Read Alur Poi Mi Cik 32 Bible Online

Poi Mi Cik 32 - Alur bible

Poi Mi Cik 32

¹Wucik ithwu, wu polo, e abiyero; Man wek ng’om uwinj lembe m’i dhoga.

²Lemponji para bicwir calu koth; Wec para biton calu thoi, Calu ng’idho koth wi arusi, Man calu koth ma core vur wi uboko.

³Kum abiyero nying’ Yehova: Wumi dwong’ ni Mungu mwa.

⁴Cana, tic pare bedo ndhu cu; Kum yo pare ceke e pwe: Mungu mi lemandha man m’umbe dubo, En e pwe man atira.

⁵Ginyothri gigi, gi nyithindho pare ngo, en e mulima migi; Gi dhanum’utuk ma juco m’ugondri de.

⁶Wudwoko ni Yehova kumeno, E wu dhanu mi kasegu man m’umbe ku rieko? En e wuru ngo m’ung’iewi? Etimi, man eketho inyang’.

⁷Poi kum nindo ma con, Poi kum rundi mi dhanum’utuk dupa: Penj wuru, e ebinyutho iri; Judongo peri, e gibiyero iri.

⁸Kinde ma Ng’atu ma Malu Ngbir umio aba migi ni thek, Kinde m’ekoyo nyithindho mi dhanu, Eketho kieu mi kodhidhanu Calku wel mi nyithindho mir Israel,

⁹Kum makapiny pa Yehova en e dhanu pare; Yakobo en e gagi mir aba pare.

¹⁰Enwang’e i ng’om ngele, Man i langa ma ie nanu ma ng’oyo ndiri de; Etieke, egwoke, Egwoke calu nying wang’e.

¹¹Calu acur m’uyaku uthac pare, M’ulwadhu ku bombe ka wi nyithindhe, Eyaru bombe, egamugi, Eyeyogi wi bombe.

¹²Yehova kende e m’upeye, Man mungu ma jawirok umbe kude.

¹³Eketho eidho wi ka ma malu mi ng’om, Man ecamu nyai mi pothi; E eketho emadhu kic kud i cana, Man mo kud i cana ma ngeng’;

¹⁴Mo mi dhok, man cak mir udul rombe, Ku mio mi nyithi rombe, Man nyogi rombe ma kit mi Bacan, ku diegi, Karacelo ku mo mi mok nganu; Man imadhu pigulok kum rimo mi nyingulok.

¹⁵Ento Yecurun uewe, man egweyo: Icwe, kumi fung’ni, kumi leny; Elund eweko Mungu m’ucwie, Man eparu pi Cana mi both pare ngo.

¹⁶Ginyayu nyeko i ie ku mungu ma juwirok; Ginyayu ng’ecwiny i ie ku ginmajudagu.

¹⁷Gimio lam ni pajogi, ma gi Mungu ngo, Ni mungu ma ging’eyo ngo, Ni mungu ma nyen m’uwok kawono, Ma wegwu lworo ngo.

¹⁸Cana m’unyoli iparu pire ngo, Man wii wil kum Mungu m’unyoli.

¹⁹E Yehova neno maeni, man edagugi, Kum nyayu ng’ecwiny ma wote ku nyige ginyayu,

²⁰Man ewacu kumae, Abipanu wang’a i kumgi, Abineno maram kajik migi bibedo ko: Kum gi dhanum’utuk ma ng’oc dit, Nyithindho ma lemandha mbe i igi.

²¹Ginyayu nyeko i ia ku gin ma Mungu ngo; Ginyayu ng’ecwiny i ia ku gin migi ma kite mbe: Man anyayu nyeko i igi ku ju ma gi dhanu ngo; Abinyayu ng’ecwiny i igi ku thek ma jukusegu.

²²Kum mac uopo i ng’ecwiny para, Man ewang’ cil kum liel ma piny, Man ecamu ng’om ku nyai pare, Man ecwinyo the gudi.

²³Abirodo lem ma rac i wigi; Abilalu athero para i kumgi:

²⁴Gibimok ku kec, man lietho mi cukmac bicamugi Ku nyoth ma kec; Man abioro lak yedi i kumgi, Ku kwir mir ukoko ma lak i ng’om.

²⁵Yo woko palamularu bikelo can, Man i kusika ndiri; Ebinyotho awobi ku nyaku ma sumba, Mukere ku ng’atu ma wie ju lwar.

