Read Alur Poi Mi Cik 11 Bible Online

Poi Mi Cik 11 - Alur bible

Poi Mi Cik 11

¹Ka kumeno mar Yehova Mungu peri, man igwok kur pare, ku cik pare, man lembapoka pare, ku lembang’ola pare thiri thiri.

²Man wung’ei tin: kum aweco ngo ku nyithindho mu m’ung’eyo ngo, man m’uneno ponji pa Yehova Mungu mu ngo, ku dwong’ pare, man cinge ma tek, ku bote m’arieya,

³ku giranyutha pare, man tic pare, m’etimo i kind Misiri kum Farao m’ubimo mi Misiri man kum ng’om pare ceke;

⁴ku gin m’etimo kum njuru asikari mi Misiri, kum riuni migi, man kum magali migi: maram eketho ko pi mi Nam Makwar uumogi kinde ma gilubo tokwu man maram Yehova nyotho kogi cil tin:

⁵man gin m’etimo i kumwu i langa, maram wutundo ko kakeni;

⁶ku gin m’etimo kum Dathan kud Abiram, wot Aliab, ma wod Ruben; maram ng’om ung’amu ko dhoge, man emwonyogi, ku juudigi, ku hema migi, ku gin ceke ma kwo kubang’gi kubang’gi m’ulubo ng’eigi, i kind Israel ceke:

⁷ento weng’wu neno tic ma dwong’ ceke pa Yehova m’etimo.

⁸Ka kumeno wugwok lembang’ola ceke m’ang’olo iri tin, kara wubed tek, man wumond wumwony ng’om, ka ma wukadhu kara wumwonye;

⁹man kara wuketh nindo mu ton hai i ng’om, ma Yehova kwong’o ni kwaruwu ya emi igi man ni kodhigi, ng’om ma molo cak ku kic.

¹⁰Kum ng’om, ka m’imondo i ie kara imwonye, en e calu ng’om Misiri ngo, ma wuai i ie, ka m’icoyo ie kodhi peri, m’ikwoyo wie pi de ku tiendi, calu podho mir uboko mi dek;

¹¹ento ng’om, ka ma wukadhu kara wumwonye, en e ng’om mir ungulu gudi ku poga, man emadhu pi mi koth m’i polo,

¹²ng’om ma Yehova Mungu peri gwoko: wang’ Yehova Mungu peri ni i wie thiri thiri, ugambre i thekri mi rundi cil kum kajik mi rundi.

¹³Man ebitimbre, tek wubiwinjo cu ba lembang’ola para m’ang’olo iwu tin, kara wumar Yehova Mungu mu, man wutim ire kud adundewu ceke man ku ng’eyong’ec mu ceke,

¹⁴nia abimio koth mi ng’om mu i nindone, koth ma kwong’a man koth ma cen, kara icok cam peri i ie, ku pigulok peri ma nyasa, ku mo peri.

¹⁵Man abimio lum i pothi peri ni lim peri, e ibicamu man ibiyeng’.

¹⁶Wukuru giwu, adundewu maru wondre, man wukier, wutim ni mungu mange de, man wurwo igi;

¹⁷e ng’ecwiny pa Yehova maru opo i wiwu, man emaru ketho polo kang’, ketho koth ubed umbe, e ng’om de maru cego nyinge ngo; man wumaru nyothru pio kud i ng’om ma ber ma Yehova mio iwu.

¹⁸Ka kumeno wukan lembe para maeni i adundewu man i ng’eyong’ec mu; man wutwigi ni giranyutha i cingwu, man gibibedo ni giratwia ter nyimwu.

¹⁹Man wuponj nyithindho mu ku lembene, ma wubeweco pigi, kinde m’ibedo i ot peri, man kinde m’iwotho i yo, kinde m’ivuto piny de, man kinde m’iai malu.

²⁰Man igorgi wi mbegi mi dhugola ot peri man wi dhugang’ peri;

²¹kara nindo peri medre, ku nindo mi nyithindho peri, i ng’om ma Yehova kwong’o ni kwaru ya emi igi, calu nindo mi polo wi ng’om.

²²Kum tek wu gwoko lembang’ola maeni ceke cu m’ang’olo iwu, kara wutime, kara wumar Yehova Mungu mu, kara wuwoth i yo pare ceke, man kara wumok i kume de;

²³e Yehova biriemo thek maeni ceke kud i weng’wu, man wubiyaku thek ma dit ma tek de ma sagu wun.

²⁴Ka ceke ma die tiendwu binyono bibedo mu kubang’e kubang’e: ugambre i langa, man Lebanon, ugambre kulo, en e kulo Frati, kieu mu bibedo cil kum nam ma yo reto.

²⁵Ng’atu moko mbe ma bicopo cungo i weng’wu: Yehova Mungu mu biketho lworo wu man ndiri wu wi ng’om ceke ma wunyono, calu eyero iwu.

²⁶Nen, aketho mugisa ku kwong’ i weng’wu tin:

²⁷mugisa, tek wuwinjo lembang’ola pa Yehova Mungu mu, m’ang’olo iwu tin;

²⁸man kwong’, tek wubiwinjo lembang’ola pa Yehova Mungu mu ngo, ento wukier cen kud i yo m’ang’olo iwu tin, kara wulub tok mungu mange, ma wung’eyo ngo.

²⁹Man ebitimbre, kinde ma Yehova Mungu peri biroi i ng’Om ka m’icidho i ie nimwonye, nia ibiketho mugisa wi got Gerizim, man kwong’ wi got Ebal.

³⁰Gini loka Yordan ungo, i ng’ei yo mi mwony ceng’ i ng’om mi Jukanani m’ubedo i Araba, yo ba Gilgal, i ng’et bongu mi More?

³¹Kum wubikadhu loka Yordan kara wumwony ng’om ma Yehova Mungu mu mio iwu, e wubimwonye, man wubibedo i ie.

³²Man wuketh cwinywu kum timo cik ku lembapoka ceke m’aketho i weng’wu tin.