Read Alur Poi Mi Cik 31 Bible Online

Poi Mi Cik 31 - Alur bible

Poi Mi Cik 31

¹E Musa cidho man eyero lembe maeni ni Israel ceke.

²Man ewacu igi kumae, Rundi para doko dak acel ku pier ario tin; acopo cidho woko ku mondo kendo ngo: man Yehova wacu ira kumae, Ibikadhu loka Yordan maeni ngo,

³Yehova Mungu peri, ebikadhu lokaca i weng’i; ebinyotho thek maeni kud i weng’i, man ibiyakugi: e Yocuwa, ebikadhu lokaca i weng’i, calu Yehova yero.

⁴E Yehova bitimo i kumgi calu etimo kum Sihon man kum Og, gin ubimo mi Juamori, man kum ng’om migi; m’enyotho.

⁵E Yehova bimiogi i weng’i, man wubitimo i kumgi calku lembang’ola ceke m’ang’olo iwu.

⁶Bed ku kero man ku tegocwiny ma ber, lworo kud unegi, kadi ndiri de kud unegi i kumgi: kum Yehova Mungu peri, en e ng’atu ma wucidho wukugi; ebirem iri ngo, kadi ebikuni de ngo.

⁷E Musa Lwong’o Yocuwa, man ewacu ire i wang’ Israel ceke kumae, Bed ku kero man cwinyi bed tek: kum ibicidho ku dhanu maeni i ng’om ma Yehova kwong’o ni kwarugi ya ebimio igi; e ibiketho gigame ni aba.

⁸E Yehova, en e ng’atu m’ucidho i weng’i; wubibedo wukude, ebirem iri ngo, kadok akuna de ebikuni ngo: lworo kud unegi, kadok cwinyi de kud ung’abre.

⁹E Musa kiewo cik maeni, man emie ni julam ma wot Lawi, m’uyeyo sanduk mi lembariba pa Yehova, man ni judongo ceke mir Israel.

¹⁰Musa ng’olo igi, ewacu kumae, I kajik rundi abiro kubang’e kubang’e, i nindo ma juketho mi rundi mi gony, i agba mi otbak,

¹¹kinde ma Israel ceke gibino kara ginyuthri i wang’ Yehova Mungu peri i ka m’ebigoyo wie, ibisomo cik maeni i wang’ Israel ceke i ithgi.

¹²Cok dhanu, co ku mon man nyithindho ma thindho, kud umondo peri ma ni i dhugang’ peri, kara giwinj, man kara gimak ng’eyo, man gilwor Yehova Mungu mu, man giketh cwinygi kum timo lembe ceke mi cik maeni;

¹³man kara nyithindhgi, ma fodung’eyo ngo, copo winjo, man gimak ng’eyo lworo Yehova Mungu mu, cil i nindo ceke ma wubedo ie kwo i ng’om ma wukadhu i ie loka Yordan nimwonye.

¹⁴E Yehova wacu ni Musa kumae, Nen nindo peri dhingo ceng’ni m’itbo i ie: lwong’ Yocuwa, man wuthieru giwu i hema mi cokri, kara ami ire kur. E Musa giku Yocuwa gicidho, man githieri gigi i hema mi cokri.

¹⁵E Yehova nyuthre i Hema i mbegi mir afuru: e mbegi mir afuru cungo wi dhugola mi Hema.

¹⁶E Yehova wacu ni Musa kumae, Nen, ibinindo ku kwaru: e dhanu maeni biai, man gibitimo tarwang’ tok mungu ma juwirok mi ng’om ka ma gicidho i ie kara gibed i kindgi, man gibiweka, e gibituro lembariba para m’atimo kugi.

¹⁷E ng’ecwiny para bilund opo i kumgi i ceng’ maeca, e abikunogi, man abipanu wang’a igi, e jubijigo wigi, man gin ma rac dupa ku can biwok i wigi; ketho nia gibiwacu i ceng’ maeca kumae, Gin ma rac maeni wok i kumwa kum Mungu mbe i kindwa ngo?

¹⁸E abipanu wang’a andha i ceng’ maeca kum dubo ceke ma gitimo, kum gilokri ba mungu mange.

¹⁹Ka kumeno nie wugor wer maeni iwu, man wuponj nyithindho mir Israel kude; kethe i dhoggi, kara wer maeni bed ira ni jamulembe kum nyithindho mir Israel.

²⁰Kum kinde m’akelogi i ng’om m’akwong’o ni kwarugi, ma molo cak ku kic, man ka gidaru camu giyeng’ de, man gicwe; e gibilund lokri ba mungu mange, e gibitimo igi, man gibicaya, gibituro lembariba para de.

²¹E ebitimbre, kinde ma lem ma rac dupa ku can uwok i wigi, nia wer maeni bituco lembe i wang’gi calu jamulembe; kum ebirwinyo ngo ku dhu nyikwaigi: kum ang’eyo lembapora migi ma giporo tin, ma fodi akelogi ngo i ng’om m’akwong’o.

²²Kum kumeno Musa goro wer maeni ceng’ nica, man eponjo kude nyithindho mir Israel.

²³Man emio km ni Yocuwa ma wod Nun, ewacu de kumae, Bed jakero man ku tegocwiny ma ber; kum ibitero nyithindho finir Israel i ng’om m’akwong’o igi: e wabibedo wakudi.

²⁴Man etimbre, kinde ma Musa daru goro lembe mi cik maeni i kitabu, maram githum ko,

²⁵nia Musa ng’olo ni Julawi, m’uyeyo sanduk mi lembariba pa Yehova, ewacu kumae,

²⁶Wugam kitabu maeni mi cik, man wukethe ng’et sanduk mi lembariba pa Yehova Mungu mu, kara ebed keca ni jamulembe i kumi.

²⁷Kum ang’eyo jai peri, ku ng’uti m’ucikre: nen, kinde ma fodi abedo kwo karacelo kudu tin, wu juco ni Yehova; e ka yo ng’ei tho para ke ebisagre kumani?

²⁸Wucok judongo ceke mi suru mu i bang’a, ku juwitic mu, kara ayer lembe maeni i ithgi, man alwong’ polo ku ng’om ni jumulembe i kumgi.

²⁹Kum ang’eyo yo ng’ei tho para wubinyothru giwu kol, man wubilokru cen kud i yo m’ang’olo iwu; e lem ma rac bipodho i wiwu i ceng’ ma cen; kum wubitimo gin ma rac i wang’ Yehova, mi nyayu ng’ecwiny i ie, ni kum tic mi cingwu.

³⁰E Musa yero lembe mi wer maeni i ith cokri mir Israel ceke, maram githum ko.