Read Alur Poi Mi Cik 28 Bible Online

Poi Mi Cik 28 - Alur bible

Poi Mi Cik 28

¹Man ebitimbre, tek ibiwinjo dwand Yehova Mungu peri cu, man ibiketho cwinyi kum timo lembang’ola pare ceke m’ang’olo iri tin, nia Yehova Mungu peri bidodi malu wi thek ceke m’i ng’om:

²e mugisa maeni ceke bikwenyi, man gibirubi, tek ibiwinjo dwand Yehova Mungu peri.

³Mugisa bikwenyi i adhura, man mugisa bikwenyi i podho.

⁴Mugisa bikwanyu kodhi m’i ii, ku nying’ mi ng’om peri, ku kodhi mi lim peri, ku nyai mi dhiang’ peri, ku nyithindh udul rombe peri.

⁵Mugisa bikwanyu katoko peri kud ajiku kwen peri.

⁶Mugisa bikwenyi kinde m’imondo, man mugisa bikwenyi kinde m’iwok woko.

⁷Yehova bigoyo judegini i weng’i m’uai i wii: gibiwok i wii ku yo acel, man gibiringo i weng’i i yo abiro.

⁸Yehova bing’olo mugisa i wii i dero peri, man i gin ceke m’iketho cingi i kume: man ebimio mugisa iri i ng’om ma Yehova Mungu peri mio iri.

⁹Yehova biketho inyang’ ni thek ma leng’ ire gire, calu ekwong’o iri; tek ibigwoko lembang’ola pa Yehova Mungu peri, man ibiwotho i yo pare.

¹⁰E kodhidhanu ceke m’i ng’om bineno nia ilwongri ku nying Yehova; e lworo binegogi i kumi.

¹¹E Yehova bimedoi mi bero, kum kodhi m’i ii, man kum kodhi mi lim peri, man kum kodhi mi ng’om peri, i ng’om ma Yehova kwong’o ni kwaru nia ebimio iri.

¹²Yehova biyabu dhu piny m’akana pare ma polo iri, kara emi koth mi ng’om peri i nindone, man kara emi mugisa wi tic ceke m’i cingi: man ibimio banja ni thek dupa, e ibigamu banja ngo.

¹³Man Yehova bikethi ni wie, ni yib re ngo; e ibibedo ru malu kwa, e ibibedo nweng’ ungo; tek ibiwinjo lembang’ola pa Yehova Mungu peri, m’ang’olo iri tin, kara iketh cwinyi i kumgi m’itim kogi,

¹⁴man ilokri cen ungo kum lembe moko m’ang’olo iri tin, yo ku cing’ ma yor acwic, kadi ma yor acam, ya ilub tok mungu mange kara itim igi.

¹⁵Ento ebitimbre, tek ibiwinjo dwand Yehova Mungu peri ngo, miketh ko cwinyi kum timo lembang’ola pare ceke ku cik pare m’ang’olo iri tin, nia kwong’ maeni ceke biwok i wii, man gibirubi.

¹⁶Ibibedo akwong’a i adhura, man ibibedo akwong’a i podho.

¹⁷Katoko peri bibedo akwong’a kud ajiku kwen peri.

¹⁸Kodhi m’i ii bibedo akwong’a, ku nying’ ng’om peri, ku nyai mi lim peri, man nyithindh udul rombe peri.

¹⁹Ibibedo akwong’a kinde m’imondo, man ibibedo akwong’a kinde m’iwok woko.

²⁰Yehova bioro kwong’ i wii, kud ang’abacwiny, man juk, i gin ceke m’iketho cingi i kume ya itim, cil m’inyothri ko, man cil m’irwinyo ko pio; kum dubo mi giratima peri, m’iweka kudo.

²¹Yehova biketho thong’om umok i kumi, cil m’enyothi ko kud i ng’om, ka m’imondo i ie nimwonye.

²²Yehova bigoi ku thokor, man ku thonam, ku kwodokum, man ku cekkum, ku palamularu, man ku motho, ku laimo de; e gibiriemi cil m’inyothri ko.

²³E polo peri ma ni i wii malu bibedo lelele, man ng’om ma ni i theri bibedo nyunyu.

²⁴Yehova biketho koth mi ng’om peri ubed ni kwio kud utur: ebiai i polo ebiloro i wii, cil m’inyothri ko.