²⁶Awacu nia abikethogi ngbir, Nia abiketho poi ma pigi ujik i kind dhanu;

²⁷Tek en e nia alworo kwinyo pa jadegi ngo, Jusend migi maru kier ku pokolembe, Gimaru wacu kumae, Cingwa yungre, Man Yehova timo maeni ceke ngo.

²⁸Kum gi thek ma porolembe mbe kugi, Man ng’eyothelembe mbe i igi.

²⁹A tek gi riek, ma nia ging’ei maeni, Kara gipar pi kajik migi ma cen!

³⁰Ng’atu acel copo riemo rubanga nenedi, Man juario tugo rubanga apar ku ng’wec nenedi, Tek Cana migi ku ng’iewogi ngo, Man Yehova miogi ngo?

³¹Kum cana migi en e calu Cana mwa ngo, Cil judegi mwa gigi ma gi jupoklembe.

³²Kum ulok migi en e mir ulok mi Sodoma, Man mi pothi mi Gomora: Nyingulok migi en e nyingulok mir ulecu, With ulok migi gi kec:

³³Pigulok migi en e kwir mi thwol, Man kwir ma rac mi pino.

³⁴Maeni jukanu i bang’a ngo, Ma jumwono ayi i kume i kind piny m’akana para ngo?

³⁵Kwor en e para, ku culo, I nindo ma tiendgi bikier i ie: Kum nindo mi ruvwa migi ni ceng’ni, Man gin ma bibino i wigi biwok pio.

³⁶Kum Yehova bipoko lembe mi dhanu pare, Man ebiloko cwinye gire kum jutic pare; Kinde m’eneno nia tego migi rwinyo, Man moko mbe m’udong’, ma juciko bang’e kadi ma bang’e thwolo.

³⁷Man ebiwacu kumae, Mungu migi ni kani, Cana ma gipondo i ie;

³⁸Ma camu mio mi lam migi, Ma madhu pigulok mi lam m’amadha migi? Wek giai malu gikonywu, Wek gibed ni jamgwok mu.

³⁹Nen kawono nia an, cil an, an a en, Man mungu moko mbe ma wakude: Anego, man aketho cer; Atong’o lero, man acangu: Man ng’atu moko mbe ma copo bodho kud i cinga.

⁴⁰Kum ating’o cinga yor i polo, Man awacu kumae, Calu abedo kwo mi nja,

⁴¹Tek apaku palamularu para ma rieny, Man cinga maku pokolembe; Abiculo kwor kum jusendna, Man abiculo kum ju m’udaga.

⁴²Abimero athero para ku rimo, Man palamularu para bicamu ring’kum; Ku rimb ju ma junego man jukol, Ku ba juwi jutelwic mi judegi.

⁴³Anyong’a negwu, E wu thek, ku dhanu pare: Kum ebiculo wang’ rimb jutic pare, Man ebiculo kwor kum jusendne, Man ebitimo adunya pi ng’om pare, pi dhanu pare.

⁴⁴E Musa bino man eyero lembe ceke mi wer maeni i ith dhanu, en, man Hoceya ma wod Nun.

⁴⁵E Musa daru yero lembe maeni ceke ni Israel ceke;

⁴⁶man ewacu igi kumae, Wuketh cwinywu kum lembe ceke m’atuco iwu tin, ma wubing’olo ni nyithindho mu nia giketh cwinygi kum timo, en e lembe ceke mi cik maeni.

⁴⁷Kum en e gin mananu ngo iwu; kum en e kwo mu, kum wubimedo nindo mu i ng’om ni kum gin maeni, ka ma wukadhu Yordan nimwonye.

⁴⁸E Yehova yero ni Musa i ceng’ maeca nica, ewacu kumae,

⁴⁹Idh malu wi got maeni mir Abarim, ba got Nebo, ma ni i ng’om Moab, ma ni i wang’ Yeriko; e inen ng’om Kanan, m’amio ni nyithindho mir Israel ni piny;

⁵⁰man itho wi got m’iidho i wie, e icokri de ba juthu, calu Harun m’umeru tho wi got Hor, man jucoke ba juthugi:

⁵¹kum wudubo ira i kind nyithindho mir Israel ba pi mi Meriba mi Kadec, i langa mi Zin; kum wudwoka leng’ ungo i kind nyithindho mir Israel.

⁵²Kum ibineno ng’ombe i weng’i; ento ibicidho kuca ngo i ng’om m’amio ni nyithindho mir Israel.