Read Alur Poi Mi Cik 27 Bible Online

Poi Mi Cik 27 - Alur bible

Poi Mi Cik 27

¹E Musa ku judongo mir Israel ging’olo ni dhanu, giwacu kumae, wugwok lembang’ola ceke m’ang’olo iwu tin.

²Man ebibedo i ceng’ ma wubikadhu ie loka Yordan ba ng’om ma Yehova Mungu peri mio iri, nia ibirodo kidi iri, man ibifuyo kume kud ulobo:

³e ibigoro lembe ceke mi cik maeni i wie, kinde m’ikadhu lokaca: kara imond i ng’om ma Yehova Mungu peri mio iri, en e ng’om ma molo cak ku kic, calu Yehova, Mungu pa kwaru, ung’olo iri.

⁴E ebibedo, kinde ma wukadhu loka Yordan, nia wubirodo kidi maeni, m’ang’olo iwu tin, wi got Ebal, e wubifuyogi kud ulobo.

⁵E ibiguro pemblam ni Yehova Mungu peri kuca, pemblam mi kidi: kud itime ku jamtic mi nyunyu.

⁶Igur pemblam pa Yehova Mungu peri ku kidi m’apaya ngo; man ithier lam m’awang’a i wie ni Yehova Mungu peri:

⁷man ilam girathiera mi kwiocwiny, man icam kuca; e anyong’a negi i wang’ Yehova Mungu peri.

⁸Man ikieu lembe mi cik maeni ceke ngbeng’ wi kidine.

⁹E Musa giku julam ma Julawi giyero ni Israel ceke, giwacu kumae, Wuling’, man wuwinji, E Israel: Tin idoko dhanu pa Yehova Mungu peri.

¹⁰Ka kumeno iwor dwand Yehova Mungu peri, man itim lembang’ola pare ku cik pare, m’ang’olo iri tin.

¹¹E Musa ng’olo ni dhanu i ceng’ maeca nica, ewacu kumae,

¹²Maeni bicungo wi got Gerizim kara gimi mugisa ni dhanu, kinde ma wukadhu loka Yordan: Simeon, man Lawi, ku Yuda, man Isakar, ku Yusuf, man Benyamin.

¹³Man joni bicungo wi got Ebal ni kwong’; Ruben, ku Gad, man Acer, ku Zebulun, man Dan, ku Naftali.

¹⁴E Julawi biloko lembe, man gibiwacu ni dhanu ma co ceke mir Israel ku dwandgi ma tek kumae,

¹⁵Kwong’ ubed wi ng’atu m’utimo ayi m’acwia m’ang’ika kadi m’atwaga, en e ginmajudagu ni Yehova, tic mi cing’ jabodho, man eting’e malu ling’. E dhanu ceke gibiloko lembe gibiwacu kumae, Amen.

¹⁶Kwong’ ubed wi ng’atu m’ucayu won kadi min. E dhanu ceke biwacu kumae, Amen.

¹⁷Kwong’ ubed wi ng’atu m’ukabu kieu pa wadi. E dhanu ceke biwacu kumae, Amen.

¹⁸Kwong’ ubed wi ng’atu m’urwinyo abinga ku yo. E dhanu ceke biwacu kumae, Amen.

¹⁹Kwong’ ubed wi ng’atu m’uroco pokolembe p’umondo, ku kic, man dhaku ma cware tho. E dhanu ceke biwacu kumae, Amen.

²⁰Kwong’ ubed wi ng’atu m’uvuto ku dhaku pa won, kum eyabu dhu kendi pa won. E dhanu ceke biwacu kumae, Amen.

²¹Kwong’ ubed wi ng’atu m’uvuto ku lim moko. E dhanu ceke biwacu kumae, Amen.

²²Kwong’ ubed wi ng’atu m’uvuto ku nyamin, kadi nya won, kadi nyamin ma pa min. E dhanu ceke biwacu kumae, Amen.

²³Kwong’ ubed wi ng’atu m’uvuto ku dhamaru mire. E dhanu ceke biwacu kumae, Amen.

²⁴Kwong’ ubed wi ng’atu m’ugoyo wadi ling’. E dhanu ceke biwacu kumae, Amen.

²⁵Kwong’ ubed wi ng’atu m’ugamu jam ng’om kara eneg ng’atu ma dubo mbe i wie. E dhanu ceke biwacu kumae, Amen.

²⁶Kwong’ ubed wi ng’atu m’ukwero ketho lembe mi cik maeni ucungi kara etimgi. E dhanu ceke biwacu kumae, Amen.