Read Alur Poi Mi Cik 2 Bible Online

Poi Mi Cik 2 - Alur bible

Poi Mi Cik 2

¹Walund walokra, man watugo woth mwa i langa yo ba Nam Makwar, calu Yehova yero ira; man wadhoko got Seir nindo dupa.

²E Yehova yero ira, ewacu kumae,

³Wudhoko got maeni romo: wulokru yor ariwa ma malu.

⁴Man ing’ol ni dhanu, iwac kumae, Wubikadhu kud i kieu mi utumegwu ma nyithindho pa Esau, m’ubedo i Seir; e lworo binegogi i kumwu. Ka kumeno wubed ku weng’wu ber i kumwu giwu;

⁵kud wuii kugi; kum abimio ng’om migi ngo iwu, ungo, kadok ma romo tielo m’anyona de ngo; kum amio got Seir ni Esau ni piny.

⁶Wubing’iewo cemo i bang’gi ku sente, kara wucam; man wubing’iewo pi bende i bang’gi ku sente, kara wumadhi.

⁷Kum Yehova Mungu peri mio mugisa iri i tic ceke mi cingi; eng’eyo woth peri kud i langa maeni ma dit: rundi pier ang’wen maeni Yehova Mungu peri bedo kudi: gin moko mbe m’urem iri.

⁸Kum kumeno wakadhu ku ba utumegwa ma nyithindho pa Esau, m’ubedo i Seir, kud i yo mir Araba ku i Elath man ku i Ezion-geber. Man walokra e wakadhu kud i yo mi langa mi Moab.

⁹Man Yehova wacu ira kumae, Kud wunyai ng’ecwiny i Moab, kadok aia de kud wuii kugi i lwiny; kum abimio iri kum ng’om pare ngo ni piny; kum amio Ar ni nyithindho pa Lot ni piny.

¹⁰(Naka Juemi bedo i ie, gi dhanu ma dit, man gi dupa, gi boco de, calu Juanaki;

¹¹joni bende jukwanugi Jurefai, calu Juanaki; ento Jumoabi lwong’ogi Juemi.

¹²Juhori bende naka gibedo i Seir, ento nyithindho pa Esau gibedo kakagi; man ginyothogi kud i wang’gi, man gibedo kakagi; calu Israel utimo kum ng’om mi piny pare, ma Yehova mio igi.)

¹³Kawono ai malu, man wukadh loka kulo Zered. E wakadhu loka kulo Zered.

¹⁴E nindo ma waai i ie ku i Kadec-barnea, maram wakadhu ko kulo Zered, en e rundi pier adek wi abora: cil ma dhanum’utuk ceke mi dhanu mir ali nyothri ko kud i die gonjo, calu Yehova ng’olo igi.

¹⁵Mange ke cing’ Yehova ni i kumgi, kara unyothgi kud i die cokri, maram githum ko.

¹⁶Ka kumeno etimbre, kinde ma dhanu mir ali ceke thum man githo ku kind dhanu,

¹⁷nia Yehova yero ira, ewacu kumae,

¹⁸Tinuni ibikadhu loka Ar, en e kieu mi Moab:

¹⁹man kinde m’icoro ceng’ni i wang’ nyithindho mir Amon kud inyai ng’ecwiny i igi, kadi kud wuii kugi; kum abimio iri kum ng’om mi nyithindho mir Amon ungo ni piny; kum amie ni nyithindho pa Lot ni piny.

²⁰(Maeca bende jukwanu ni ng’om mi Jurefai; naka Jurefai bedo i ie; ento Juamoni lwong’ogi Juzamzumi,

²¹gi dhanu ma dit, man gi dupa, gi boco de, calu Juanaki; ento Yehova nyothogi i wang’gi; e gikabugi, man gibedo i kakagi;

²²calu etimo ni nyithindho pa Esau, m’ubedo i Seir, kinde m’enyotho Juhori kud i wang’gi; man gikabugi, e gibedo kakagi cil i ceng’ maeni.

²³Man Juavi, m’ubedo i pacu ma cik i Gaza, gi Jukaftori m’uai woko kud i Kaftor, unyothogi, man gibedo kakagi.)

²⁴Wuai malu, wutug woth mu, man wukadh loka poga mir Arnon: nen, amio Sihon ma Jaamori, m’ubimo mi Hecbon, ku ng’om pare, i cingi; wumak mwonye, man wuii kude i lwiny.

²⁵Tinuni abimaku ketho ndirini man lworoni wi kodhidhanu ma gini the polo ngung’, ma biwinjo rwongi, e kumgi bimiel, man ndiba binegogi i kumi.

²⁶Man aoro jukwenda kud i langa mi Kedemoth ba Sihon m’ubimo mi Hecbon ku lembe mi kwiocwiny, awacu kumae,

²⁷Wek akadh kud i ng’om peri: abiwotho kud i gengi, abilokra ngo yo ku cing’ ma yor acwic kadi yor acam.

²⁸Ibiloko ira cemo ku sente, ketho acam; man ibimio ira pi mi sente, ketho amadhi: ndhu wek akadh akadha ku tienda;

²⁹calu nyithindho pa Esau m’ubedo i Seir, man Jumoabi m’ubedo i Ar, gitimo i kuma; maram abikadhu ko loka Yordan i ng’om ma Yehova Mungu mwa mio iwa.

³⁰Ento Sihon m’ubimo mi Hecbon uyio ngo wakadh ku yor i bang’e; kum Yehova Mungu peri dwoko cwinye tek, man edwoko adundene tek kara emie i cingi, calu i ceng’ ma tin.

³¹E Yehova wacu ira kumae, bien, amaku mio Sihon ku ng’om pare i weng’i: mak mwonyo, kara imak ng’om pare ni aba.

³²E Sihon ulund uwok woko i kumwa, en ku dhanu pare ceke, i lwiny i Yahaz.

³³E Yehova Mungu mwa mie i wang’wa; e wagoye, ku wote, man dhanu pare ceke.

³⁴E wamaku adhura pare ceke i nindo maeca, man wanyotho adhura ma ie ju dhanu kubang’e kubang’e kot, karacelo ku mon man nyithindho ma thindho; waweko moko ngo m’udong’:

³⁵ndhu lim e ma wamaku ni amaci iwa giwa, karacelo kud ayeki mir adhura ma wamaku.

³⁶Ugambre Aroer, ma ni i dhu poga mir Arnon, man ugambre kum adhura ma ni i poga, cil kum Gilead, adhura moko mbe m’ubedo wiu iwa; Yehova Mungu mwa mio ceke i wang’wa:

³⁷ndhu ng’om mi nyithindho mir Amon e m’ibino ceng’ni i kume ngo; ng’et kulo Yabok ceke, man adhura mi ng’om gudi, man ka ceke ma tek Yehova Mungu mwa kwero ie wa.