Read Alur Luka 2 Bible Online

Luka 2 - Alur bible

Luka 2

¹Nie etimbre i ceng’ maeno, nia ng’ol uai ba Kaisari Augusto, nia jugor nying’ dhanu ngung’ m’i ng’om.

²Maeni en e goronying’ ma kwong’ane ma jular jugoro ka Kurenio bedo jabim mi Cami.

³Dhanu ceke eidho kubang’gi nzu bang’ adhura migi ma dhe nigoro nying’gi gigi.

⁴Yusuf bende idho malu m’eai i Galilaya, kud i adhura Nazareti, i Yahudi, ecidho bang’ adhura pa Daudi, ma julwong’o Beth-lehem, kum en e mi ot man wat pa Daudi;

⁵nigoro nying’gi gigi giku Mariamu ma cege, m’ebenyomo, ma ie teng’ni.

⁶Etimbre, kinde ma gini keca, nia ceng’ uromo kakare m’ebinyol i ie.

⁷Man enyolo wode ma kayu; eboye ku bongu mi mukere, man epiele i ka cemo mi dhiang’, kum kabedo mbe igi i odwelo.

⁸I ng’ombuno jukwac nuti, ma gibedo i thim, man gibekuro udul rombe migi ku diewor.

⁹Malaika pa Rwoth de cungo i bang’gi dwong’ pa Rwoth de caru piny i kumgi: lworo de negogi dit.

¹⁰Malaika wacu igi kumae, Lworo kud unegwu; kum nen, akelo iwu rwonglembe ma ber mir anyong’a ma dit ma bibedo ni dhanu ceke:

¹¹kum tinuni junyolo iwu i adhura pa Daudi Jalar, ma en e Kristu ma Rwoth.

¹²Maeni en e giranyutha iwu: Wubinwang’u mukere ma juboyo ku bongu mi mukere, man evuto i ka ma juketho ie cam mi dhiang’.

¹³E eni eni udul malaika m’i polo ginuti karacelo ku malaika maeno gibepaku Mungu, giwacu kumae,

¹⁴Dwong’ ni Mungu ma malu ngbir, Kwiocwiny de wi ng’om kind dhanu ma mutoro nege i kumgi.

¹⁵Man etimbre, kinde ma malaika ai i bang’gi gidok i polo, jukwac giwecri kumae, Dong’ wacidhu kawono i Beth-lehem, wanenu gin maeni m’utimbre, ma Rwoth uketho wang’eyo.

¹⁶Man gibino pio, ginwang’u Mariamu giku Yusuf, ku mukere de m’uvuto ka ma juketho ie cam mi dhiang’.

¹⁷Ka ginene de, giketho jung’eyo pi lembe m’uyere igi pi nyathin maeni.

¹⁸Dhanu ceke m’uwinjo maeni igi wang’ lii kum lembe ma jukwac uyero igi.

¹⁹Ento Mariamu kanu lembe maeni ceke, epido pigi i achindene.

²⁰Jukwac gidok, ku yungo Mungu ku pake de pi gin ceke ma giwinjo ma gineno de, cil calu eyere igi.

²¹Ka ceng’ abora romo mi timo yaa i kume, jucaku nyinge Yesu, calu malaika lwong’o ma fodi jukugamu icne ngo.

²²Ka ceng’ uromo mi dwokri leng’ migi calku cik pa Musa, gikele malu Yerusalem nithiere ba Rwoth

²³(calu egore i cik pa Rwoth kumae, Ku ba co ceke m’uyabu i min jubilwong’e leng’ ni Rwoth),

²⁴man niwodho lam calu cik pa Rwoth uwacu kumae, Akuru ario, kadi nyithindh akuru ario.

²⁵Man nen, ng’atu moko nuti Yerusalem, ma nyinge Simeon; ng’atu maeni ng’atu ma pwe ma lworo Mungu de, m’ebekio juk mir Israel: Tipo Maleng’ de ni i wie.

²⁶Man Tipo Maleng’ unyutho ire nia ebineno tho ngo, ma fokeneno Kristu pa Rwoth ungo.

²⁷Man ebino i hekalu m’eni i Tipo: ka junyodo pa Yesu gikelo nyathin Yesu i ie, kara gitim i kume calku kura cik,

²⁸elund ejole i bote, emio mugisa ni Mungu, ewacu kumae,

²⁹Rwoth, kawono iyio jamiru peri cidh, Calku lembe peri, i kwiocwiny;

³⁰Kum wang’a neno both peri,

³¹M’iyiko i nyim wang’ kodhidhanu ceke;

³²En e der mi nyuthonyuth ni Thekdha numange, Man dwong’ mi dhanu peri Israel.

³³Man won ku min de igi wang’ lii kum gin m’uyere pire;

³⁴man Simeon umio mugisa igi, man ewacu ni Mariamu ma min kumae, Nen, nyathin maeni kethre ni podho ku ai mi dupa i Israel; man pi giranyutha ma juyero pire rac:

³⁵eyo man palamularu bicobo ng’eyong’ec peri giri; kara pidoic ma i adunde dupa nyuthre.

³⁶Jabila ma dhaku nuti ma nyinge Ana, e nya Fanueli, mi suru pa Acer (eti dit, m’ebedo ku nico oro abiro yo ng’ei bedo nyaku,

³⁷man ebedo umbe cware cil i oro pier abora wi ang’wen), m’eai ngo i hekalu, m’erwo ni Mungu diewor ku dieceng’ ku weko cam! ku kwayukwac de.

³⁸Man ewok i saa nini emio foc ni Mungu, man eyero pire ni dhanu ceke m’ukuro war mi Yerusalem.

³⁹Man ka gidaru gin ceke calu cik pa Rwoth uwacu, gidok Galilaya, bang’ adhura migi ma dhe ma Nazareti.

⁴⁰Nyathin udongo, tego medre ire, rieko de pong’e: man bero pa Mungu ni i wie.

⁴¹Junyodo pare gibegicidho Yerusalem ku ba rundi i agba mi kadhukuwijo.

⁴²Ka rundi pare doko apar wi ario, giidho malu calu kura mir agba;

⁴³man ka gidaru timo ceng’ne kakare, kinde ma gibedok, nyathin Yesu dong’ cen i Yerusalem; man junyodo pare ging’eyo ngo;

⁴⁴ento kum giwacu nyo enuti i piro migi, giwotho woth mi ceng’ acel; man giyenye i kind wat migi ku juwagi;

⁴⁵ka ginwang’e ngo, gidok Yerusalem, ku yenye.

⁴⁶Man etimbre, ka ceng’ adek ukadhu ginwang’e i hekalu, m’ebedo i kind jueuthecik, m’ewinjogi epenjogi ku lembe de:

⁴⁷dhanu ceke m’uwinje de igi wang’ lii kum ng’eyong’ec pare ku lembadwoka pare.

⁴⁸Ka ginene, igi wang’ lii; e min uwacu ire kumae, Woda, nedi itimo kumeno i bang’wa? nen, waku wuru wayenyi ku can kwa.

⁴⁹Ewacu igi kumae, Wuyenya nedi? wung’eyo ngo nia akoabed i tic pa Vwa be?

⁵⁰Ento ging’eyo lembe m’eyero igi ngo.

⁵¹Man giloro gikugi, giwok Nazareti; man eworogi: e min ukanu lembe maeni ceke i adundene.

⁵²E Yesu dongo man ecikucidho i rieko, man i bero ni Mungu ku dhanu bende.