²⁵Yehova biketho jugoi i wang’ judegi peri; ibiwok i yo acel i wigi, man ibiringo i yo abiro i wang’gi: man jubikethi kun ku kun i kind thek ceke mi ng’om.

²⁶E avuji bibedo cemo ni winyo ceke ma kor polo, man ni yedi ceke m’i ng’om; e ng’atu moko mbe ma biriemogi.

²⁷Yehova bigoi ku vur ni Misiri, ku pong’ic, man ku nyac, kud agara de, ma kei ungo.

²⁸Yehova bigoi kud abelu, man ku loiwang’, man ku wang’uic mir adunde;

²⁹e ibiwotho kr kr ku dieceng’, calu abinga wotho kr kr i mudho, e mierolembe bikwenyi ngo i yo peri: e jubinuri ru anura man jubiyeki ru ayaka, e ng’atu moko m’ubodhi bibedo umbe.

³⁰Ibinyomo dhaku, e ng’atu mange bivuto kude: ibigomo ot, man ibibedo i ie ngo: ibipidho podho mir ulok, e ibicamu nyinge ngo.

³¹Koni dhiang’ peri jubinego i weng’i, e ibicamu kume moko ngo: jubiyaku kana peri i weng’i, e jubidwoke i beng’i ngo: jubimio rombe peri ni judegini, e ng’atu moko bibedo umbe iri m’ubodhi.

³²Woti ku nyigi bimire ni dhanu mange; e weng’i bineno tel, man ebivoc ni avagi m’unegi ceng’ du; man tego moko mbe ma bibedo i cingi.

³³Nying’ ng’om peri, ku tic mi muli peri ceke, thek m’ing’eyo ngo bicamu; e jubinuri ru anura man jubidii thiri thiri;

³⁴ketho nia abelu bimeki kum gin ma weng’i bineno.

³⁵Yehova bigoi i cong, man i tielo, ku vur ma rac, ma keire iri ngo, ugambre i tiendi cil i wii.

³⁶Yehova biteri, kud ubimo peri m’iketho i wii, ba thek ma fodi ing’eyo ngo, in kadi kwaru; e ibitimo ni mungu mange kuca, ma gi yen ku kidi.

³⁷E ibidoko ni wang’uic, man koi, ku cac, i kind kodhidhanu ceke ka ma Yehova biteri i ie cen.

³⁸Ibitero kodhi dit i podho, man ibicoko nyanok; kum bonyo bicame.

³⁹Ibipidho podho mir ulok man ibilwero kumgi, ento kadok amadha de ibimadhu pigulokne ngo, kadi ibicoko nyingulokne de ngo; kum ukoko bicamugi.

⁴⁰Ibibedo ku yendulam i kind kieu peri ceke, ento ibiwiri ngo ku moje; kum ulam peri bioyo nyinge.

⁴¹Ibinyolo nyithindho ma co ku nyithindho ma nyir, ento gibibedo peri ngo; kum gibicidho i ng’eca.

⁴²Yedhi peri ceke ku nying’ ng’om peri gibibedo ni bonyo.

⁴³Umondo ma ni i kindi biidho i wii malu malu; man ibidok piny piny.

⁴⁴Ebimio banja iri, e ibimio banja ire ngo: ebibedo ni wie, man ibibedo ni yib.

⁴⁵E kwong’ maeni ceke biwok i wii, man gibiriemi, e gibirubi, cil m’inyothri ko; kum iwinjo dwand Yehova Mungu peri ngo, kara igwok lembang’ola pare man cik pare m’eng’olo iri;

⁴⁶e gibibedo i wii ni giranyutha man ni wang’uic, man wi kodhini mi nja.

⁴⁷Kum itimo ni Yehova Mungu peri ngo ku mutoro, man ku berocwiny, ni kum sagri mi gin ceke;

⁴⁸ka kumeno ibitimo ni judegini ma Yehova bioro i wii, ku kec, man ku rieu, man ku muneru, man ku canpiny mi gin ceke: e ebiketho mberembere mi nyunyu i ng’uti, cil m’enyothi ko.

⁴⁹Yehova bikelo thek i kumi ku bor, kud i tung’ ng’om, calu acur m’uberingo; thek m’ibiwinjo dhoggi ngo;

⁵⁰thek ma wang’e tek, ma biparu pi wang’ judongo ngo, kadi binyutho bero de ngo ni awobi,

⁵¹m’ebicamu nying’ lim peri, ku nying’ ng’om peri, cil m’inyothri ko; ma biweko iri cam bende ngo, kadi pigulok ma nyasa, kadi mo, kadi nyai mi lim peri, kadi nyithindh udul rombe peri, cil ma ginyothi ko.

