Read Alur Poi Mi Cik 21 Bible Online

Poi Mi Cik 21 - Alur bible

Poi Mi Cik 21

¹Tek junwang’u ng’atu moko ma junego i ng’om ma Yehova Mungu peri mio iri kara imwonye, m’evuto i thim, man jung’eyo ng’atu m’ugoye ngo;

²judongo peri ku jupoldembe peri gibilund ai, gibiporo kabor mir adhura m’utieko ng’atu ma junego:

³man ebibedo, nia adhura m’ubedo ceng’ni ku ng’atu ma junego, e judongo mir adhura maeca bigamu rwaya ku kind dhok, ma fodi jukutimo tic kude ngo, man ma fokupeyo mberembere ngo:

⁴e judongo mir adhurane bitero rwayane piny i poga ma ie ju pi ma mol, ma fodi jukufuro ngo, kadi acoya de jucoye ngo, e gibimino ng’ut rwayane keca i poga.

⁵E julam ma wot Lawi bicoro ceng’ni; kum Yehova Mungu peri goyo wigi kara gitim tim ire, man kara gimi mugisa ku nying’ Yehova; man dhau ku goc kubang’e kubang’e bibedo calku lembe migi.

⁶Man judongo ceke mir adhura maeca, ma gini ceng’ni ku ng’atu ma junego, bilogo cing’gi wi rwaya ma jumino ng’ute i poga;

⁷e gibiloko lembe man gibiwacu kumae, Cingwa ewiro rimo maeni ngo, kadok wang’wa de nene ngo.

⁸E Yehova, wek lembe mi dhanu peri ma Israel, m’iwaru, man kud iyi rimo m’umbe dubo dong’ i kind dhanu peri ma Israel. E jubiweko rimone woko igi.

⁹Kab rimo m’umbe ku dubo cen kud i kindi kumeni, kinde m’itimo gin ma pwe i wang’ Yehova.

¹⁰Kinde m’icidho woko ba lwiny kum judegi peri, man Yehova Mungu peri miogi i cingi, man iyakugi ni ng’eca,

¹¹man ineno dhaku ma wang’e leng’ i kind ng’ecane, man avane negi, e iyenyo igame iri ni dhaku;

¹²ilund itere thu i ot peri; e ebigwaru wie, man ebiliro lwete;

¹³man ebiwaru kendi mi ng’eca pare woko kud i kume, e ebidong’ i ot peri, man ebiywagu won ku min dwi acel yul: man yo ng’ei maeni ibimondo i wie, man ibibedo cware, en de ebibedo cegi.

¹⁴Man ebibedo, tek anyong’a negi i kume ngo, ilund iwek ecidh ka m’eyenyo; ento kud iloke ki ku sente, kud itim kude calu ng’eca, kum ijwige.

¹⁵Tek ng’atu moko bedo ku mon ario, acel m’emaru, mucelo ke m’edagu, man ginyolo ire nyithindho, ng’atu m’emaru ku ng’atu m’edagu; man tek wode ma kayu bedo pa ng’atu m’edagu;

¹⁶ebilund bedo, i nindo m’eketho wote mak gin m’ebedo ko ni aba, nia kud eketh wod ng’atu m’emaru ubed kayu i wang’ wod ng’atu m’edagu, ma en e kayu:

¹⁷ento ebiyio kayu, ma wod ng’atu m’edagu, ku mio ire makapiny wang’ ario mi gin ceke m’ebedo ko; kum en e thekri mi tego pare; ng’ol mi kayu en e pare.

¹⁸Tek ng’atu moko bedo ku wode m’udhuku man jaco, ma yio woro dwand won ungo, kadi dwand min, man, kadok giponje, ebiwinjogi ngo;

¹⁹won ku min bilund make, man gibitere woko ba judongo mir adhura ma thugi, man ba dhugola mi ka m’ebedo i ie;

²⁰e gibiwacu ni judongo mir adhura ma thugi kumae, Wodwa maeni en e udhuku man jaco, eyenyo ngo ewor dwandwa; en e jambo, man andrejkong’o.

²¹E dhanu ceke mir adhura ma thugi bicanye ku Iddi m’etho ko: kab dubo cen kud i kindi kumeni; e Israel ceke biwinjo, man lworo binegogi.

²²Man tek ng’atu moko timo dubo m’uromo ku tho, e juketho etho, man iliere kum yen;

²³kume kud ubed kum yen ku diewor soro; ento iyike andha ceng’ nica; kum ng’atu ma juliero bedo akwong’a ni Mungu; kara kud icid ng’om peri ma Yehova Mungu peri mio iri ni aba.