Read Alur Poi Mi Cik 13 Bible Online

Poi Mi Cik 13 - Alur bible

Poi Mi Cik 13

¹Tek jabila wok i kindi, kadi jalek lek, man emio iri giranyutha, kadi musana,

²e giranyuthane kadi musanane timbre, m’eyero iri pire, ewacu kumae, Wek walubu tok mungu mange, m’ing’eyo ngo, man wek watimu igi;

³kud iwinj lembe pa jabilane, kadi pa jalek lek de: kum Yehova Mungu mu mulo iwu, kara eng’ei tek wumaru Yehova Mungu mu ku cwinywu ceke man ku ng’eyong’ec mu ceke.

⁴Wulub tok Yehova Mungu mu, man wulwore, wugwok lembang’ola pare de, man wuwor dwande, wutim ire de, man wumok i kume.

⁵E jabila maeno, kadi jalek lek maeno, jubinege, kum eyero lembjai kum Yehova Mungu mu, m’uwodhowu kud i ng’om Misiri, m’uweri de kud i ot mi ng’eca, kara eteli cen kud i yo ma Yehova Mungu peri ng’olo iri iwoth i ie. Keth dubone cen kud i kindi kumeno.

⁶Tek umeru, ma wod meru, kadi wodi, kadi nyeri, kadi dhaku m’i kori, kadi jarimbi, m’ubedo calu ng’eyong’ec peri ma dhe, ubidhi lwe lwe, ewacu kumae, Wek wacidh watim ni mungu mange, ma fodi ing’eyo ngo, in, kadi kwaru;

⁷kind mungu mi kodhidhanu m’utieki gbur, ma ceng’ni in, kadi bor kudi, ugambre i kajik acel mi ng’om cil kum kajik mucelo mi ng’om:

⁸kud iyi ire, kadi kud iwinje; kadok ngisi de kud uneg weng’i i kume, kadi kud ikwer mie, kadok akana de kud ikane:

⁹ento inege andha; ilar iketh cingi i kume m’inege ko, yo ku ng’eye ke cing’ dhanu ceke.

¹⁰Man icanye ku kidi etho, kum eponjo teli cen ku ba Yehova Mungu peri, m’uwodhi kud i ng’om Misiri, kud i ot mi ng’eca.

¹¹E Israel ceke biwinjo, man lworo binegogi, e gibitimo wadi dubo ma calu maeni kendo ngo i kindi.

¹²Tek iwinjo rwonglembe mir adhura peri acel, ma Yehova Mungu peri mio iri ibed keca, ma juwacu kumae,

¹³Jumoko ma rac uai i kindi, man gitelo ju m’ubedo i adhura migi cen, giwacu kumae, Wek waci watimu ni mungu mange, ma wung’eyo ngo;

¹⁴ilund ipenj, iyeny de, man ipenj cu; man, nen, tek en e andha, man ginde piembre ngo, nia wadi ginmajudagu timbre i kindi,

¹⁵igoi dhanu mir adhura maeno andha ku lak palamularu, m’inyothe ko kot, ku gin ceke ma ni i ie ku limne, ku lak palamularu.

¹⁶Man icok ayeki ceke i die gengine, man iwang’ adhurane ku mac, kud ayeki ceke kubang’e kubang’e pet, ni Yehova Mungu peri: man ebibedo ni udhuru mi nja; jubigome kendo ngo.

¹⁷Man gin moko mbe ma bimoko i cingi mi gin ma jukwong’o; kara Yehova lokre cen ni ng’ecwiny pare ma lake tek, man enyuth iri kisa, man ngisi nege i kumi, emedi de, calu ekwong’o ni kwaru;

¹⁸kinde m’iwinjo dwand Yehova Mungu peri, kara igwok lembang’ola pare ceke m’ang’olo iri tin, kara itim gin m’ubedo pwe i wang’ Yehova Mungu peri.