⁵²E gibitieki kud ali i dhugang’ peri ceke, cil ma gang’ peri ma tek ma wiu de birwombre ko, m’igeno gen ni kume, i ng’om peri ceke mba mba; e gibitieki kud ali i dhugang’ peri ceke i ng’om peri ceke mba mba, ma Yehova Mungu peri mio iri.

⁵³E ibicamu nying’ ring’kumi giri, ring’kum woti ku nyigi, ma Yehova Mungu peri mio iri, i atiek man i lem ma tek ma judegini biridi ko.

⁵⁴Ng’atu ma lebe lebe i kindwu, ma ng’ic hai, wang’e bibedo col yo bang’ umin mire, man yo ba dhaku mi kore, man yo ba dong’ nyithindho pare m’ebedo ko m’udong’;

⁵⁵ketho nia ebimio kum ring’ nyithindhe ngo m’ebicamu ni kindgi moko, kum ebedo ku gin moko ngo m’udong’ ire, i atiek man i lem ma tek ma jade gini biridi ko i dhugang’ peri ceke.

⁵⁶Dhaku ma lebe lebe ma ng’ic ma ni i kindwu, m’uyenyo ngo eponj nyono ng’om kum ng’icne ma lebe lebene, wang’e bibedo col yo ba nico pare mi kore, man yo ba wode, man yo ba nyare,

⁵⁷man yo ba nyathi pare m’uai i kind tiende, man yo ba nyithindhe m’ebinyolo; kum ebicamugi ling’ ling’ ni kum can mi gin ceke, i atiek man i lem ma tek ma judegini biridi ko i dhugang’ peri.

⁵⁸Tek ibiketho cwinyi kum timo lembe ceke mi cik maeni ma jukiewo i kitabu maeni ngo, kara ilwor nying’ maeni mi yung man mi ndiri, en e YEHOVA MUNGU PERI;

⁵⁹Yehova bilund ketho masendi peri bed ni wang’uic, man masendi mi kodhini, en e masendi ma dit, man mi bedo hai, ku tho ma rac, man mi bedo hai.

⁶⁰E ebikelo tho ceke mi Misiri i wii kendo, m’ilworo; e gibimoko i kumi.

⁶¹Tho kubang’e kubang’e bende, ku masendi kubang’e kubang’e, m’ugore i kitabu mi cik maeni ngo, de Yehova bikelo i wii, cil m’ibinyothri ko.

⁶²E welwu bidong’ nok, ento nwang’u wubedo calu cero m’i polo ni udul; kum iwinjo dwand Yehova Mungu peri ngo.

⁶³Man ebitimbre, nia, calu anyong’a nego Yehova i kumwu kara etimwu ber, man emedwu, e anyong’a binego Yehova i kumwu kumeca m’erwiny kowu, man m’enyoth kowu de; e jubiyakuwu kud i ng’om m’imondo i ie nimwonye.

⁶⁴E Yehova bikethi i kind kodhidhanu ceke, ugambre i kajik mi ng’om acel cil kum kajik mi ng’om mucelo; e ibitimo ni mungu mange kuca, ma fodi k’ing’eyo ngo, in kadi kwaru, en e mi yen man kidi.

⁶⁵Man i kind thek maeni ibinwang’u bedoyo ngo, man yom bibedo umbe ni die tiendi: ento Yehova bimio iri adunde ma miel kuca, ku corowang’, ku ng’eyong’ec mi ywak;

⁶⁶e kwo peri bibedo ji ji i weng’i; man lworo binegi dieceng’ ku diewor, e genogen mi kwo peri bibedo mbe.

⁶⁷Kugweno ibiwacu kumae, Mundo ande ebed uthieno ba! man uthieno ibiwacu kumae, Mundo ande ebed kugweno ba! ni kum lworo mir adundeni ma binegi, man ni kum nen mi weng’i m’ibineno.

⁶⁸E Yehova bidwoki i Misiri kendo ku combo, i yo m’awacu iri pire kumae, Ibinene kendo ngo: e wubing’ieuru giwu ni judegiwu kuca ni ng’eca man ni bong’, e ng’atu moko mbe ma bing’iewowu.