Read Alur Poi Mi Cik 20 Bible Online

Poi Mi Cik 20 - Alur bible

Poi Mi Cik 20

¹Kinde m’icidho ba lwiny kum judegi peri, man ineno riuni, ku magali, man dhanu ma welgi segi, lworo kud unegi i kumgi; kum wunuti wuku Yehova Mungu perigi, m’uwodhi woko kud i ng’om Misiri.

²E ebibedo, kinde ma wucoro ceng’ni dhu lwiny, nia jalam bibino man ebiyero ni dhanu,

³man ebiwacu igi kumae, Wuwinji, E Israel, wucoro ceng’ni tin dhu lwiny kum judegiwu: cwinywu kud ung’oi ndiri; lworo kud unegwu, kumwu de kud umiel, kadok ndiri de kud unegwu i kumgi;

⁴kum Yehova Mungu mu en e ng’atu ma wucidho wukugi, nikiedo piwu ku judegiwu, kara ebodhwu.

⁵E jego biyero ni dhanu, gibiwacu kumae, Ng’a m’ugomo ot ma nyen, m’ethiere ngo? wek ecidh edok i ot pare, emaru tho i lwiny, man dhanu mange maru thiero ode.

⁶Man ng’a ma nuti m’upidho podho mir ulok, ma fokepono nyinge ngo? wek ecidh edok i ot pare, emaru tho i lwiny, man ng’atu mange maru pono nyinge.

⁷Man ng’a ma nuti m’unyomo dhaku, ma fokegame ngo? wek ecidh edok i ot pare, emaru tho i lwiny, e dhanu mange maru game.

⁸E jegone biyero kendo ni dhanu, man gibiwacu kumae, Ng’a ma nuti ma lworo benege ma cwinye de ng’oi ndiri? wek ecidh edok i ot pare, cwiny wadi maru ng’oi ndiri calu cwinye.

⁹Man ebibedo, kinde ma jego daru yero ni dhanu, nia gibiketho juwidhanu mir udul i wi dhanu.

¹⁰Kinde m’icoro ceng’ni kum adhura kara ikied i kume, ilund iyer pi kwiocwiny i bang’e.

¹¹Man ebibedo, tek edwoko iri lembaloka mi kwiocwiny, man eyabu iri, ebilund bedo, nia dhanu ceke ma junwang’u i ie gibimondo iri, man gibitimo iri.

¹²Man tek ebitimo kwiocwiny ungo i beng’i, ento ebitimo ali i kumi ibilund tieke kud ali:

¹³man kinde ma Yehova Mungu peri mie i cingi, ibigoyo cone kubang’gi kubang’gi ku lak palamularu:

¹⁴ento mon, ku nyithindho ma thindho, ku lim, ku gin ceke ma ni i adhurane, en e ayekine ceke, ibigamu ni amaci iri; man icam ayeki mi judegi peri, ma Yehova Mungu peri mio iri.

¹⁵Tim kumeno kum adhura ceke ma bor ngbir iri, ma gi mir adhura mi thek maeni ngo.

¹⁶Ento mir adhura mi kodhidhanu maeni, ma Yehova Mungu peri mio iri ni aba, kud ibodh gin moko ma yuyo ma kwo;

¹⁷ento inyothgi pet: Jahiti man Jaamori, ku Jakanani, ku Japerizi, man Jahivi, ku Jayebusi; calu Yehova Mungu peri ng’olo iri;

¹⁸kara ku giponjwu ku timo calu ginmajudagu migi ceke, ma gitimo ni mungu migi; wumaru dubo ni Yehova Mungu mu.

¹⁹Kinde m’itieko adhura kud ali nindo dupa m’itimo kume ali kara imake, kud inyoth yende ku ng’ologi ku lei; kum icopo camu nying’gi, man kud ing’olgi piny; kum yen m’i podho en e dhanu, ma nia itim ali i kume?

²⁰Ndhu yedhi m’ing’eyo nia gi yedhi mi cemo ngo, inyothgi man ing’olgi piny; man itim jambgwok kum adhurane m’utimo ali kudi, cil m’epodho ko.