoyo an ungo;

²³ka kumeno itero sente para i kakanpiny ungo nedi, man i bino para alwong’e ku kulokane de?

²⁴E ewacu ni ju m’ucungo ceng’ni kumae, Wugam nyol mola woko kud i bang’e, wumi ni won nyol mola apar.

²⁵Giwacu ire kumae, Rwoth, ebedo ku nyol mola apar.

²⁶Awacu iwu kumae, nia ku ba dhanu ceke m’ubedo ko jubimio ire; ento ng’atu m’ubedo ko ngo re, e ma jubimaye cil ku gin m’ebedo ko.

²⁷Ento jukwoja eni, ma giyio ngo nia abim wigi, wukelgi keni, wuneggi de i wang’a.

²⁸E kan edaru yero kumeni, etelo yo, m’eidho ko malu Yerusalem.

²⁹Man etimbre, kan edhingo ceng’ni Bethfage ku Bethania, ba got ma julwong’o Zeituni, eoro julubne ario,

³⁰ewacu kumae, Wucidh, i yo mu i pacu ma yor i weng’wu; ka wumondo i ie wubinwang’u nyathi kana m’ubedo ang’aba, ma fodi ng’atu moko mbe m’ubedo i wie: wugonye, wukele.

³¹Man tek ng’atu moko penjowu kumae, Wugonye nedi? wuwac kumae, Cande ni kum Rwoth.

³²E ju ma juorogi gicidho, man ginwang’u lembe bedo calu eyero igi.

³³E ka gibegonyo nyathi kana, wegi wacu igi kumae, Wugonyo nyathi kana nedi?

³⁴Giwacu kumae, Cande ni i kum Rwoth.

³⁵Man gikele ba Yesu: gipedho bongu migi de ng’ei nyathi kana, man giketho Yesu i wie.

³⁶E kan ecidho, gipedho bongu migi i yo.

³⁷Man kan edhingo, ka ma lung’ mi got Zeituni, udul julubne ceke anyong’a maku negogi man gipaku Mungu ku dwal ma tek kum tic mi tego ceke ma gineno;

³⁸giwacu kumae, Mugisa ni Ubimo m’ubino i nying’ Rwoth: kwiocwiny i polo, dwong’ de i ka ma malu ngbir.

³⁹E Jufarisayo moko ma kind udul dhanu giwacu ire kumae, Japonji, juk julubni.

⁴⁰Man eloko lembe ewacu kumae, Awacu iwu nia, tek joni giling’ kidi bikok akoka.

⁴¹E kan edhingo ceng’ni, eneno adhura eywak de i kume,

⁴²ewacu kumae, E, tinuni tek nwang’u ing’eyo gin ma mi kwiocwiny peri! ento kawono gimungri i weng’i.

⁴³Kum ceng’ biwok i kumi, ka jukwoji bidhuro ng’om i theri, man gibitieki kingli, man gibikuri kun ku kun ceke,

⁴⁴man gibiredhi i ng’om, ku nyithindho peri ma ni ii; man gibiweko kidi acel de ngo wi wagi ii; kum ing’eyo ngo nindo mi lieu peri.

⁴⁵Emondo i hekalu, man emaku riemo ju m’ubeloko kuloka,

⁴⁶ewacu igi kumae, Egore kumae, Man ot para bibedo odrwo: ento wudwoke ni kagonjo mi weg ayeki.

⁴⁷Man eponjo ceng’ ku ceng’ i hekalu. Ento julam ma dongo ku jugorik de ku judongo mi dhanu giyenyo ginyothe:

⁴⁸e ginwang’u ngo gin ma gicopo timo: kum dhanu ceke gidikri i kume, niwinje.