Read Alur Luka 9 Bible Online

Luka 9 - Alur bible

Luka 9

¹Elwong’o juapar wi ario karacelo, emio igi tego ku ng’ol wi pajogi ceke, man kum keyo tho m’unyang’ i kum,

²Man eorogi gici giyer pi ker pa Mungu, man gikei kum ju ma kumgi lith.

³Man ewacu igi kumae, Kud wuting’ gin moko mi woth mu, kadok uluth, kadi gbethe, kadi kwen, kadi sente; kadok jabia ario de kud wubed kudo.

⁴Man ot ma tek wumondo i ie, wubed keca, man wuai keca de wucidhi.

⁵Dhanu ceke m’ujolowu ngo, ka wuai ku i adhura maeni, wukir utur woko kud i tiendwu ni lembatuca igi.

⁶E giai, gicidho ku ba pacu, ku yero lembanyong’a ma juboth ko, ku keyo kum i kaka ceke.

⁷Nie Herode ma jabim uwinjo pi gin ceke m’utimbre: e cwinye ng’abre, kum dhanu moko wacu nia Yohana cer ku kind ju m’utho;

⁸man jumoko ke, nia Elia wok en; jumange ke, nia ng’atu acel ma kind jubila ma con ucer kendo.

⁹E Herode wacu kumae, Yohana athumo wie: ento maeni ng’a, m’a winjo gin ma calu maeni pire? Man eyenyo enene.

¹⁰Ka jukwenda gidok, giyero ire gin ceke ma gitimo. Man ecokogi, ecoro kugi cen i adhura ma julwong’o Bethsaida.

¹¹Ento udul dhanu m’ung’eyo maeni gilubo ng’eye: man ejologi, eyero igi de pi ker pa Mungu, man ekeyo kum ju ma can keyo kum unegogi.

¹²Ceng’ udoko reto ma ng’ic; e juapar wi ario gibino, giwacu ire kumae, Lal udul dhanu woko, kara gicidh i pacu ma ceng’ni kud i thim de, gigonj, ginwang’ cam de: kum ka ma wani i ie e ng’om ngele.

¹³Ento ewacu igi kumae, Wumi igi gicam. E giwacu kumae, Wabedo ku lungu kwen abic kende ku rec ario tek wakuciwang’iewo cemo ngo mir udul dhanu maeni ceke.

¹⁴Kum jumaco giyenyo romo rubanga abic. Ewacu ni julubne kumae, Wuketh gibed piny ni thek ni thek, thek acel calu pier abic.

¹⁵Gitimo kumeno de, giketho gibedo piny ceke.

¹⁶Eting’o lungu kwen abic ku rec ario de, eneno malu i polo, man emio mugisa i wigi, eng’weko ie de: emio ba julubne giketh i wang’ udul dhanu.

¹⁷E gicamu, kagi ceke de giyeng’: jucoko dong’ kodine m’udong’ katoko apar wi ario.

¹⁸Man etimbre, kan eberwo’katung’, julubne de ni i bang’e: man epenjogi, ewacu kumae, Udul dhanu giwacu nia an a ng’a?

¹⁹Giloko lembe giwacu kumae, Yohana ma Jabaputisi; jumange ke, Elia; jumange ke, nia ng’atu acel ma kind jubila ma con ucer en.

²⁰Man ewacu igi kumae, Ento wun ke wuwacu nia an a ng’a? E Petro loko lembe ewacu kumae, In i Kristu pa Mungu.

²¹Ento ejukogi, eng’olo igi lembe nia ku giyer maeni ni ng’atu moko;

²²ewacu kumae, Wod dhanu bikosendre ku gin dupa be, judongo ku julam ma dongo ku jugorcik gibikwere, man jubinege, man i ceng’ mir adege ebicer.

²³Man ewacu igi ceke kumae, Tek ng’atu moko yenyo elub ng’eya, dong’ ekwere gire, eting’ yen m’athara pare ku ba rupiny ku ba rupiny, elub ng’eya.

²⁴Kum ng’atu ma tek uyenyo ebodh kwo pare ebirwinye; ento ng’atu ma tek birwinyo kwo pare pira, e ng’atuni bibodhe.

²⁵Kum kuloka ang’o ni ng’atu moko, tek enwang’u kuloka ma ng’om bo, ma en ke erwinjre gire?

²⁶Kum ng’atu ma tek lewic binege i kuma kum lembe para de, Wod dhanu de lewic binege i kume, kan ebino i dwong’ pare, ku dwong’ pa Wego, ku mi malaika maleng’.

²⁷Ento ayero iwu mandha kumae, Kind ju m’ucungo kakeni, moko bibilo tho ki ngo, ma fo gikuneno ker pa Mungu ngo.

²⁸Man etimbre yo ng’ei lembe maeni calu ceng’ abora, nia ecoko Petro ku Yohana man Yakobo, e gicidho kugi wi got nirwo.

²⁹Kinde m’eberwo, ayi wang’e lokre tung’, kendi pare de doko tar erieny de.

