Read Alur Poi Mi Cik 19 Bible Online

Poi Mi Cik 19 - Alur bible

Poi Mi Cik 19

¹Kinde ma Yehova Mungu peri bikabu thek woko, ma ng’ombe Yehova Mungu peri mio iri, man ibedo kakagi, man ibedo i adhura migi, man i udi migi;

²ikoi adhura adek iri i kind ng’om peri, ma Yehova Mungu peri mio iri ya imwonye.

³Iyik iri yo, man ipok kieu mi ng’om peri ng’ete adek, ma Yehova Mungu peri ketho igamu ni aba, kara junek kubang’gi kubang’gi uring kuca.

⁴Man maeni lembe pa janek, m’ebiringo ko kuca man ebibedo kwo: ng’atu ma tek unego wadi aka ngo, ma naka k’edage ngo;

⁵calu ka dhanu cidho i luli ku wadi nitong’o yen, e etworo cinge etong’o ko yen ku lei, e umbu kire, ku i ragopne, man ekadhu kum wadi, ketho etho; ebiringo i adhura acel ma kind maeni e ebikwo:

⁶jaculrimo maru lubo tok janekne kinde ma cwinye lieth, man erube, kum yo bedo bor, man egoye m’etho ko; ma nwang’u eromo ku tho ngo, kum naka edage ngo.

⁷Kum kumeno ang’olo iri, awacu kumae, Koi iri adhura adek.

⁸Man tek Yehova Mungu peri medo kieu peri, calu ekwong’o ni kwaru, man emio iri ng’om ceke m’eng’olo ya ebimio ni kwaru;

⁹tek ibigwoko lembang’ola maeni ceke ya itime, m’ang’olo iri tin, ya imar Yehova Mungu peri, ya iwoth ceng’ ceke de i yo pare; ilund imed adhura adek mange iri, umed maeca adek:

¹⁰kara rimo m’umbe ku dubo ku jucwir i kind ng’om peri, ma Yehova Mungu peri mio iri ni aba, e kumeno rimo bed i wii.

¹¹Ento tek ng’atu moko dagu wadi, man ekanu adhi ire, eai de i kume, man egoye mi tho ketho nia etho, man eringo i kind adhura acel maeni;

¹²judongo mir adhura pare bilund oro kwenda man gibiwodhe ku kuca, e gibimie i cing’ jaculrimo, kara etho.

¹³Ngisi kud uneg weng’i i kume, ento ikab rimo m’umbe dubo ku bang’ Israel, kara ibed ber.

¹⁴Kud ikab giranyutha mi kieu pa wedu, ma ju ma con giketho, i aba peri m’ibigamu, i ng’om ma Yehova Mungu peri mio iri kara imwonye.

¹⁵Jamulembe acel kud ucung kum dhanu kum kier moko, kadi kum dubo moko, i dubo moko m’edubo: ku dhu jumulembe ario, kadi ku dhu jumulembe adek, lembe bicungo.

¹⁶Tek jamulembe ma pwe ngo ai malu kum ng’atu moko kara etuc wie mi timo rac,

¹⁷dhanu ario, ma dhau ni i kindgi, bilund cungo i wang’ Yehova, i wang’ julam ku jupoklembe ma gibedo nuti i ceng’ maeca;

¹⁸e jupoklembene bikoro i lembe cu: man, nen, tek jamulembene bedo jamulembe mi ndra, man etuco lem ndra kum umin;

¹⁹wulund wutim i kume, calu ie paru ebitimo bang’ umin: kab dubo woko kud i kindi kumeni.

²⁰E ju m’udong’ gibiwinjo, man lworo binegogi, e ugambre i nindo maeca gibitimo dubo ma kumeca kendo ngo i kindi.

²¹Man ngisi kud uneg weng’i; kab kwo ka wang’ kwo, wang’ de ka wang’ wang’, lak ka wang’ lak, cing’ ka wang’ cing’, tielo ka wang’ tielo.