Read Alur Poi Mi Cik 18 Bible Online

Poi Mi Cik 18 - Alur bible

Poi Mi Cik 18

¹Julam ma Julawi, cil suru ceke pa Lawi, bibedo kud aba ngo karacelo kud Israel: gibicamu lam pa Yehova ma jutimo ku mac, kud aba pare.

²E gibibedo kud aba ngo karacelo ku uturneggi: Yehova en e aba migi, calu eyero igi.

³Man maeni bibedo gin ma maku dhanu mi ni julam, uai ba ju m’uthiero lam, kadok en e koni dhiang’ kadi rombo, nia gimi gok, ku limb ario, man bor.

⁴Mi ire mwoka mi cam peri, kum pigulok peri ma nyasa, man kum mo peri, man landu mi yuk rombe peri.

⁵Kum Yehova Mungu peri goyo wie kud i suru peri ceke, kara ecung etim tim i nying’ Yehova, en ku wote mi nja.

⁶Man tek Jalawi ai kud i dhugang’ peri moko kind Israel ceke, ka m’ebedo i ie ni umondo, man ebino ku yeny ceke mi ng’eyong’ec pare i ka ma Yehova bigoyo wie;

⁷ebilund timo tim i nying’ Yehova Mungu pare, calu utumin ceke ma Julawi timo, m’ucungo keca i wang’ Yehova.

⁸Gibibedo ku makapiny ma calacel mir acama, umedo maeno m’uwok kum loko aba pa won.

⁹Kinde m’iwok i ng’om ma Yehova Mungu peri mio iri, kud imak ng’eyo timo calu ginmajudagu mi thek maeca.

¹⁰Ku junwang’ ng’atu moko i beng’i ma ketho wode kadi nyare kadh kud i mac, ng’atu ma lamu bila, ng’atu ma jakilgot, kadi jalamlam, kadi jawodhtho,

¹¹kadi ajoga, kadi weg tipo, kadi jacwitho, kadi adranga.

¹²Kum ng’atu ma tek timo gin maeni en e ginmajudagu ni Yehova: man kum ginmajudagu maeni Yehova Mungu peri riemogi woko kud i weng’i.

¹³Dong’ ibed ndhu cu ku Yehova Mungu peri.

¹⁴Kum thek maeni, m’ibiyaku, giwinjo dwand ju m’utimo ajoga, man ba jubila: ento in, Yehova Mungu peri yio ngo ya itim kumeca.

¹⁵Yehova Mungu peri biting’o jabila iri kud i kindi, mi utumeru, ma calu an; wubiwinjo dwande;

¹⁶calku gin ceke m’iyenyo ba Yehova Mungu peri i Horeb i ceng’ mi cokri, m’iwacu kumae, Kud awinj dwand Yehova Mungu para kendo, kadok mac ma dit maeni de kud anen kendo, amaru tho.

¹⁷E Yehova yero ira kumae, Giwacu dre gin maeni ma giyero.

¹⁸Abiting’o jabila igi i kind uturneggi, ma calu in; man abiketho lembe para i dhoge, e ebiyero igi lembe ceke m’abing’olo ire.

¹⁹Man ebitimbre, nia ng’atu ma tek biwinjo lembe para ngo m’ebiyero ku nyinga, abilwong’e i bang’e.

²⁰Ento jabila, ma biyero lembe ku ng’oc ku nyinga, m’angolo ire ngo ya eyer, kadi ma biyero ku nying’ mungu mange, jabilane bitho.

²¹Man tek iwacu yor i cwinyi kumae, Wabing’eyo lembe ma Yehova yero ngo nenedi?

²²kinde ma jabila yero ku nying’ Yehova, tek ginde lubo ng’eye ngo, kadi etimbre ngo, maeno gin ma Yehova yero ngo: jabilane yere ku ng’oc, lworo binegi i kume ngo.