Read Alur Poi Mi Cik 29 Bible Online

Poi Mi Cik 29 - Alur bible

Poi Mi Cik 29

¹Maeni lembe mi lembariba ma Yehova ng’olo ya Musa tim ku nyithindho mir Israel i ng’om mi Moab, umed lembariba m’etimo kugi i Horeb.

²E Musa Lwong’o Israel ceke, man ewacu igi kumae, Wuneno gin ceke ma Yehova timo i weng’wu i ng’om Misiri kum Farao, man kum jutic pare ceke, man kum ng’om pare ceke;

³muloic ma dit ma weng’i neno, ku giranyutha, ku musana maeno ma dit:

⁴ento Yehova mio iwu adunde ngo mi ng’eyo, ku wang’ mi neno, man ith mi winjo, cil tin.

⁵Man atelo wiwu rundi pier ang’wen i langa: kendi mu ti i kumwu ngo, wara peri de ti ngo i tiendi.

⁶Wucamu kwen ungo, kadok pigulok kadi giramadha ma lake tek de wumadhu ngo; kara wung’ei nia an a Yehova Mungu mu.

⁷E kinde ma wutundo kakeni, Sihon m’ubimo mi Hecbon, man Og m’ubimo mi Bacan, giwok woko i wiwa ni lwiny, e wagoyogi:

⁸e wagamu ng’om migi, man wamie ni aba ni Jurubeni, man ni Jugadi, man ni ng’et suru mi Jumanase.

⁹Ka kumeno wugwok lembe mi lembariba maeni, man wutimgi, kara gin ceke ma wutimo ubed miero.

¹⁰Wucungo tin kewu ceke i wang’ Yehova Mungu mu; juwiwu, ku suru mu, man judongo mu, ku juwitic mu, en e dhanu ceke mir Israel,

¹¹nyithindho mu ma thindho, ku mondwu, man umondo ma ni i kind kagonjo peri, ugambre kum japaiyen peri cil kum jatwompi peri;

¹²kara imond i lembariba pa Yehova Mungu peri, man i kwong’ pare, ma Yehova Mungu peri timo kudi tin;

¹³kara eketh inyang’ tin ibed ni dhanu tin ire gire, man kara ebed iri ni Mungu, calu eyero iri, man calu ekwong’o ni kwaru, ni Ibrahim, ni Isak, man ni Yakobo.

¹⁴Kadi atimo lembariba maeni ku kwong’ maeni kudu kende ngo,

¹⁵ento ku ng’atu m’ucungo kudwa tin i wang’ Yehova Mungu mwa, man ku ng’atu ma ni kudwa tin ungo bende,

¹⁶(kum wung’eyo maram wabedo ko i ng’om Misiri, man maram wakadhu ko ku kind thek ma wuwotho i kindgi;

¹⁷man wuneno ginmajudagu migi, ku mungu m’araga migi, mi yen ku kidi, ku mola ma tar man mola ma kwar, ma ni i kindgi);

¹⁸kara ng’atu moko kud ubed i kindwu, ng’atu ma nico, kadi dhaku, kadi juot, kadi suru, ma adundene lokre cen tin ku ba Yehova Mungu mwa, kara ecidh etim ni mungu mi thek maeno; kara ulag piny kud ubed i kindwu ma cego adra ku sengi;

¹⁹e etimbre, kinde m’ewinjo lembe mi kwong’ maeni, nia emio mugisa ire gire i adundene, m’ewacu kumae, Cwinya bikwio, kadok awotho kud adundena m’udhuku, kara anyoth ma numu ku m’uthwo.

²⁰Yehova biweko ire ngo, ento ng’ecwiny pa Yehova ku nyeko pare biduny i kum ng’atuno, man kwong’ ceke m’ugore i kitabu maeni bibedo i wie, man Yehova bikabu nyinge woko ku the polo.

²¹E Yehova bikoye cen ni dubo kud i suru ceke mir Israel, calku kwong’ ceke mi lembariba m’ugore i kitabu maeni mi cik.

²²E dhanum’utuk m’ubino, en e nyithindho mu ma biai yo ng’eiwu, ku jawirok ma biai i ng’om ma ngbir, biwacu kumae, kinde ma gibineno masendi mi ng’om maeno, ku tho ma Yehova ketho ebedo ko lith;

²³man nia ng’ombe dho en e muganga, ku kadu, man girawang’a, nia jucoye ngo, kadi ecego nyinge de ngo, kadi lum moko de dongo i ie ngo, calu redh mi Sodom ku Gomora, man Adma ku Zeboim, ma Yehova redho ni kum ng’ecwiny pare, man ni kum kwinyo pare:

²⁴en e thek ceke gibiwacu kumae, Nedi Yehova timo kumeni kum ng’ombuni? thelembe mi lietho mi ng’ecwiny ma dit maeni en e ang’o?

²⁵Dhanu bilund wacu kumae, Kum giweko lembariba pa Yehova, Mungu pa kwarugi, m’etimo kugi kinde m’ewodhogi woko kud i ng’om Misiri,

²⁶e gicidho gitimo ni mungu mange, man girwo i bang’gi, mungu ma ging’eyo ngo, man m’emio igi ngo:

²⁷ka kumeno ng’ecwiny pa Yehova opo kum ng’om maeni kara ekel kwong’ ceke m’ugore i kitabu maeni i wie;

²⁸e Yehova mugogi kud i ng’om migi ku ng’ecwiny, man ku kwinyo, man ku ngbukni ma dit, man ebayugi i ng’om mange, calu ma tin.

²⁹E gin m’amung’a en e pa Yehova Mungu mwa; ento gin ma junyutho en e mwa man ni nyithindho mwa mi nja, kara watim lembe ceke mi cik maeni.