Read Alur Poi Mi Cik 3 Bible Online

Poi Mi Cik 3 - Alur bible

Poi Mi Cik 3

¹Walund walokra, man waidho yo mi Bacan: e Og m’ubimo mi Bacan uwok woko i kumwa, en ku dhanu pare ceke, ni lwiny i Edrei.

²E Yehova wacu ira kumae, Kud ilwore; kum amie, ku dhanu pare ceke, man ng’om pare, i cingi; man ibitimo i kume calu itimo kum Sihon m’ubimo mi Juamori, m’ubedo i Hecbon.

³Kum kumeno Yehova Mungu mwa mio Og bende, m’ubimo mi Bacan, ku dhanu pare ceke i cingwa: man wagoye maram ng’atu moko mbe m’udong’ ire.

⁴E wamaku adhura pare ceke i nindo maeca; adhura moko mbe ma wakumaku ngo i bang’gi; adhura pier abusiel, en e ng’om mir Argob ceke, ma ker pa Og i Bacan.

⁵Maeni ceke en e adhura ma judwoko tek ku gang’kidi ma wiu, man dhugang’, kud utwindi; umedo adhura dupa ma kume ju gang’ ungo.

⁶E wanyothogi kot, calu watimo kum Sihon m’ubimo mi Hecbon, ma wanyotho ko adhura ceke ma ie ju dhanu kubang’e kubang’e, ku mon man nyithindho ma thindho.

⁷Ento lim ceke, kud ayeki mir adhura, wagamu ni amaci iwa giwa.

⁸Man wayaku ng’om i nindo maeca kud i cing ubimo ario mi Juamori ma gini loka Yordan, ugambre i poga mir Arnon cil kum got Hennon

⁹(Hermonne Jusidoni lwong’o Sirion, man Juamori lwong’o Senir);

¹⁰adhura ceke mi pambu, man Gilead ceke, ku Bacan ceke, cil kum Saleka man Edrei, adhura mi ker pa Og i Bacon.

¹¹(Kum Og m’ubimo mi Bacan kende e m’udong’ mi dong’ Jurefai; nen, kavuto pare en e kavuto mi nyunyu; en e i Raba mi nyithindho mir Amon ungo? kaborne bot abung’wen, man kalacne bot ang’wen, calku bot dhanu.)

¹²Man ng’om maeni wagamu ni piny i nindo maeca: ugambre Aroer, ma ni ceng’ni poga mir Arnon, man ng’et ng’om gudi mi Gilead, kud adhurane, amio ni Jurubeni man ni Jugadi:

¹³man dong’ Gilead, ku Bacan ceke, ma ker pa Og, amio ni ng’et suru pa Manase: ng’om mir Argob ceke en e Bacan ceke. (Maeni julwong’o ng’om mi Refaim.

¹⁴Yair ma wod Manase maku yo bang’ Argob ceke, cil kum kieu mi Jugecuri ku Jumakathi, man elwong’ogi, Bacan, calku nyinge ma dhe, Havoth-yair, cil i ceng’ maeni.)

¹⁵Man amio Gilead ni Makir.

¹⁶Man amio ugambre Gilead cil kum poga mir Arnon ni Jurubeni man ni Jugadi, en e die poga, ku kieune, cil kum kulo Yabok, ma en e kieu mi nyithindho mir Amon;

¹⁷man Araba bende, ku Yordan man kieune, ugambre Cinereth utundo kum nam mir Araba, ma en e Nam Kadu, the kulo mi Pizga yo nyangu.

¹⁸Man ang’olo iwu i nindo maeca, awacu kumae, Yehova Mungu mu mio ng’om maeni iwu kara wumwonye; wukadh lokaca aronya ku jamtho i wang’ utumegwu ma nyithindho mir Israel, wu jukero ceke.

¹⁹Ento mondwu, ku nyithindho mu ma thindho, ku lim mu (ang’eyo nia wu weg lim dit), gibibedo i adhura mu m’amio iwu,

²⁰maram Yehova mio ko yom ni utumegwu, calu iwu, man gin bende gimwony ng’om ma Yehova Mungu mu mio igi loka Yordan: e wubidok ba piny, m’amio iwu kubeng’wu kubeng’wu.

²¹E ang’olo ni Yocuwa i nindo maeca, awacu kumae, Weng’i neno gin ceke ma Yehova Mungu mu timo kum ubimo ario maeni: Yehova bitimo kimieca kum ker ceke ka m’ikadhu kud i wie.

²²Kud wulworgi; kum Yehova Mungu mu, en e ng’atu m’ukiedo piwu.

²³Man ayenyo Yehova i nindo maeca, awacu kumae,

²⁴E Rwoth Yehova, imaku nyutho dwong’ peri, ku cingi ma tek ni jatic peri: kum Mungu ma nedi m’i polo kadi m’i ng’om, ma copo timo calku tic peri, man calku tic peri ma teki?

²⁵Akwei, wek akadh man anen ng’om ma ber maeno ma ni loka Yordan, got maeno ma ber, man Lebanon.

²⁶Ento kwinyo nego Yehova i kuma ni kumwu, e ewinja ngo; man Yehova wacu ira kumae, Eromo iri; kud iyer ira kendo pi lembe maeni.

²⁷Idh malu wi usimbru Pizga, man iting’ weng’i yo reto, ku yor ariwa ma malu, man yor ariwa ma piny, ku yo nyangu, man inen ku weng’i: kum ibikadhu loka Yordan maeni ngo.

²⁸Ento ing’ol ni Yocuwa, man idwok cwinye tek, imi ire tego de; kum ebikadhu i wang’ dhanu maeni, man ebiketho gigam ng’ombe ni aba m’ibineno.

²⁹Kum kumeno wabedo i poga yo ba Beth-peor.