Read Alur Poi Mi Cik 25 Bible Online

Poi Mi Cik 25 - Alur bible

Poi Mi Cik 25

¹Tek dhau ni i kind jumoko, man gibino ba pokolembe, e jupoklembe gipoko lembe migi; e gigony lembe ma wi won bedopwe, man gigonj jadubo.

²Man ebibedo, tek jadubo romo ya jugoye, nia japoklembe bipiele piny, man jubigoye i wang’e, calku dubo pare, ku wel.

³Ecopo goye goc pier ang’wen, kud ekadhi; kara, tek ekadhu, man egoye ma sagu maeni ku goc dupa, e umeru maru nen rac iri.

⁴Kud itwi dhu koni dhiang’ kinde m’eyoko cam.

⁵Tek umego bedo karacelo, e kindgi acel utho, ma wode mbe, dhaku pa ng’atu m’utho bigambre yo woko ba jawirok ungo: umin cware bimondo i wie, man ebigame ire ni dhaku, man ebitimo gin m’umaku piny p’umin cware i bang’e.

⁶Man ebibedo, nia kayu m’enyolo bilubo tok umin m’utho ku nyinge, kara nyinge kud ukabre woko i kind Israel.

⁷Man tek ng’atuca maru gamu dhaku p’umin ungo, e dhaku p’umin mire bilund idho malu dhugang’ ba judongo, man ebiwacu kumae, Umin cwara kwero ting’o nying’ ni umin mire i kind Israel; ekwero timo ira gin m’umaku piny p’umin nico para.

⁸E judongo mir adhura pare bilund lwong’e, man gibiweco kugi: e tek ecungo, man ewacu de kumae, Ayenyo ngo agame;

⁹e dhaku p’umin bilund bino i bang’e i vut judongo, man ebigonyo wara pare kud i tiende, man ebing’ulo lau i wang’e; e ebiloko lembe man ebiwacu kumae, Jubitimo kumeni kum ng’atu m’ukwero gomo ot p’umin mire.

¹⁰E jubilwong’o nyinge i kind Israel kumae, Ot pa ng’atu ma jugonyo wara pare.

¹¹Kinde ma dhanu dhau acel ku wadi, e dhaku pa ng’atu acel ucoro ceng’ni kara ebodh cware kud i cing’ ng’atu m’ugoye, e erieyo cinge, man emaku yome;

¹²ilund ithum cinge woko, ngisi kud uneg weng’i.

¹³Kud ibed ku mukero i usau peri ma tung’ tung’, ma dit ku ma nok.

¹⁴Kud ibed ku mukero ma tung’ tung’ i ot peri, ma dit ku ma nok.

¹⁵Bed ku jampor ma ndhu cu ma pwe de; bed ku mukero ma ndhu cu ma pwe de: kara nindo peri ton hai i ng’om ma Yehova Mungu peri mio iri.

¹⁶Kum dhanu ceke m’utimo wadi gin maeni, en e dhanu ceke m’utimo gondri, gi ginmajudagu ni Yehova Mungu peri.

¹⁷Poi kum gin ma Amalek utimo i kumi i yo kinde ma wuai kud i Misiri;

¹⁸maram erubi ko i yo, man egoyo dhanu peri ceke m’udong’ cen, dhanu ceke ma gi ng’ic i ng’ei, kinde m’ivoc iol de; man lworo nege ngo kum Mungu.

¹⁹Ka kumeno ebibedo, kinde ma Yehova Mungu peri mio iri yom wi judegi peri ceke m’utieki gbur, i ng’om ma Yehova Mungu peri mio iri ni aba kara imwonye, nia ibikabu poi mir Amalek woko ku the polo; wii kud uwil.