Read Alur Luka 8 Bible Online

Luka 8 - Alur bible

Luka 8

¹Man etimbre yo ku ng’eye nyanok, nia ecidho ku bang’ adhura ku pacu de, m’ebeyero m’ebekelo ko lembanyong’a ma juboth ko mi ker pa Mungu, karacelo kude de juapar wi ario,

²ku mon moko ma jukeyo kumgi kum tipo ma rac ku mulima bende: Mariamu ma julwong’o Magdalene, ma juwcdho pajogi abiro kud i ie,

³man Yoana ma ci Kuza ma jakurpiny pa Herode, man Susana, ku mange de dupa, ma gitimo ire ku piny migi.

⁴Kan udul dhanu dupa gicokri karacelo i bang’e, ku dhanu m’uai ku bang’ adhura ceke de, eyero ku lembabola kumae:

⁵Jacoikodhi eidho nicoyo kodhi pare; kan ecoye de, moko podho dhu yo; junyone de the tielo, winyo ma kor polo de gicame.

⁶Mange ke podho wi cana; kan etwi de, ener woko, kum pi mbe i there.

⁷Mange ke podho kind ukudho; ukudho de dongo karacelo kude, edeye de.

⁸Mange ke podho i ng’om ma mio, etwi de, man ecego nyinge, acel bang’ dak. Kan eyero gin maeni, ekok akoka kumae, Ng’atu ma ithe nuti m’ewinjo ko, wek ewinji.

⁹Julubne de gipenje nia the lembabola mae ang’o.

¹⁰Ewacu kumae, Emire iwu ya wung’ei giramung’a mi ker pa Mungu: ento ni dong’ dhanu ku lembabola; kara kadok gineno ku ginen, kadok giwinjo de ku ging’ei.

¹¹Nie the lembabola e eni: Kodhi en e lem pa Mungu.

¹²Ju ma dhu yo gi ju m’uwinjo; e wonabali lund ubino, man ekabu lembe woko kud i adundegi, kara ku giyi giboth de.

¹³Ju ma wi cana ke, gi ju ma ka giwinjo, gijolo lembe ku mutoro; maeni de ulaggi mbe kugi, ma giyio mi nindo ma nyanok, i nindo mir abidhe de gikier.

¹⁴Maeno m’upodho kind ukudho ke, maeni ju m’uwinjo, e ka gicidho i yo migi gideiri ku giki m’i ng’om ku lonyo man mutoro mi kwo maeni, e gicego nying’gi moko ngo ma cu.

¹⁵Maeno m’i ng’om ma ber ke, joni gi calu ju m’uwinjo lembe i adunde ma ber ma cu de, ma ka giwinjo lembe, gimoko kume ki, man gicego nying’gi ku twiocwiny.

¹⁶Ng’atu moko mbe, ma kan ecwinyo thala, eume kud agulu, kadi ekethe the kavuto; ento ekethe wi thethala, kara ju m’umondo ginen der.

¹⁷Kum gin moko mbe ma pandre, ma binyuthre ngo; kadok gin m’amung’a de mbe, ma bing’eire ngo ma bibino ba der de ngo.

¹⁸Ka kumeno wukuru maram wuwinjo ko: kum ng’atu ma tek ubedo ko, jubimio ire; man ng’atu ma tek ubedo ko ngo, kud i bang’e jubikabu woko cil maeno m’ewacu nyo ebedo ko.

¹⁹Min mire ku utumin mire de gibino i bang’e, man gicopo tundo i bang’e ngo kum njuru dhanu.

²⁰Juyero ire kumae, Meru ku utumeru gicungo woko, giyenyo gineni.

²¹Ento eloko lembe ewacu igi kumae, Ma ku utumira de gi maeni m’uwinjo lem pa Mungu, m’utime bende.

²²Nie etimbre i kind ceng’ acel maeno, nia emondo i yei, en ku julubne; man ewacu igi kumae, Wacidhu loka nam; e gimaku kiewo.

²³Ento ka gibecidho ku yo mi pi enindo: man wavuvu tuk i nam; e yei migi maku pong’ ku pi, e gi ceng’ni tho.

²⁴Man gibino i bang’e, gicewe de, giwacu kumae, Japonji, japonji, watho. E eceu, man ejuko yamu ku ngongo mi pi de: e gicungo, nam de nindo seble.

²⁵Man ewacu igi kumae, Yioyic mu nikani? Man lworo makugi igi de wang’ lii, giwecri de kumae, Ka kumeno ng’atu maeni en e ng’a, m’eng’olo lembe cil ni yamu ku pi de, man giwore e?

²⁶E gitundo i ng’om Jugadareni, m’ubedo ng’et ng’om Galilaya.

²⁷Kan eloro dhu wath, ng’atu acel m’uai i adhura, m’e won pajogi girombo gikugi; man nindo dupa ekendo bongu ngo, ebedo i ot de ngo, ento i odliel.

