Read Alur Poi Mi Cik 12 Bible Online

Poi Mi Cik 12 - Alur bible

Poi Mi Cik 12

¹Maeni cik ku lembapoka ma wuketh cwinywu i kume nitimo i ng’om ma Yehova, Mungu pa kwaru, umio iri kara imwonye, nindo ceke ma wubedo ie kwo wi ng’om.

²Wunyoth ka ceke andha ma thek ma wubiyaku timo ie ni mungu migi, wi gudi ma wiu, man wi ungulu gudi, man the yen m’uluk kubang’e kubang’e:

³man wurung pe mblam migi, wutur mbegi migi de nziki nziki, man wuwang’ mungu m’araga migi ku mac; man wutong’ ayi m’acwia m’ang’ika mi mungu migi; man wunyoth nying’gi ku kakeca.

⁴Kud wutim kumeno kum Yehova Mungu mu.

⁵Ento ka ma Yehova Mungu mu bigoyo wie kud i suru mu ceke, kara eketh nyinge keca, wuyeny cil ba kabedo pare, man icidh keca;

⁶man wuter lam m’awang’a mu, ku lam mu, kud apaje mu, ku lam m’ating’a mi cingwu, ku lembang’ola mu, man lam ma ku berocwiny mu, ku kayu mi dhok mu man mir udul rombe mu:

⁷e wucam keca i wang’ Yehova Mungu mu, e anyong’a negwu kum gin ceke ma wuketho cingwu i kume, wun ku juudiwu, ma Yehova Mungu peri mio mugisa iri i ie.

⁸Kud wutim calu gin ceke ma watimo keni tin, ku ba dhanu ku ba dhanu gin ma tek ubedo atira i wang’e gire;

⁹kum fodi wutundo ngo ba yom man bang’ aba, ma Yehova Mungu peri mio iri.

¹⁰Ento kinde ma wukadhu Yordan, man wubedo i ng’om ma Yehova Mungu mu ketho wugamu ni aba, man emio iwu yom ni judegiwu m’utiekowu gbur, ketho wubedo museme;

¹¹ebilund timbre nia i ka ma Yehova Mungu mu bigoyo wie, kara eketh nyinge bed keca, e wuter gin ceke m’ang’olo iwu keca: lam m’awang’a mu, ku lam mu, man apaje mu, ku lam m’ating’a mi cingwu, ku lembang’ola mu ceke ma ber m’usagu ma wung’olo ni Yehova.

¹²Man anyong’a negwu i wang’ Yehova Mungu mu, wun, ku wotwu, ku nyigwu, man jumiru mu, ku bong’ mu, man Jalawi ma ni i dhugang’ mu, kum makapiny pare mbe kadok aba de mbe karacelo kudu.

¹³Kun giri kara kud ithier lam m’awang’a peri i ka ceke kubang’e kubang’e m’ineno;

¹⁴ento i ka ma Yehova bigoyo wie i kind suru peri acel, thier lam m’awabg’a peri keca, man itim gin ceke m’ang’olo iri keca.

¹⁵Ento, icopo nego ring’o man icam de yo i dhugang’ peri ceke, calku yeny ma ng’eyong’ec peri yenyo ceke, calku mugisa pa Yehova Mungu peri m’emio iri: ju m’ucido ku ju ma leng’ gicopo camu kume, calu mi kasuku, man calu mi ruda.

¹⁶Ento kud wucam rimo; wuoye woko wi ng’om calu pi.

¹⁷Kud icam kum apaje mi cam peri i dhugang’ peri, kadi kum pigulok peri ma nyasa, kadi kum mo peri, kadi kum kayu mi dhok peri, kadi mir udul rombe peri, kadi kum lembang’ola peri ceke m’ing’olo, kadi girathiera peri ma ku berocwiny, kadi lam m’ating’a mi cingi;

¹⁸ento camgi i Wang’ Yehova Mungu peri i ka ma Yehova Mungu peri goyo wie, in, ku wodi, man nyeri, ku jamiru peri, man bong’ peri, ku Jalawi ma yo i dhugang’ peri: man anyong’a negi i wang’ Yehova Mungu peri pi gin ceke m’iketho cingi i kume.

¹⁹Kuri giri kara kud ikun Jalawi cil i nindo ceke m’ibedo ie kwo i ng’om peri.

²⁰Kinde ma Yehova Mungu peri bimedo kieu peri, calu eng’olo iri, man ibiwacu kumae, Abicamu ring’o, kum cwinyi yenyo icam ring’o; icopo camu ring’o, calu yeny ceke ma cwinyi yenyo.

²¹Tek ka ma Yehova Mungu peri bigoyo wie, kara eketh nyinge keca, ubedo bor iri m’usagu, ilund ineg kind dhok peri man kind udul rombe peri, ma Yehova mio iri, calu ang’olo iri; man icopo camu yo i dhugang’ peri, calu yeny ma cwinyi yenyo ceke.

²²Cil calu jucamu kasuku man calu jucamu ruda, cam kume kumeca: ju m’ucido man ju ma leng’ de copo camu kume calacel.

²³Ndhu ng’ei andha nia kud icam rimo: kum rimo en e kwo; man kud icam kwo karacelo ku ring’o.

²⁴Kud icame; oye woko wi ng’om calu pi.

²⁵Kud icame; kara ibed ber, ku nyithindho peri yo ng’ei, kinde m’itimo gin m’ubedo pwe i wang’ Yehova.

²⁶Ndhu gin ma leng’ peri m’ibedo ko, ku lembang’ola peri, igam, man icidh i ka ma Yehova bigoyo wie;

²⁷man ithier lam m’awang’a peri, ring’o ku rimo, wi pemblam pa Yehova Mungu peri; man jubikonjo rimo mi lam peri wi pemblam pa Yehova Mungu peri: ringe ke icam.

²⁸Iwinji man iketh cwinyi kum lembe maeni ceke m’ang’olo iri, kara ibed ber ku nyithindho peri yo ng’ei mi nja, kinde m’itimo gin ma ber ma pwe de i wang’ Yehova Mungu peri.

²⁹Kinde ma Yehova Mungu peri bikabu thek kud i weng’i, ka m’imondo i ie kara iyakgi, man iyakugi, e ibedo i ng’om migi;

³⁰dong’ ikuri giri kara kud ibed amaka i uwic mi lubo tokgi, yo ng’ei nyoth ma ginyothri ko i weng’i; man kara kud ipenj tok mungu migi, iwac kumae, Thek maeni gitimo ni mungu migi nenedi? kara an bende atim kumeca.

³¹Kud itim kumeca kum Yehova Mungu peri: kum ku ba gin ceke ma ginmajudagu ni Yehova, m’edagu, gitimo ni mungu migi; kum cil wotgi ku nyiggi giwang’u ku mac ni mungu migi.

³²Gin ceke ma tek ang’olo iwu, wuketh cwiny wu mi time: kud imed kume, kadi kud ikab kume.