Read Alur Poi Mi Cik 16 Bible Online

Poi Mi Cik 16 - Alur bible

Poi Mi Cik 16

¹Kwir dwi Abib, man itim kadhukuwijo ni Yehova Mungu peri; kum i dwi Abib Yehova Mungu peri wodhi woko kud i Misiri ku diewor.

²Man ilam kadhukuwijo ni Yehova Mungu peri, kind udul rombe man kind dhok, i ka ma Yehova bigoyo wie, kara eketh nyinge bed keca.

³Kud icam kwen moko ma ie ju thobi kude; cam kwen ma thobi mbe i ie ceng’ abiro kude, en e kwen mi can; kum iai kud i ng’om Misiri ku ng’wec: kara ipoi kum ceng’ m’iai ie woko kud i ng’om Misiri nindo ceke mi kwo peri.

⁴Man ku junen thobi i beng’i i kieu peri ceke ceng’ abiro; kadok ring’o moko, m’ilamu ceng’ ma kwong’ane uthieno, udong’ diewor soro cil kugweno.

⁵Kud ilam kadhukuwijo yo i dhugang’ peri moko, ma Yehova Mungu peri mio iri:

⁶ento i ka ma Yehova Mungu peri bigoyo wie, kara eketh nyinge bed i ie, lam kadhukuwijo uthieno keca, kinde ma ceng’ upodho, i nindo m’iwok ie woko kud i Misiri.

⁷Man ivul icame de i ka ma Mungu peri goyo wie: e ilokri kugweno, man icidh ba hema peri.

⁸Cam kwen ma thobi mbe i ie ceng’ abusiel; man cokri ma leng’ bibedo i ceng’ mir abirone ni Yehova Mungu peri; kud itim tic moko i ie.

⁹Kwan iri yenga abiro: mak kwanu yenga abiro ugambre i nindo m’ikwong’o ketho ie pala kum cam ma wi tiende.

¹⁰Man itim agba mi yenga ni Yehova Mungu peri kud ajok mi girathiera ma ku berocwiny mi cingi, m’ibimio, calu Yehova Mungu peri mio iri mugisa:

¹¹man anyong’a negi i wang’ Yehova Mungu peri, in, ku wodi, ku nyeri, ku jamiru peri, man bong’ peri, ku Jalawi ma ni yo i dhugang’ peri, kud umondo, ku kic, man dhaku ma cware tho, ma gini i kindi, i ka ma Yehova Mungu peri bigoyo wie, kara eketh nyinge bed keca.

¹²Man ipoi nia naka in i ng’eca i Misiri: man keth cwinyi kum cik maeni itimgi de.

¹³Kwir agba mi otbak ceng’ abiro, yo ng’ei m’icoko kud i lelacam peri man kud i pany mi pigulok peri:

¹⁴man anyong’a negi kum agba peri, in, ku wodi, man nyeri, ku jamiru peri, man bong’ peri, ku Jalawi, man umondo, ku kic, man dhaku ma cware tho, ma gini i dhugang’ peri

¹⁵Kwir agba ceng’ abiro ni Yehova Mungu peri i ka ma Yehova bigoyo wie; kum. Yehova Mungu peri bimio mugisa iri i nyai peri ceke, man i tic mi cingi ceke, man anyong’a negi dwanya.

¹⁶Wang’ adek i rundi acel dhanu peri ma co ceke biwok i wang’ Yehova Mungu peri i ka m’ebigoyo wie: i agba mi kwen ma thobi mbe i ie, man i agba mi yenga, man i agba mi otbak; man ku giwok i wang’ Yehova ma cing’gi nanu:

¹⁷ku ba dhanu ku ba dhanu ng’atuman bimio calu ecopo, calku mugisa pa Yehova Mungu peri m’emio iri.

¹⁸Keth jupoklembe ku jego iri i dhugang’ peri ceke, ma Yehova Mungu peri mio iri, calku suru peri; man gibipoko lembe mi dhanu ku pokolembe ma pwe.

¹⁹Kud inyoth pokolembe: dhanu kud ubed tung’ tung’ i weng’i; kadi jambng’om de kud igam; kum jambng’om umo wang’ jurieko, man eloko lembe mi weg bedopwe.

²⁰Lub tok gin ma ndhu pwe, kara ibed kwo, man imak ng’om ni aba ma Yehova Mungu peri mio iri.

²¹Kud ipidh iri mungu m’araga mi yen moko i ng’et pemblam pa Yehova Mungu peri, m’ibitimo iri.

²²Kadok mbegi ma Yehova Mungu peri dagu de; kud ikuny iri.