Read Alur Poi Mi Cik 10 Bible Online

Poi Mi Cik 10 - Alur bible

Poi Mi Cik 10

¹I nindo maeca Yehova wacu ira kumae, Pai bankidi ario iri Calu ma kwong’a, man iidh malu i bang’a wi got, man itim iri sanduk mi yen.

²E abikiewo lembe wi bankidine ma ni wi bankidi ma kwong’ane m’ituro, e ibikethogi i sandukne.

³Kum kumeno atimo sanduk mi yendulu, man apayu ban mi kidi ario calu ma kwong’a, e aidho malu wi got m’abedo ku ban ario i cinga.

⁴Man ekiewo wi bande, calku gor ma kwong’ane, lembang’ola apar, ma Yehova yero iwu wi got kud i die mac i nindo mi cokri; e Yehova miogi ira.

⁵E alokra man aloro piny ku wi got, man aketho banne i sanduk m’atimo; e ginuti keca calu Yehova ciko ira.

⁶(Man nyithindho mir Israel giwotho ugambre Beroth Bene-yakan utundo Mozera. E Harun utho kuca, man juyike kuca: man Eleazar ma wode timo tim i tic ma pa jalam kakare.

⁷Ugambre kuca giwotho cil kum Gudgoda; man ugambre Gudgcda utundo Yotbatha, ng’om mi kulo mi pi.

⁸I nindo maeca Yehova koyo suru pa Lawi, karauyei sanduk mi lembariba pa Yehova kara ucung i wang’ Yehova nitimo tim ire, man nimio mugisa ku nyinge, cil tin.

⁹Kum kumeno Lawi bedo ku makapiny ungo kadi aba de ungo i kind utumin mire; Yehova en e aba pare, calu Yehova Mungu peri yero ire.)

¹⁰Man abedo wi got, calu nindo ma kwong’a, Ceng’ pier ang’wen ku diewor pier ang’wen; e Yehova winjo dwanda i nindo maeca bende; Yehova yenyo ngo enyothi.

¹¹E Yehova wacu ira kumae, Ai, tug woth peri i wang’ dhanu; e gibimondo man gibimwonyo ng’om, m’ang’olo ni kwarugi ya ami igi.

¹²E kawono, Israel, Yehova Mungu peri lwong’o ang’o i beng’i, ndhu lworo Yehova Mungu peri, kara iwoth i yo pare ceke, man nia imare, man nia itim ni Yehova Mungu peri kud adundeni ceke man ku ng’eyong’ec peri ceke,

¹³ku gwoko lembang’ola pa Yehova, ku dk pare, m’ang’olo iri tin mi bedober peri?

¹⁴Nen, polo man polo m’i polo, ku ng’om, ku gin ceke ma ni i ie, en e pa Yehova Mungu peri.

¹⁵Ento anyong’a nego Yehova ni kum kwaru ketho emarugi, man egoyo wi kodhigi yo ng’eigi, en e wun ma sagu kodhidhanu ceke, calu tinuni.

¹⁶Ka kumeno tim yaa kum dendkumwu mir adundewu, man kud wucik ng’utwu kendo.

¹⁷Kum Yehova Mungu mu, en e Mungu mi mungu, man Rwoth mi rwodhi, Mungu ma dwong’, ma jatego, man jang’oindiri, ma lworo wang’ dhanu ngo, kadi ma gamu jambng’om de ngo.

¹⁸Etimo pokolembe ni kic ku dhaku ma cware tho, man emaru umondo, ku mio cam ku kendi ire.

¹⁹Ka kumeno wumar umondo; kum naka wun umondo i ng’om Misiri.

²⁰Lwor Yehova Mungu peri; tim ire, mok i kume, man ikwong’ ku nyinge.

²¹En e pak peri, man en e Mungu peri, m’utimo iri gin maeni ma dit ma ng’oyo ndiri de, ma weng’i Aeno.

²²Kwaru loro piny i Misiri giku dhanu pier abiro; e kawono Yehova Mungu peri ketho idok calu cero m’i polo ni udul.