³⁰Man nen dhanu ario giweco gikude, dhanune Musa gikud Elia;

³¹ma giwok i dwong’, giyero de pi tho pare m’ebitimo kakare i Yerusalem.

³²Nie Petro giku ju ma ginuti gikugi nindo benurogi: ento ka giceu terere, gineno dwong’ pare ma dhe, ku juario ma gicungo gikugi.

³³Man etimbre, kinde ma gibeweke, nia Petro wacu ni Yesu kumae, Japonji, e ber iwa kum wanuti keni: dong’ wajiu otbak adek; acel iri, acel ni Musa, acel ke ni Elia: man eng’eyo ngo gin m’eyero.

³⁴Kinde m’ebeyero lem maeni, afuru bino, uketho tipo i wigi: lworo de negogi ka gimondo i afuru.

³⁵Dwal de ai i afuru m’uwacu kumae, Maeni Woda, ng’atu m’agoyo wie: wuwinje.

³⁶E ka dwal uwok, ginwang’u Yesu dong’ kende. E giling’, man giyero ni ng’atu moko ngo i ceng’ maeno gin moko mi gin ma gineno.

³⁷Man etimbre, urwone, ka giloro got, udul dhanu ma dit girombo kude.

³⁸Man nen, ng’atu acel m’uai bang’ udul dhanu kok akoka, ewacu kumae, Japonji, akwei inen kum woda; kum en e nyathin para kulong’:

³⁹man nen, tipo make, man ekok pio pio; emielo kume eketho voyo dhure, man eweke pio pio ngo, m’ebewanyu kume rac.

⁴⁰E akwayu julubni ya giwodhe woko: man gicopo ngo.

⁴¹E Yesu dwoko lembe ewacu kumae, E dhanum’utuk m’umbe yioyic ma wu juco, abibedo kudu rokani, m’atwio ko cwinya i kumwu? kel wodi keni.

⁴²Kan ebino de, pajogi redhe piny, man emielo kume kr kr. Ento Yesu juko tipo m’ucido, man ekeyo kum nyathin ma nicone, edwoke de ni won.

⁴³E kagi ceke igi wang’ lii kum dwong’ pa Mungu. Ento ka i dhanu ceke wang’ lii kum gin ceke m’etimo, ewacu ni julubne kumae,

⁴⁴Wek lembe mae unyang’ i ithwu: kum Wod dhanu jubimie i cing’ dhanu.

⁴⁵Ento ging’eyo thelembe mae ngo, emungre igi, kara ku ging’eye; e lworo penje kum lembe maeni makugi.

⁴⁶E piem uwok i kindgi, nia ng’a ma dit ma sagu i kindgi.

⁴⁷Ento ka Yesu ng’eyo piem mir adundegi, egamu nyathin ma nok, ekethe de i ng’ete,

⁴⁸man ewacu igi kumae, Ng’atu ma tek bijolo nyathin ma nyanok maeni i nyinga nwang’u ejolo an: man ng’atu ma tek bijolo an nwang’u ejolo ng’atu m’uora: kum ng’atu ma nyathigi i kindwu ceke, ng’atuno en e dit.

⁴⁹Yohana loko lembe man ewacu kumae, Japonji, waneno ng’atu acel ubewodho pajogi ku nyingi; e wakwere, kum elubo ngo wakugi.

⁵⁰Ento Yesu wacu ire kumae, Kud wukwere; kum ng’atu ma jadhogwu ngo en e jabeng’wu.

⁵¹Man etimbre, ka ceng’ ma jubijole ie malu dhingo, eketho wang’e ngili ngili kum eidho Yerusalem, man eoro jukwenda i wang’e:

⁵²e gicidho, man gimondo i pacu mi Jusamaria, kara giyik kaka ire.

⁵³Gijole de ngo, kum wang’e bedo calu ebecidho Yerusalem.

⁵⁴Ka julubne Yakobo ku Yohana gineno maeni, giwacu kumae, Rwoth, iyenyo walwong’ mac uai i polo lor piny, uwang’gi?

⁵⁵Ento elokre, man ejukogi.

⁵⁶E gicidho i pacu mange.

⁵⁷Ka gicidho i yo, ng’atu acel uwacu ire kumae, Abilubo ng’ei ka ma ibicidho i ie ceke.

⁵⁸Yesu wacu ire kumae, Kaki bedo ku odng’om, winyo m’i kor polo de bedo ku odgi; ento Wod dhanu bedo ku ka m’ejeng ie wie de ngo.

⁵⁹Ewacu ni ng’atu mange kumae, Lub ng’eya. Ento ewacu kumae, Rwoth, wek alar acidh ayik vwa.

⁶⁰Ento ewacu ire kumae, Wek ju m’utho gikuny ju m’utho migi; ento cidh iyer pi ker pa Mungu mba mba.

⁶¹Ng’atu mange bende wacu kumae, Abilubo ng’ei, Rwoth; ento wek alar amoth ju ma ni i ot para.

⁶²Ento Yesu wacu ire kumae, Ng’atu moko mbe, m’uromo ku ker pa Mungu, ma ketho cinge kum kwejdhiang’, man eneno ng’eye.