Read Alur Poi Mi Cik 1 Bible Online

Poi Mi Cik 1 - Alur bible

Poi Mi Cik 1

¹Maeni en e lembe ma Musa yero ni Israel ceke loka Yordan i langa, i Araba ma i wang’ Suf, i die Paran, ku Tofel, man Laban, ku Hazeroth, man Dizahab.

²En e woth mi ceng’ apar wi acel ugambre Horeb yo ba got Seir utundo kum Kadec-barnea.

³Man etimbre i rundi pier ang’wende, i dwi apar wi acende, i ceng’ ma kwong’ane mi dwije, nia Musa yero ni nyithindho mir Israel, calku gin ceke ma Yehova mio ire ku lembang’ola igi;

⁴yo ng’ei m’egoyo Sihon m’ubimo mi Juamori, m’ubedo i Hecbon, ku Og m’ubimo mi Bacan, m’ubedo i Actaroth, i Edrei.

⁵Musa maku yero cik maeni loka Yordan, i ng’om Moab, ewacu kumae,

⁶Yehova Mungu mwa yero iwa i Horeb, ewacu kumae, Wubedo i got maeni romo:

⁷wulokru, man wutug woth, wucidh de i ng’om gudi mi Juamori, man i ka ceke ma cok ku keca, i Araba, i ng’om gudi, man i poga, man yor ariwa ma piny, ku dhu nam, man ng’om mi Jukanani, ku Lebanon, cik i kulo ma dit, ma en e kulo Frati.

⁸Nen, aketho ng’om i weng’wu: wumond wumwony ng’om ma Yehova kwong’o ni kwaruwu, ni Ibrahim, ni Isak, man ni Yakobo, ya emi igi man ni kodhigi yo ng’eigi.

⁹E ayero iwu i nindo maeca, awacu kumae, Acopo yeyowu gira a kenda ngo:

¹⁰Yehova Mungu mu medowu, man, nen, tinuni wu calu cero m’i polo ni udul.

¹¹Yehova, Mungu mi kwaruwu, umedwu bang’ rubanga m’usagu kawono, man emi mugisa iwu, calu eng’olo iwu!

¹²An a kenda gira acopo yeyo adieng’acwiny mu nenedi, ku ter mu, ku piem mu?

¹³Wugam dhanu ma riek, m’ung’eyo thelembe, ma jung’eyogi, calku suru mu, man abikethogi ni judongo i wiwu.

¹⁴E wuloko lembe ira, wuwacu de kumae, Gin m’iyero iwa e ber iwa watim.

¹⁵Kum kumeno agamu judongo mi suru mu, dhanu ma riek, ma jung’eyo de, man akethogi ni judongo i wiwu, jego mi rubanga, man jego mi dak, man jego mi pier abic, man jego mir apar, man juwitic, calku suru mu.

¹⁶Man ang’olo ni jupoklembe mu i nindo maeca, awacu kumae, Wuwinj lembe ma i kind utumegwu, man wupok lembe pwe i kind dhanu ku wadi, kud umondo ma ni kude.

¹⁷Kud wunen dhanu tung’ tung’ i pokolembe; wuwinj ju ma nok ku ju ma dwong’ calacel; kud wulwor wang’ dhanu; kum pokolembe en e pa Mungu: man lembe ma tek m’uloyowu wukel i bang’a, e abiwinje.

¹⁸Man ang’olo iwu i nindo maeca gin ceke ma maku wutim.

¹⁹Man wawotho ugambre Horeb, e wakadhu kud i langa ma dit maeca ceke ma ng’oyo ndiri ma wuneno, ku yo ba ng’om gudi mi Juamori, calu Yehova Mungu mwa ng’olo iwa; e wawok Kadecbarnea.

²⁰Man awacu iwu kumae, Wuwok ba ng’om gudi mi Juamori, ma Yehova Mungu mwa mio iwa.

²¹Nen, Yehova Mungu peri ketho ng’om i weng’i; idh malu, e imwony, calu Yehova, Mungu pa kwaru, uyero iri; lworo kud unegi, kadok cwinyi de kud ung’abre.

²²E wun ceke wucoro ceng’ni an kubeng’wu kubeng’wu, e wuwacu kumae, Wek waor dhanu i wang’wa, kara gikeng ng’om iwa, man gikel iwa lembe kendo mi yo ma waidh ko be, kud adhura ma wabicidho i ie.

