Read Alur Poi Mi Cik 24 Bible Online

Poi Mi Cik 24 - Alur bible

Poi Mi Cik 24

¹Kinde ma ng’atu moko gamu dhaku, man eluthe, ebilund bedo, tek enwang’u bero ngo i wang’e, kum enwang’u lemblewic moko i kume, nia ebigoro ire waraga mi pokri, man ebimie i cinge, e ebiketho eai kud i ot pare.

²E kinde m’eai kud i ot pare, ecopo bedo dhaku pa ng’atu mange.

³Man tek cware ma cen de dage, man egoro ire waraga mi pokri, e emie de i cinge, man eketho eai kud i ot pare; kadi tek cware ma cen utho, m’ugame ni dhaku ire;

⁴cware ma kwong’a, m’uketho eai, copo game kendo ngo ni dhaku ire, yo ng’ei cido m’ecide kum maeno en e ginmajudagu i wang’ Yehova: man kud iketh ng’om udubi, ma Yehova Mungu peri mio iri ni aba.

⁵Kinde ma ng’atu moko gamu dhaku ma mugole, kud ecidh woko kind udul, kadok tic moko de ku juketh i kore: ebibedo agonya thugi rundi acel, man ebinyayu mutoro i dhaku pare m’egamu.

⁶Ng’atu moko kud ugam pom kadi nyare ni mukwatu; kum egamu kwo pa dhanu ni mukwatu.

⁷Tek junwang’u ng’atu moko bekwalu utumin moko mi nyithindho mir Israel, man etimo kude calu ng’eca, kadi eloke; a jakwo maeno bilund tho: kab dubo woko kumeni kud i kindi.

⁸Bed ku weng’i kum tho mi joi, kara iketh cwinyi kud amora, man itim calku lembe ceke ma julam ku Julawi biponjowu ko: calu ang’olo igi, wuketh cwinywu kum timo kumeca.

⁹Poi kum gin ma Yehova Mungu peri timo kum Miriem dhu yo, kinde ma wuai kud i Misiri.

¹⁰Tek imio banja moko ni wedu, kud imond i ot pare nigamu mukwatu pare.

¹¹Cung ku woko, e ng’atu m’imio banja ire biwodho mukwatu woko i beng’i.

¹²Man tek en e ng’atu ma jacan, kud inind ku mukwatu pare;

¹³dwok mukwatu pare kinde ma ceng’ upodho andha, kara enind i kendi pare, man emi mugisa iri: man ebibedo iri ni bedopwe i wang’ Yehova Mungu peri.

¹⁴Kud isend jamiru ma mi sukulia ma jacan man jacanpiny, tek ebedo kind utumeru, kadi kind umondo peri ma gini i ng’om peri yo i dhugang’ peri:

¹⁵mi sukulia ire i nindone, kadok ceng’ de kud umwony i wie (kum en e jacan, man eketho cwinye i kume); emaru ywak i wii ba Yehova, man ebed ni dubo iri.

¹⁶Ku juketh wego tho pi nyithindho, kadok nyithindho de ku juketh githo pi wego: ku ba dhanu ku ba dhanu juketh etho pi dubo pare gire.

¹⁷Kud iroc pokolembe p’umondo, kadi pa kic, kadi kud igam kendi pa dhaku ma cware tho ni mukwatu;

¹⁸ento poi nia naka in bende in i ng’eca i Misiri, man Yehova Mungu peri weri ku kuca: ka kumeno ang’olo iri nia itim gin maeni.

¹⁹Kinde m’ikayu mwoka peri i podho peri, man wii wil kum kumna i podhone, kud idok igame kendo: ebibedo ni umondo, man ni kic, man ni dhaku ma cware tho; kara Yehova Mungu peri mi mugisa iri kum tic ceke mi cingi.

²⁰Kinde m’iteng’o yendulam peri, kud idok wi jange kendo; ebibedo ni umondo, man ni kic, man ni dhaku ma cware tho.

²¹Kinde m’icoko nyingulok mi podho mir ulok peri, kud ibek yo ng’ei kendo: ebibedo ni umondo, man ni kic, man ni dhaku ma cware tho.

²²Man ipoi nia naka in i ng’eca i ng’om Misiri: ka kumeno ang’olo iri nia itim gin maeni.