Read Alur Poi Mi Cik 34 Bible Online

Poi Mi Cik 34 - Alur bible

Poi Mi Cik 34

¹E Musa idho malu kud i pambu mi Moab kum got Nebo, wi bith Pizga, ma ni yo ba Yeriko. E Yehova nyutho ire ng’om Gilead ceke, cil kum Dan,

²ku Naftali ceke, man ng’om mir Efraim ku Manase, ku ng’om ceke pa Yuda, cil kum nam ma yo reto,

³man yor ariwa ma piny, man pambu mi poga mi Yeriko ma adhura mi thith, cil kum Zoar.

⁴E Yehova wacu ire kumae, Maeni ng’om m’akwong’o ni Ibrahim, ni Isak, man ni Yakobo, m’awacu kumae, Abimie ni kodhini: aketho inene ku weng’i, ento ibikadhu kuca ngo.

⁵Kum kumeno Musa ma jatic pa Yehova tho kuca i ng’om mi Moab, calku lembe pa Yehova.

⁶E eyike i poga i ng’om mi Moab yo ba Beth-peor: ento ng’atu moko mbe m’ung’eyo ka liel pare cil tin.

⁷Man rundi pa Musa kinde m’etho en e dak acel ku pier ario: nwang’u fodi wang’e maku cor ungo, kadi tego pare mi kum de fodi udoko ng’ic ungo.

⁸E nyithindho mir Israel uywagu Musa i pambu mi Moab ceng’ pier adek: kum kumeno ceng’ mi ywak mi ywagu ywak pa Musa thum.

⁹Man Yocuwa ma wod Nun upong’ ku tipo mi rieko; kum Musa ketho cinge i wie: man nyithindho mir Israel uwinjo dwande, man gitimo calu Yehova ng’olo ni Musa.

¹⁰Man jabila fodi uwok ungo i kind Israel ma calu Musa, ma Yehova ng’eyo wang’ ku wang’,

¹¹i giranyutha ceke ku musana, ma Yehova ore nitimo i ng’om Misiri, kum Farao, man kum jutic pare ceke, man kum ng’om pare ceke,

¹²man i cing’ ma tek ceke, man i ndiri ma dit ceke, ma Musa timo i wang’ Israel ngung’.