Read Alur Poi Mi Cik 33 Bible Online

Poi Mi Cik 33 - Alur bible

Poi Mi Cik 33

¹Man mugisa maeni en e mugisa ma Musa ma dhanu pa Mungu mio ni nyithindho mir Israel ma fodi etho ngo.

²Ewacu kumae, Yehova ai i Sinai, Eai i kumgi kud i Seir; Erieny ku wi got Paran, Man eai kud i kind jumaleng’ rubanga apar: Cik mi mac ni yor i cinge ma yor acwic igi.

³Eyo, emaru suru mi dhanu; Jumaleng’ pare ceke ni i cingi: E gibedo piny the tiendi; Kubang’gi ceke ng’atuman bijolo kum lembe peri.

⁴Musa ng’olo iwa cik, Aba ni cokri pa Yakobo.

⁵Man en e ubimo i Yecurun, Kinde ma juwidhanu cokri, Suru ceke mir Israel karacelo.

⁶Wek Ruben ubed kwo, man kud etho; Kadi dhanu pare de ku gibed nok.

⁷Man maeni mugisa pa Yuda: e ewacu kumae, Yehova, winj dwand Yuda, Man iroye ba dhanu pare. Eii ku cinge i kume gire; Man ibibedo jakony kum jusend pare.

⁸Man pi Lawi ewacu kumae, Thumim peri kud Urim peri gini karacelo ku dhanu peri ma ayi Mungu ni i kume, M’imulo ie i Masa, M’i-ii kude dhu pi mi Meriba;

⁹M’uwacu pi won, man pi min kumae, Anene ngo; Kadok utumin mire de eyiogi ngo, Kadi nyithindhe ma dhe de eng’eyogi ngo: Kum giketho cwinygi kum lembe peri, Man gigwoko lembariba peri.

¹⁰Gibiponjo Yakobo ku lembapoka peri, Man Israel ku cik peri: Gibiketho udok ma ng’wice ng’ar i weng’i, Ku lam m’awang’a ma dho wi pemblam peri,

¹¹Yehova, mi mugisa kum piny pare, Man ijol tic m’i cinge: Goi pier ju m’uai i kume, Man mi ju m’udage, kara ku giai kendo.

¹²Pi Benyamin ewacu kumae, Jumer pa Yehova bibedo museme i bang’e; Eume ceng’ duu, Man ebedo kind goke.

¹³Man pi Yusuf ewacu kumae, Mugisa pa Yehova bed i ng’om pare, Pi giki ma pire tek mi polo, pi thoi, Man pi gin ma thuth ma ni piny,

¹⁴Man pi giki ma pire tek mi nying’ ceng’, Man pi giki ma pire tek mi med mi dwi.

¹⁵Man pi giki ma cu mi gudi ma con, Man pi giki ma pire tek mir ungulu gudi mi nja,

¹⁶Man pi giki ma pire tek mi ng’om ku pong’ne, Man bero pa ng’atu m’ubedo i kind yen ma thindho. Wek mugisa wok i wi Yusuf, Man i die wi ng’atu m’ukoc ku utimin mire.

¹⁷Kayu mi dhok pare, dwong’ en e pare; Man tunge gi tung jobi: Ebicwalu kugi kodhidhanu ceke, cil i tung’ ng’om: Man gin gi rubanga apar pa Efraim, Man gin gi rubanga pa Manase.

¹⁸Man pi Zebulun ewacu kumae, Anyong’a negi Zebulun, i wokwoko peri; Man Isakar, i hema peri.

¹⁹Gibilwong’o kodhidhanu gibin ba got; Gibithiero lam mi bedopwe kuca; Kum gibidhodho dit mi nam, Ku piny m’akana m’ubedo apana i kwio.

²⁰Man pi Gad ewacu kumae, Mugisa kwany ng’atu m’umedo Gad: Ebedo calu min umvor, Eyeco bot, eyo, die wie.

²¹E efoyo ng’ete ma kwong’a ire gire. Kum jukanu makapiny pa jamicik; Man ebino ku juwidhanu; Etimo bedopwe pa Yehova, Ku lembapoka pare kud Israel.

²²Man pi Dan ewacu kumae, Dan en e nyathin umvor, M’upiei woko kud i Bacan.

²³Man pi Naftali ewacu kumae, E Naftali, juyeng’i ku bero, Man ipong’ ku mugisa pa Yehova, Mwony yo reto ku ma yor ariwa ma piny.

²⁴Man pir Acer ewacu kumae, Mugisa kwany Acer ku nyithindho; Wek eyire ni utumin mire, Wek eroi tiende i mo.

²⁵Utwindi peri bibedo nyunyu man mola; Man calu nindo peri; tego peri bibedo kumeca.

²⁶Ng’atu moko mbe ma calu Mungu, E Yecurun, M’uwotho kud i polo ni kony peri, Man wi afuru i dwong’ pare.

²⁷Mungu ma nja en e kabedo peri, Man bot ma rondo ku rondo ni yo piny. Man ecwalu jadegi woko kud i weng’i, Man ewacu kumae, Nyothi.

²⁸E Israel ubedo museme, Kulo pa Yakobo kende, I ng’om mi cam ku pigulok ma nyasa; Eyo, polo pare ewiro thoi.

²⁹In i jamugisa, E Israel: Ng’a ma calu in, ma dhanu ma Yehova bodho, Ban mi kony peri, Man palamularu mi dwong’ peri! Man judegini bijwigri iri; Man ibinyono ka ma malu migi.