²³E lembene maku wang’a; e agamu dhanu apar wi ario m’i kindwu, ku ba suru ku ba suru ng’atu acel:

²⁴e gilokri man giidho i ng’om gudi, man giwok i poga Eckol, e gilibe.

²⁵Man gigamu kum nying’ piny m’i ng’ombe i cing’gi, e gikele piny i bang’wa, man gidwoko lembe iwa kendo, giwacu de kumae, En e ng’om ma ber ma Yehova Mungu mwa mio iwa.

²⁶Ento wuyio ngo wuidhi, ento wujai kum lembang’ola pa Yehova Mungu mu:

²⁷e wung’ur i hema mu, man wuwacu kumae, Kum Yehova daguwa, ketho ewodhowa woko kud i ng’om Misiri, kara emiwa i cing’ Juamori, ginyothwa.

²⁸Waidh kani? utumegwa ng’oyo ndiri i cwinywa, giwacu kumae, Dhanune gi dit man gi boco ma saguwa; adhurane gi dit man gitwodri cil i polo; man ke waneno Juanaki kuca.

²⁹Alund awacu iwu kumae, Cwinywu kud udieng’, kadok lworo de kud unegwu i kumgi.

³⁰Yehova Mungu mu m’ucidho i weng’wu, ebikiedo piwu, calku gin ceke m’etimo iwu i Misiri i weng’wu,

³¹man i langa, ka m’ineno ie maram Yehova Mungu peri ting’i ko, calu dhanu ting’o wode, i yo ceke ma wucidho i ie, maram watundo ko kakeni.

³²Ento i gin maeni wuyio Yehova Mungu mu ngo,

³³m’ucidho i weng’wu i yo, kara eyeny iwu ka ma wugur ie hema mu, i mac ku diewor, kara enyuth iwu yo ma kani ma wucidh i ie, man i afuru ku dieceng’.

³⁴E Yehova winjo dwal mi lembe mu, e kwinyo nege, man ekwong’o, ewacu kumae,

³⁵Andha ng’atu acel de mbe i kind dhanu maeni mi dhanum’utuk maeni ma rac ma bineno ng’om maeca ma ber, m’akwong’o ya ami ni kwaruwu,

³⁶ndhu Kaleb ma wod Yefune; ebinene; man abimio ng’om m’enyono ire, man ni nyithindhe, kum elubo Yehova ku cwinye ceke.

³⁷Ng’ecwiny unego Yehova bende i kuma ni kumwu, ewacu kumae, In bende ibimondo kuca ngo;

³⁸Yocuwa ma wod Nun, m’ucungo i weng’i, ebimondo kuca; dwok cwinye tek; kum ebiketho Israel ugame ni aba.

³⁹Man ke nyithindho mu ma thindho, ma wuwacu bibedo ni amaci, man nyithindho mu, ma ceng’ maeni ng’eyong’ec umbe kugi mi gin ma ber kadi gin ma rac, gibimondo kuca, e abimie igi, man gibimwonye.

⁴⁰Ento wun, wulokru, man wutug woth mu i langa yo ba Nam Makwar.

⁴¹Wulund wuloko lembe man wuwacu ira kumae, Wadubo ni Yehova, wabiidho man wabikiedo, calku gin ceke ma Yehova Mungu mwa ng’olo iwa. E kewu ceke ng’atuman utwio jamtho pare mir ali i kume, e wutimo pio wuidho i ng’om gudi.

⁴²Man Yehova wacu ira kumae, Wac igi kumae, Kud wuidhi, kadok akieda de; kum ani i kindwu ngo; wumaru goiru i wang’judegiwu.

⁴³Kum kumeno ayero iwu, man wuwinjo ngo; ento wujai kum lembang’ola pa Yehova, man wutingru, e wuidho i ng’om gudi.

⁴⁴Man Juamori, m’ubedo i ng’om gudi maeca, gicori i wiwu, man giriemowu, calu kic timo, e gigoyowu piny i Seir, cil kum Horma.

⁴⁵E wudwogo wuywak de i wang’ Yehova; ento Yehova winjo dwendwu ngo, kadi ithe de eciko iwu ngo.

⁴⁶Kum kumeno wubedo i Kadec nindo dupa, calku nindo ma wubedo kuca.