Read Alur Poi Mi Cik 22 Bible Online

Poi Mi Cik 22 - Alur bible

Poi Mi Cik 22

¹Tek ineno koni dhiang’ p’umeru kadi rombo pare kier, kud iuri igi: idwokgi kendo bang’ umeru andha.

²Man tek umeru bedo ceng’ni kudi ngo, kadi tek ing’eye ngo, ilund itere thu ba ot peri, e ebibedo i beng’i cil m’umeru biyenye ko, e idwoke ire.

³Tim kumeni kum kana pare; tim kumeni kum kendi pare de; tim kumeni bende kum gin ceke p’umeru m’urwinyo kubang’e kubang’e, m’inwang’u: icopo peli ngo.

⁴Tek ineno kana p’umeru kadi koni dhiang’ pare podho piny dhu yo, kud iuri igi; konye andha ku ting’ogi malu kendo.

⁵Dhaku kud ukend gin ma mi co, kadok co de kud ukend kendi pa dhaku; kum ng’atu ma tek utimo gin maeni en e ginmajudagu ni Yehova Mungu peri.

⁶Tek odwinyo nen i weng’i i yo, wi yen moko kadi i ng’om, ku nyithindhe kadi tonge, man min de vuto wi nyithindhe, kadi wi tonge, kud icok min ku nyithindhe:

⁷wek min ucidh andha, ento icopo coko nyithindhe iri; kara ibed ber, man kara iketh nindo peri ton.

⁸Kinde m’igomo ot ma nyen, ilund itim gang’ kum wi ot peri, kara kud ikel rimo wi ot peri, tek ng’atu moko podho ku kuca.

⁹Kud icoi podho mir ulok peri ku kodhi ma kwonde ario, kara nyinge ceke kud ukabre, kodhi m’icoyo, ku nyai mi podho mir ulok.

¹⁰Kud ifur fur ku koni dhiang’ ku kana karacelo.

¹¹Kud ikend bongu m’ujebre, yuk rombe ku pamba karacelo.

¹²Tim ruko i dhu kendi peri ang’wen, m’ironjri kudo.

¹³Tek ng’atu moko gamu dhaku, man emondo i wie, e edage,

¹⁴man ecuko lembe mi lewic i kume, e ekelo nying’ ma rac i wie, man ewacu kumae, Agamu dhaku maeni, e kinde m’abino i bang’e, anwang’u giranyutha ngo i bang’e ma pa nyaku ma ng’won;

¹⁵e won nyakune, ku min mire, gibigamu giranyutha mi ng’wono pa nyakune gibitero ba judongo mir adhurane i dhugang’;

¹⁶e won nyakune biyero ni judongo kumae, Amio nyara ni ng’atu maeni ni dhaku, man edage;

¹⁷man, nen, ecuko lemblewic i kume, ewacu kumae, Anwang’u giranyutha mi ng’wono pa nyeri ngo; ento maeni en e giranyutha mi ng’wono pa nyara. E gibipedho bongu i wang’ judongo mir adhura.

¹⁸E judongo mir adhurane bigamu ng’atuno man gibiponje;

¹⁹man gibing’olo cul i wie mi cekel mi mola ma tar dak acel, e gibimiogi ni won nyakune kum ecido nying’ nyaku mir Israel; e ebibedo dhaku pare; ecopo kethe cen ungo i nindo pare ceke.

²⁰Ento tek ginduni andha, nia junwang’u giranyutha mi ng’wono ngo kum nyakune;

²¹gibilund wodho nyakune woko dhugola mi ot pa won, e dhanu ma co ma i adhura ma thugi bicanye ku kidi m’etho ko, kum etimo kasegu i kind Israel, m’etimo ko asara i ot pa won: kab dubo woko kumeni kud i kindi.

²²Tek junwang’u ng’atu ma nico vuto ku dhaku ma cware nuti, e gin ario de gibitho, ng’atu m’uvuto ku dhaku, man dhakune de: kab dubo woko kumeni ku kind Israel.

²³Tek nyaku moko nuti ma ng’won ma ng’atu moko benyome, e ng’atu moko nwang’e i adhura, man evuto kude;

²⁴wulund wuter gin ario woko ba dhugang’ mir adhura maeno, e wucanygi ku kidi ma githo ko; nyakune, kum egoyo nduru ngo, m’eni i adhura; man nicone, kum ecido dhaku pa wadi: kab dubo woko kud i kindi kumeni.

²⁵Ento tek ng’atu moko nwang’u nyaku ma jubenyomo i thim, e ng’atuno make ku tego, man evuto kude, e ng’atuca kende m’uvuto kude bitho:

²⁶ento kud itim gin moko kum nyakune: dubo ma romo ku tho mbe wi nyakune: kum calu dhanu ai kum wadi, man enege, e lembe maeni bedo kumeno;

²⁷kum enwang’e i thim, e nyaku m’anyoma goyo nduru, man ng’atu moko mbe m’ulare.

²⁸Tek ng’atu moko nwang’u nyaku ma sumba, ma fodi jukunyome ngo, e emake, man evuto kude, man junwang’ugi;

²⁹e ng’atu m’uvuto kude bimio cekel mi mola ma tar pier abic ni won nyakune, e ebibedo dhaku pare, kum ecide; ecopo kethe cen ungo i nindo pare ceke.

³⁰Ng’atu moko kud ugam ci won, man kud eyab dhu kendi pa won.