²⁸E kan eneno Yesu, ekok akoka, man epodho piny i wang’e, ewacu kumae ku dwande ma tek, Watim ang’o wakudi, Yesu, in i Wod Mungu ma Malu Ngbiri? Akwei, kud isenda.

²⁹Kum ebeng’olo ni tipo m’ucido y a eai kud i ng’atuno. Kum emake bang’ dupa: man jukuro kume, ebedo atwia de ku nyoro ku nyunyu de; kan ecodo gin ma jutwie ko woko, pajogi ringo kude i ng’om ngele.

³⁰Yesu penje kumae, Nyingi ng’a? Man ewacu kumae, Nyinga Udul; kum pajogi dupa mondo i ie.

³¹Man gikwaye y a kud eng’ol gicidh i longro ma there mbe.

³²Nie udul kul dupa nuti keca gibecamu kor got; man gikwaye ya eyi igi nia gimond i igi. E eyio igi.

³³Pajogi giai i ng’atuno, gimondo i kul: man udul ukonjri piny ku ka ma lung’ i nam, e githung’.

³⁴Ka ju m’ukwayugi gineno gin m’utimbre, giringo, giyero lembene i adhura kud i thim de.

³⁵Man gicidho woko kara ginen gin m’utimbre; e gibino ba Yesu, man ginwang’u ng’atu ma pajogi ai i ie, ebedo the tiend Yesu m’ekendo bongu, pidoie de cu: e lworo makugi.

³⁶Ju ma gineno maeni maram kum won pajogi titre ko giyero igi.

³⁷E dhanu ceke m’i ng’et ng’om Jugadareni gipenje ya eai woko kud i bang’gi; kum lworo benegogi dit: e emondo i yei, edok.

³⁸Ento ng’atu ma pajogi ai woko kud i ie epenje nia gibed gikugi: ento eore ecidho, ewacu kumae,

³⁹Dok i ot peri, yer de pi gin ma dit ma Mungu timo iri. Man ecidho i yo pare, ku rweyo cil i adhura ceke maram Yesu timo ko gin ma dit ire.

⁴⁰Ka Yesu dwogo, udul dhanu jole ku mutoro; kum gin ceke gibekure.

⁴¹Man nen, ng’atu ma nyinge Yairo, en de e jadit mi kacokri: epodho piny the tiend Yesu, ekwaye de ebin i ot pare;

⁴²kum ebedo ku nyare acel kulong’, m’ucamu rundi calu apar wi ario, edhingo tho. Ento kan ebecidho udul dhanu gicungri i kume.

⁴³Dhaku m’ubedo rundi apar wi ario ku tho ma rimo mol ko dit i kume, m’emio ceke m’etungre kudo ba jukeikum, man acel de mbe ma copo keyo kume,

⁴⁴ebino yor i ng’eye, emulo dhu kendi pare: e pio pio dhu rimo m’umol i kume cok.

⁴⁵Yesu wacu kumae, Ng’a m’umulo kuma? Ka gin ceke gikwero, Petro, giku ju ma gibedo gikugi giwacu kumae, Japonji, udul dhanu gicungri i kumi gidii.

⁴⁶Ento Yesu wacu kumae, Ng’atu moko mulo kuma; kum ang’eyo nia tego ai i bang’a.

⁴⁷Ka dhaku neno nia epondre ngo, ebino ma kume miel kpa kpa, epodho i wang’e, eyero de i vut dhanu ceke thelembe m’uketho emulo kume, maram kume kei ko ndhu ndhu nica.

⁴⁸Man ewacu ire kumae, Nyara, yioyic peri e m’ubodhi; ci ma cwinyi kwio.

⁴⁹Kinde m’ebeyero, e ng’atu acel ubino m’uai ba ot pa jadit mi kacokri ewacu kumae, Nyeri tho ndhu; kud inyai can i Japonji.

⁵⁰Ento Yesu m’uwinjo, edwoko lembe ire kumae, Lworo kud unegi: yi kende, e kume bititre.

⁵¹Kan ebino ba ot, eyio ngo ng’atu moko mond gikugi, ndhu Petro, man Yohana, ku Yakobo, man won ku min nyathin kendgi.

⁵²Dhanu ceke giywak, gigoyo nduru i kume: ento ewacu kumae, Kud wuywaki: kum etho ngo, ento enindo.

⁵³E ging’iere hai, kum ging’eyo nia etho.

⁵⁴Ento en, m’emake ku cinge, elwong’o, ewacu kumae, Nyaku ai malu.

⁵⁵Man tipone dwogo, eai malu pio pio: e eng’olo nia jumi gin moko ire ecam.

⁵⁶Junyodo pare de igi wang’ lii: ento eng’olo igi nia ku giwac ni ng’atu moko pi gin m’utimbre.