Read Alur Luka 21 Bible Online

Luka 21 - Alur bible

Luka 21

¹E eng’ayu wang’e malu, man eneno julonyo m’ubolo giramia migi i kakanpiny.

²Man eneno dhaku moko ma jacan ma cware tho ubolo sente ario i ie.

³E ewacu kumae, Ayero iwu andha kumae, Dhaku maeni m’e jacan ma cware tho ebolo i ie ma sagugi ceke:

⁴kum joni ceke gibolo i ie ni giramia migi kum gin ma gisagri ko; ento en kum can pare ebolo i ie gin ceke m’ecopre kudo.

⁵E ka jumoko weco pi hekalu, maram erukre ko ku kidi ma ber ku giramia de, ewacu kumae,

⁶Pi gin maeni ma wuneno, ceng’ bibino, ma jubiweko ie kidi acel de ngo kakeni wi wagi, ma jukubibolo piny ungo.

⁷E gipenje, giwacu kumae, Japonji, ka kumeno gin maeni biwok awene? man giranyutha bibedo ang’o ka gin maeni dhingo timbre?

⁸Man ewacu igi kumae, Wubed ku weng’wu kara ku juwingwu: kum dhanu dupa bibino ku nyinga, ku wacu kumae, An a en; man, Nindo dhingo ceng’ni: kud wulub ng’eigi.

⁹Man ka wubiwinjo pi lwiny kud ali de, ndiri kud umakwu: kum gin maeni bikolar timbre be; ento kajikne fodi kawono ngo.

¹⁰E elund ewacu igi kumae, Thek bijai kum thek wagi, ker de kum ker;

¹¹digidi ma dit de bibedo nuti, ndru de bibedo nge nge ku thong’om bende; ndiri de bibedo nuti ku giranyutha ma dit m’uai i polo.

¹²Ento ka gin maeni ceke fokutimbre ngo, e gibimakuwu ku cing’gi, man gibinyayu ragedo i kumwu, gibimiowu ba cokri ku otkol de, gibiterowu i wang’ ju m’ubimo man i wang’ jubim de pi nyinga.

¹³Ebilokre edoko ni lembatuca iwu.

¹⁴Ka kumeno wuketh adundewu cungi, nia iwu bilar pido ngo maram wulok ko lembe:

¹⁵kum abimio iwu dhok man rieko, ma judegi mu ceke bicopo piemo ngo kadi ajaya de.

¹⁶Ento junyodo, ku utumego, ku wat, ku jurimo gibicibowu; man moko m’i kindwu gibiketho nia juneggi.

¹⁷Dhanu ceke de bidaguwu pi nyinga.

¹⁸E yukwic mi wiwu acel de mbe ma birwinyo.

¹⁹I twiocwiny mu wubibodho kwo mu.

²⁰Ento ka wuneno njuru asikari ubetieko Yerusalem wulund wung’ei nia nyoth pare dhingo ceng’ni.

²¹I nindo maeno ju ma gini i Yahudi wek giring i gudi: man ju ma gini i kinde wek giai woko; man ju ma gini i thim ku gimond i ie.

²²Kum maeni ceng’ culokwor, kara gin ceke m’ugore timbre kakare.

²³Can wi ju ma igi nuti ku ju ma nyithindho dhodhogi i ceng’ maeno! kum lem ma tek hai bibedo nuti i ng’om, ku kwinyo de ni dhanu maeni.

²⁴Man gibipodho ku lak palamularu, jubipeyogi de ni ayeki i thek ceke: Yerusalem de Thekdhanumange binyone, maram nindo mi Thekdhanumange bitimbre ko kakare.

²⁵Giranyutha de bibedo nuti i ceng’ ku dwi ku cero; i ng’om de lem ma tek mi thek, i ang’abacwiny kum woi mi nam man mukura;

²⁶dhanu biyenyo tho ni lworo, man kum kuro gin m’ubebino i ng’om: kum tego mi polo biyengre.

²⁷E gibilund neno Wod dhanu bebino i afuru ku tego man dwong’ ma dit.

²⁸Ento ka gin maeni maku timbre, wung’ai weng’wu malu, wuting’ wiwu malu de; kum war mu dhingo ceng’ni.

²⁹Man eyero igi lembabola mae: Wunen ulam, ku yedhi ceke:

³⁰ka gimoc loth, wuneno maeni man wung’eyo giwu nia kawono cwir ni ceng’ni.

³¹Cil kumeno wun bende, ka wuneno gin maeni maku timbre, wung’ei nia ker pa Mungu ni ceng’ni.

³²Andha ayero iwu kumae, dhanum’utuk maeni bikadhu woko ngo, ma fodi gin ceke kutimbre ngo.

³³Polo ku ng’om bikadhu woko: ento lembe para bikadhu woko ngo.

³⁴Ento wubed ku weng’wu giwu, kara adundewu kud ucid ku giracama, ku mer kong’o, man ku giki mi bedo maeni, e ceng’ maeno bino i kumwu pio pio pamir uwic:

³⁵kum ebibino kumeno wi dhanu ceke m’ubedo wi wang’ ng’om ngung’.

³⁶Ento wuki ku ba nindo ceke, ku kwayukwac de, kara wusegru ni both ni gin maeni ceke ma bitimbre, wucung de i wang’ Wod dhanu.

³⁷E ku ba ceng’ ceke eponjo i hekalu; man ku ba diewor ceke ecidho woko, man egonjo wi got ma julwong’o Zeituni.

³⁸Dhanu ceke de bino i bang’e pir kugweno i hekalu niwinje.