Read Alur Poi Mi Cik 14 Bible Online

Poi Mi Cik 14 - Alur bible

Poi Mi Cik 14

¹Wun wu nyithindho pa Yehova Mungu mu: kud wuthumbru giwu, kadi kud wuketh wiwu wang’ temyimwu pir avu.

²Kum in i thek ma leng’ ni Yehova Mungu peri, man Yehova goyo wii ibed thek ni piny pare gire, ma sagu kodhidhanu ceke ma ni i wang’ ng’om.

³Kud icam gin moko ma ginmajudagu.

⁴Maeni lim ma wucopo camu: koni dhiang’, man rombo, ku diel,

⁵man ruda, ku kasuku, man nyajwaya, man diel m’i thim, kud apol, man thil, ku diel ma wi gudi.

⁶Man lim kubang’e kubang’e ma tiende karu, man m’ubedo ku tiende m’ukaru ario, ma nyamu wei, i kind lim, maeno wucopo camu.

⁷Ento maeni kud wucam i kind ju ma nyamu wei, kadi i kind ju ma tiendgi karu: ngamia, kud afoyo, man uduka, kum ginyamu wei ento tiendgi karu ngo, gi leng’ iwu ngo.

⁸Man kul, kum tiende karu ento enyamu wei ungo, e leng’ iwu ngo: kud wucam kum ring’gi, man kud wumul ukporogi.

⁹Maeni wucopo camu i kind ju ma ni i pi ceke: gin ceke ma tek cwake kud apokane nuti wucopo camu;

¹⁰man gin ceke ma tek cwake kud apokane mbe kud wucam; e leng’ ungo iwu.

¹¹Wucopo camu kum winyo ma leng’ ceke.

¹²Ento maeni en e ju ma kud wucam kumgi: acur, man acuth kud ango,

¹³man kalawenge, kud acei, man ulwith ma calu kit wadi,

¹⁴man ngoro kubang’e kubang’e, ma calku kit wadi,

¹⁵man udo, kud abiba ma diewor, man awidha, kud abiba ma calu kit wadi,

¹⁶man tula ma nok, ku tula ma dit, man tula ma ju tunge,

¹⁷man mambatha, kud alungu, man mambatha ma tung’,

¹⁸man weli, man ugoro ma calu kit wadi, man ukok, kud ulic.

¹⁹Man gin ma lak ceke ma ju bombgi gi leng’ iwu ngo: gibedo mir acama ngo.

²⁰Wucopo camu kum winyo ma leng’ ceke.

²¹Kud wucam kum gin moko m’utho gire kende: icopo mie ni umondo ma ni yo i dhugang’ peri, kara ecame; kadi icopo loke ba jawirok: kum in i thek ma leng’ ni Yehova Mungu peri. Kud ited nyathi die! ku cag min.

²²Mi apaje mi nyai ceke mi kodhi peri, maeno m’uai i podho ku ba rundi ku ba rundi.

²³Man icam i wang’ Yehova Mungu peri, i ka m’ebigoyo wie, kara eketh nyinge bed keca, apaje mi cam peri, man mi pigulok peri ma nyasa, man mi mo peri, ku kayu mi dhok peri man mir udul rombe peri; kara imak ng’eyo lworo Yehova Mungu peri thiri thiri.

²⁴Man tek yo bedo bor m’usagu iri, ketho nia yeye loi, kum kakare ni bor iri m’usagu, ma Yehova Mungu peri bigoyo wie, kara eketh nyinge keca, kinde ma Yehova Mungu peri bimio mugisa iri;

²⁵ilund iloke ku sente, man iboi sentene i cingi, e icidh i ka ma Yehova Mungu peri bigoyo wie:

²⁶man ilok sentene ku gin ceke ma tek ng’eyong’ec peri yenyo, ku koni dhiang’, kadi ku rombe kadi ku pigulok, kadi ku gin m’amadha ma lake tek, kadi ku gin ceke ma tek ng’eyong’ec peri penjo i beng’i; man icam keca i wang’ Yehova Mungu peri, man anyong’a negi, in ku juodi.

²⁷Man Jalawi ma ni yo i dhugang’ peri, kud ikune; kum makapiny pare kadi aba de mbe karacelo kudi.

²⁸I kajik rundi adek kubang’e kubang’e iwodh apaje ceke mi nyai peri i rundi nino, man ikane yo i dhugang’ peri:

²⁹man Jalawi, kum makapiny pare kadi aba pare de mbe karacelo kudi, man umondo, ku kic, man dhaku ma cware tho, ma gini yo i dhugang’ peri, gibibino, man gibicamu gibiyeng’ de; kara Yehova Mungu peri mi mugisa iri i tic ceke mi cingi m’itimo.