Read Alur Poi Mi Cik 26 Bible Online

Poi Mi Cik 26 - Alur bible

Poi Mi Cik 26

¹Man ebibedo, kinde m’imondo i ng’om ma Yehova Mungu peri mio iri ni aba, man imwonye, ibedo i ie de,

²nia ibigamu landu mwoka mi nying’ piny ceke mi ng’om, m’ibikelo m’uai i ng’om peri ma Yehova Mungu peri mio iri; e ibikethe i katoko, man ibicidho ba ka ma Yehova Mungu peri bigoyo wie, kara eketh nyinge bed keca.

³E ibibino ba jalam ma bibedo nuti i ceng’ maeca, man ibiwacu ire kumae, Atuco tin ni Yehova Mungu peri, nia abino i ng’om ma Yehova kwong’o ni kwaruwa ya ebimio iwa.

⁴E jalam bigamu katoko kud i cingi, man ebikethe i wang’ pemblam pa Yehova Mungu peri.

⁵Man ibidwoko lembe ibiwacu de i wang’ Yehova Mungu peri kumae, Naka vwa en e Jacami ma ceng’ni rwinyo; e eloro piny i Misiri, ebedo ni umondo de kuca, ma welne nok; e kuca edoko ni thek, ma dit, ma tek, man dhanu ma dupa.

⁶Man Jumisiri gitimowa rac, gisendowa de, man giketho ng’eca ma tek i kumwa:

⁷e way wak ba Yehova, Mungu mi kwaruwa, man Yehova winjo dwandwa, e eneno masendi mwa, ku tic ma wamula ko, ku nzero mwa;

⁸e Yehova wodhowa kud i Misiri ku cing’ ma tek, man ku bot m’arieya, man ku ng’oyondiri ma dit, ku giranyutha, man ku musana;

⁹e ekelo wa i ka maeni, man emio iwa ng’om maeni, en e ng’om ma molo cak man kic.

¹⁰Man kawono, nen, akelo mwoka mi nying’ piny mi ng’om, ma in, E Yehova, imio ira. E ibikethe piny i wang’ Yehova Mungu peri, man ibirwo i wang’ Yehova Mungu peri:

¹¹e anyong’a binegi kum gin ceke ma ber ma Yehova Mungu peri mio iri, man ni ot peri, in, ku Jalawi, man umondo ma ni i kindi.

¹²Kinde m’idaru mio apaje en e apaje mi nyai peri ceke i rundi mir adege, ma en e rundi mi mio apaje ilund imie ni Jalawi, man ni umondo, man ni kic, man ni dhaku ma cware tho, kara gicam yer i dhugang’ peri, e giyeng’.

¹³E ibiwacu i wang’ Yehova Mungu peri kumae, Akabu gin ma leng’ kud i ot para, man amio bende ni Jalawi, man ni umondo, ni kic de, man ni dhaku ma cware tho, calku lembang’ola peri ceke m’ing’olo ira: akadhu ku wi lembang’ola peri moko ngo, kadok wia de wii pigi ngo:

¹⁴acamu kume ngo i nindo mi ywak para, kadi akabu kum maeno de ngo, m’abedo m’acido, kadok kume moko de amio ngo pi ju m’utho: awinjo dwand Yehova Mungu para; atimo calku gin ceke m’ing’olo ira.

¹⁵Nen piny ku i kabedo peri ma leng’, kud i polo, man imi mugisa ni dhanu peri Israel, ku ng’om de m’imio iwa, calu ikwong’o ni kwaruwa, ng’om ma molo cak ku kic.

¹⁶Tin Yehova Mungu peri ng’olo iri ya itim cik ku lembapoka maeni: ka kumeno igwokgi man itimgi kud adundeni ceke, man ku ng’eyong’ec peri ceke.

¹⁷Ituco Yehova tin y a en e Mungu peri man nia ibiwotho i yo pare, man ibigwoko cik pare, ku lembang’ola pare, ku lembapoka pare, man ibiwinjo dwande:

¹⁸e Yehova tuco in tin nia ibed dhanu ni piny pare ma dhe, calu eng’olo iri, man nia igwok lembang’ola pare ceke;

¹⁹man kara edodi malu wi thek ceke m’etimo, ni pak, man ni nying’, man ni yung: man kara ibed dhanu ma leng’ ni Yehova Mungu peri, calu eyero.