Read Alur Poi Mi Cik 15 Bible Online

Poi Mi Cik 15 - Alur bible

Poi Mi Cik 15

¹I kajik mi rundi abiro kubang’e kubang’e itim gony.

²Man ayi gonyne bibedo kumeni: jumibanja kubang’gi kubang’gi ng’atuman biweko gin m’emio ni banja ni wadi; ebipide ngo ba wadi man bang’ umin mire: kum gony pa Yehova ng’ole.

³Ba jawirok icopo pide: ento gin ceke ma peri ma ni bang’ umeru gony cingi i kume.

⁴Ento jucan bibedo umbe kudi (kum Yehova bimio mugisa iri andha i ng’om ma Yehova Mungu peri mio iri ni aba kara imwonye),

⁵ndhu tek iwinjo dwand Yehova Mungu peri cu, m’iketho cwinyi kum timo lembang’ola maeni ceke m’ang’olo iri tin.

⁶Kum Yehova Mungu peri bimio mugisa iri, calu eng’olo iri: man ibimio banja ni thek dupa, ento kud igam banja; man ibibimo wi thek dupa, ento gibibimo wii ngo.

⁷Tek jacan ni kudi, en e kind utumeru acel, yo i dhugang’ peri moko i ng’om peri ma Yehova Mungu peri mio iri, kud idwok adundeni nwang’, kadi kud idol cingi ni umeru ma jacan;

⁸ento yab cingi ire andha, man imi ire banja andha m’urome mi can piny m’unege i gin ma ie yenyo.

⁹Dong’ ikuri nia pidoie ma rac kud ubed i adundeni, m’iwac ko kumae, Rundi mir abirone, rundi mi gony, ni ceng’ni; man weng’i bed rac i kum umeru ma jacan, man imie piny moko ngo; man eywak ba Yehova i kumi, e ebed ni dubo iri.

¹⁰Mi ire andha, can bidieng’o adundeni ngo kinde m’imio ire; kum Yehova Mungu peri bimio iri mugisa i tic peri ceke, man ku ba gin ceke m’iketho cingi i kume, kum gin maeni.

¹¹Kum jucan bibedo umbe ngo i ng’om: ka kumeno ang’olo iri, awacu kumae, Yab cingi ni umeru andha, ni juwundo peri, man ni jucan peri, i ng’om peri.

¹²Tek umeru, nico ma Jaebrania, kadi dhaku ma Nyaebrania, jung’iewo i beng’i, man gitimo iri rundi abusiel; e i rundi mir abirone iweke ai i beng’i agonya.

¹³Man kinde m’iweko eai i beng’i agonya, kud iyi eai ma cinge nanu:

¹⁴imi ire ku berocwiny kud i kind udul rombe peri, man ku wi lelacam peri, man kud i pany mir ulok peri; calu Yehova Mungu peri mio mugisa iri imi ire de kumeca.

¹⁵Man ipoi nia naka in i ng’eca i ng’om Misiri, man Yehova Mungu peri weri; ka kumeno ang’olo gin maeni iri tin.

¹⁶Man ebibedo, tek ewacu iri kumae, Abiai kud i beng’i ngo; kum emeri ku ot peri, kum ebedo ber i beng’i:

¹⁷ilund igam ndei, man ituc ithe plu kum dhugola, man ebibedo jamiru peri mi nja. Man itim ni bong’ peri bende kumeca.

¹⁸Ebibedo tek iri ngo, kinde m’iweke ai i beng’i agonya; kum etimo iri rundi abusiel m’uromo ku sukulia pa jatic mi sukulia wang’ ario: e Yehova Mungu peri bimio mugisa iri i gin ceke m’itimo.

¹⁹Kayu ma co ceke ma junyolo i kind dhok peri man i kind udul rombe peri idwok leng’ ni Yehova Mungu peri: kud itim tic moko ku kayu mi dhok peri kadi kud inyar yuk kayu mir udul rombe peri.

²⁰Came i wang’ Yehova Mungu peri ku ba rundi ku ba rundi i ka ma Yehova goyo wie, in ku juodi.

²¹Man tek ebedo ku mulima moko, calu ma tek e jarabala, kadi abinga, en e mulima ma rac ceke, kud ilame ni Yehova Mungu peri.

²²Came yor i dhugang’ peri: ju ma leng’ ungo ku ju ma leng’ de gibicame calacel, calu kasuku, man calu ruda.

²³Ndhu rimone kud icam; konje woko wi ng’om calu pi.