Read Alur Poi Mi Cik 17 Bible Online

Poi Mi Cik 17 - Alur bible

Poi Mi Cik 17

¹Kud ilam koni dhiang’, kadi rombo, ma mulima ni kume, kadi gin moko ma rac, ni Yehova Mungu peri; kum maeno en e ginmajudagu ni Yehova Mungu peri.

²Tek junwang’u nico kadi dhaku i kindi, yor i dhugang’ peri moko ma Yehova Mungu peri mio iri, m’utimo gin ma rac i wang’ Yehova Mungu peri, ku kadhu wi lembariba pare,

³man ecidho etimo ni mungu mange, erwo igi de, kadi ni ceng’, kadi ni dwi, kadi ni udul moko m’i polo, m’ang’olo ngo,

⁴man juyero iri, e iwinjo pire; ilund ipenj cu; man, nen, tek en e andha, man ginde jung’eyo, nia wadi ginmajudagu timbre i kind Israel,

⁵ilund iwodh nico maeno kadi dhaku maeno, m’utimo gin ma rac maeni, ba dhugang’ peri, en e ng’atu ma nico kadi ma dhaku; e icanygi ku kidi githo.

⁶Ku dhu jumulembe ario, kadi jumulembe adek, jubiketho ng’atu ma jubinego tho; jubiketho etho ngo ku dhu jamulembe acel.

⁷Cing’ jumulembe bilar wok i kume ma binege, man yo ku ng’eye cing’ dhanu ceke. Ikab dubo kud i kindi kumeni.

⁸Tek lembe wok ma tek ma segi i pokolembe, i kind rimo ku rimo, i kind lembe ku lembe, man i kind dul ku dul, ma gi lembe mi piem yor i dhugang’ peri; ilund iai, man icidh i ka ma Yehova Mungu peri bigoyo wie;

⁹man icidh ba julam ma Julawi, man ba japoldembe ma bibedo nuti i ceng’ maeca: man ipenj; e gibinyutho iri lembang’ola mi lembapoka. J

¹⁰Man itim calu the lembang’ola ma gibinyutho iri kud i ka ma Yehova bigoyo wie; man iketh cwinyi kum timo calku gin ceke ma gibiponji ko:

¹¹calkud ayi cik ma gibiponji ko, man calku lembapoka ma gibiyero iri, e itim kumeca; kud ilokri cen ku ba lembang’ola ma gibinyutho iri, i cing’ ma yor acwic, kadi ma yor acam.

¹²Man ng’atu m’utimo, mi ng’oc, ku winjo jalam ungo m’ucungo kara etim tim kuca i wang’ Yehova Mungu peri, kadi ba japoklembe, e ng’atuca bitho: man ikab dubo woko ku kind Israel.

¹³E dhanu ceke biwinjo, e lworo binegogi, man gibitimo mi ng’oc kendo ngo.

¹⁴Kinde m’itundo i ng’om ma Yehova Mungu peri mio iri, man imwonye, ibedo i ie de, e iwacu kumae, Abiketho ubimo i wia, calu thek ceke m’utieka gbur;

¹⁵kethe ni ubimo i wii andha, ma Yehova Mungu peri bigoyo wie: keth ng’atu acel ma kind utumeru ni ubimo i wii; kud iketh jawirok i wii, ma en e umeru ngo.

¹⁶Ndhu riuni kud emed ire gire, kadi kud edwok dhanu i Misiri, kara eketh riuni dok dit; kum Yehova wacu iwu kumae, Ugambre kawono kud wudok kendo i yo maeno.

¹⁷Kadok mon de kud emedgi ire, kara cwinye kud ulokre cen: kadok mola ma tar ku mola ma kwar de kud emedgi hai ire.

¹⁸Man ebibedo, kinde m’ejany wi komker mi ker pare, nia ebikiewo ire wadi cik maeni i kitabu, ku i maeno ma ni i wang’ julam ma Julawi:

¹⁹man ebibedo kude, e ebisomo i ie i nindo ceke m’ebedo ie kwo; kara emak ng’eyo lworo Yehova Mungu pare, kara egwok lembe ceke mi cik maeni ku lembang’ola maeni, kara etimgi;

²⁰kara cwinye kud utingre malu wi utumin, man kara kud elokre cen kum lembang’ola, i cing’ ma yor acwic, kadi ma yor acam: kara eketh nindo pare ton hai i ker pare en ku nyithindhe, i kind Israel.