Read Alur Poi Mi Cik 23 Bible Online

Poi Mi Cik 23 - Alur bible

Poi Mi Cik 23

¹Ng’atu ma tek jugoyo mande ku rem, kadi tek juthumo yome woko, ebimondo i cokri pa Yehova ngo.

²Ng’atu ma luk bimondo i cokri pa Yehova ngo: cil kum dhanum’utuk mir apaje ng’atu moko ma pare bimondo i cokri pa Yehova ngo.

³Jaamoni kadi Jamoabi bimondo i cokri pa Yehova ngo; cil kum dhanum’utuk mir apaje ng’atu moko mbe ma migi ma bimondo i cokri pa Yehova mi nja:

⁴kum ging’olowu i yo ku kwen ku pi de ngo, kinde ma wuai i Misiri, man kum gigamu Balam ma wod Beor m’uai Pethor mi Mesopotamia, i kumi ku sukulia kara ebin elemi.

⁵Ento Yehova Mungu peri yio ngo ewinj Balam; ento Yehova Mungu peri loko lam ni mugisa iri, kum Yehova Mungu peri meri.

⁶Kud iyeny kwiocwiny migi kadi mierolembe migi nindo peri ceke mi nja.

⁷Kud idag Jaedomi; kum en e umeru: kud idag Jamisiri; kum ibedo ni umondo i ng’om pare.

⁸Nyithindho migi ma junyolo mi dhanum’utuk mir adege bimondo i cokri pa Yehova.

⁹Kinde m’iwok woko icidho i kagonjo kum judegini, ilund igwokri ni gin ma rac ceke kubang’e kubang’e.

¹⁰Tek ng’atu moko ni i kindwu, m’ucido ni kum dya ma wok ku diewor, ebilund cidho woko ng’ei kagonjo, ebimondo i kagonjo ngo:

¹¹ento ebibedo, kinde m’uthieno wok, ebijombre ku pi; e kinde ma ceng’ upodho, ebimondo i kagonjo.

¹²Bed ku kamoko bende ng’ei kagonjo, ka m’iwok woko i ie:

¹³man ibed ku kwer i kind jamtho peri; man ebibedo, kinde m’ibedo piny yo woko itong’ kudo ng’om, e ilokri ium gin maeno m’uai i kumi:

¹⁴kum Yehova Mungu peri wotho i kind kagonjo peri, kara ebodhi, man kara emi judegini i weng’i; ka kumeno kagonjo peri bed leng’, kara kud enen gin m’ucido i beng’i, man elokre cen kud i kumi.

¹⁵Kud idwok ng’eca ba rwodhe tek epiei ebino i beng’i:

¹⁶dong’ wubed wukude, i kindi, i ka m’efoyo yo i dhugang’ peri acel, ka m’unyayu anyong’a i ie m’usagu.

¹⁷Won asara moko kud ubed i kind nyig Israel, kadok jarwo ma ni mungu m’araga de kud ubed i kind wot Israel.

¹⁸Kud ikel sukulia pa won asara, kadi sukulia pa gwok, i ot pa Yehova peri kum lembang’ola moko: kum maeni ario de en e ginmajudagu ni Yehova Mungu peri.

¹⁹Kud imi banja mi kuloka ni umeru; kuloka mi sente, kuloka mi cemo, kuloka mi gin moko ma jumio ni banja mi kuloka.

²⁰Icopo mio banja mi kuloka ni jawirok; ento kud imi banja mi kuloka ni umeru, kara Yehova Mungu peri mi mugisa iri i gin ceke m’iketho cingi i kume, i ng’om ka m’icidho i ie kara imwonye.

²¹Kinde m’ing’olo lembang’ola ni Yehova Mungu peri, kud igal ku cule: kum Yehova Mungu peri bilwong’e i beng’i andha; man ebibedo iri ni dubo.

²²Ento tek iceri kum ng’ololembe, ebibedo iri ni dubo ngo.

²³Keth cwinyi kum lembe m’uai i dhogi man itime; calu ing’olo lembe ni Yehova Mungu peri, girathiera ma ku berocwiny, m’ing’olo ku dhogi.

²⁴Kinde m’imondo i podho mir ulok pa wedu, e icam nyingulok m’uromi calu iyenyo; ento kud iketh moko i jamni peri.

²⁵Kinde m’imondo i cam pa wedu ma wi tiende, e icopo codo withe ku cingi; ento kud iketh pala kum cam pa wedu ma wi tiende.