Read Alur Poi Mi Cik 4 Bible Online

Poi Mi Cik 4 - Alur bible

Poi Mi Cik 4

¹Man kawono, E Israel, wuwinj cik man lembapoka, m’aponjo kowu, kara wutimgi; kara wubed kwo, man wumond wumwony ng’om ma Yehova, Mungu pa kwaruwu, umio iwu.

²Kud wumed kum lembe m’ang’olo iwu, kadok kume moko de kud wukabi, kara wuwor lembang’ola pa Yehova Mungu mu m’ang’olo iwu.

³Weng’wu neno gin ma Yehova timo ni kum Bal-peor; kum dhanu ceke m’ulubo Bal-peor, Yehova Mungu peri nyothogi kud i kindi.

⁴Ento wun ma wumoko kum Yehova Mungu mu wubedo kwo i ceng’ maeni kubeng’wu kubeng’wu.

⁵Nen aponjowu ku cik man lembapoka, cil calu Yehova Mungu para ng’olo ira, kara wutim kumeno i kind ng’om ka ma wumondo i ie kara wumwonye.

⁶Ka kumeno wuwor man wutimgi; kum maeni en e rieko mu man ng’eyothelembe mu i wang’ kodhidhanu, ma biwinjo cik maeni ceke, man gibiwacu kumae, Andha thek maeni ma dit en e dhanu ma riek man weg ng’eyothelembe.

⁷Kum thek ma dit ma kani ma nuti m’ubedo ku mungu ma ceng’ni i bang’gi kumeni, calu Yehova Mungu mwa bedo kinde ma tek walwong’e?

⁸Man thek ma dit ma kani ma nuti, m’ubedo ku cik ku lembapoka ma pwe kumeni calu cik maeni ceke, m’aketho i weng’wu i ceng’ ma tini?

⁹Ndhu ibed ku weng’i i kumi giri, man igwok ng’eyong’ec peri cu, kara wii kud uwil kum gin ma weng’i neno, man kara ku giai kud i adundeni i nindo mi kwo peri ceke; ento keth ging’eiri ni nyithindhoperi man ni nyithindho mi nyithindho peri;

¹⁰ceng’ m’icungo i Wang’ Yehova Mungu peri i Horeb, kinde ma Yehova wacu ira kumae, Cok ira dhanu, man abiketho giwinj lembe para, kara gimak ng’eyo lwora i nindo ma gibedo i ie kwo i ng’om, man kara giponj nyithindhgi.

¹¹E wubino ceng’ni man wucungo the got; e gode Wang’ ku mac cil kum adunde mi polo, ku mudho, kud afuru man mudho ma bi.

¹²E Yehova-yero iwu kud i die mac: wuwinjo dwal mi lembe, ento wu neno ayi gin moko ngo; wuwinjo dwal kende.

¹³Man eyero iwu lembariba pare, m’eng’olo iwu ya wutim, en e lembang’ola apar; man ekiewogi wi bankidi ario.

¹⁴Man Yehova rig’blo ira i nindo maeca nia aponjwu ku cik man lembapoka, kara wutimgi i ng’om ma wukadhu lokaca nimwonye.

¹⁵Ka kumeno wubed ku weng’wu i kumwu giwu; kum wuneno ayi moko ki ngo i ceng’ ma Yehova yero iwu i Horeb kud i die mac;

¹⁶kara kud wunyothru giwu, man wutim giracwia m’angika iwu calu ayi gin moko, ayi mi co kadi mi mon,

¹⁷ayi mi yedi moko ma ni wi ng’om, ayi mi winyo moko ma ju bombe ma ringo kor polo,

¹⁸ayi gin moko ma lak i ng’om, ayi rec moko ma ni i pi the ng’om;

¹⁹man kara kud itwor weng’i i polo, man kinde m’ineno ceng’ ku dwi man cero, en e udul ceke m’i polo, iyweiri cen man irwo igi, itim: igi de, ma Yehova Mungu peri poko mi kodhidhanu ceke ma the polo ngung’.

²⁰Ento Yehova gamuwu, man ewodhowu woko kud i uka mi nyunyu, kud i Misiri, kara wubed ire ni dhanu mir aba, calu i ceng’ ma tin.

²¹Man kendo ng’ecwiny unego Yehova i kuma ni kumwu, man ekwong’o nia kud akadh loka Yordan, man kud amond i ng’om maeno ma ber, ma Yehova Mungu peri mio iri ni aba:

²²ento akoatho i ng’om maeni be, kud akadh Yordan ki; ento wubikadhu lokaca, man wubimwonyo ng’om maeca ma ber.

²³Wubed ku weng’wu i kumwu giwu, kara wiwu kud uwil kum lembariba pa Yehova Mungu mu, m’etimo kudu, man wutim giracwia m’ang’ika iwu kud ayi gin moko ma Yehova Mungu peri kwero iri.

²⁴Kum Yehova Mungu peri en e mac ma wang’, Mungu ma won nyeko.

²⁵Kinde m’ibinyolo nyithindho, man nyithindho mi nyithindho, ma wubin wubedo hai i ng’ombe, ma wubin wunyothru giwu, ma wutimo ko ayi giracwia m’ang’ika kud ayi gin moko, ma wubin wutimo gin ma rac i wang’ Yehova Mungu peri, kara wunyai ng’ecwiny i ie;

²⁶alwong’o polo ku ng’om ubed jumulembe i kumwu tin, nia wubinyothru kawono ma gwei kud i ng’om ka ma wukadhu i ie loka Yordan kara wumwonye; wubidaru nindo dupa’ngo i wie, ento wubinyothru ma gwei.

²⁷E Yehova bikethowu i kind kodhidhanu, man wel mu bidong’ nok i kind thek, ka ma Yehova biterowu i ie cen.

²⁸E wubitimo ni mungu kuca, ma tic mi cing’ dhanu, yen ku kidi ma neno ngo, kadi ma winjo de ngo, kadi ma camu de ngo, kadi ma ng’wio de ngo.

²⁹Ento ku kuca ibiyenyo Yehova Mungu peri, e ibinwang’e, kinde m’iyenye kud adundeni ceke man ku ng’eyong’ec peri ceke.

³⁰Kinde m’ini i masendi, man gin maeni ceke wok i kumi, i ceng’ ma cen ibidwogo ba Yehova Mungu peri, e ibiwinjo dwande:

³¹kum Yehova Mungu peri en e Mungu mi kisa; ebiweki ngo, kadi ebinyothi de ngo, kadi wie de biwil ungo kum lembariba pa kwaru m’ekwong’o igi.

³²Kum kawono penj pi nindo m’ukadhu, m’ubedo ma kwong’a i weng’i, ugambre i ceng’ ma Mungu cwio ie dhanu wi ng’om, man ugambre kum kajik polo acel cik kum mucelo, tek wadi gin moko ma calu lembe ma dit maeni bedo nuti, kadi awinja de calu maeni?

³³Dhanu winjo dwand Mungu weco kud i kind mac, calu iwinjo, man gibedo kwo?

³⁴Kadi Mu ngu ponjo cidho man egamu ire thek kud i die thek mange, ku lem ma tek, ku giranyutha, man ku musana, ku lwiny de, man ku cing’ ma tek, ku bot m’arieya de, man ku ng’oyondiri ma dit, calku gin ceke ma Yehova Mungu mu timo iwu i Misiri i weng’wu?

³⁵Junyutho maeni iri, kara ing’ei nia Yehova en e Mungu; mange mbe en e kende.

³⁶Eketho iwinjo dwande kud i polo, kara eponji: man i ng’om eketho ineno mac pare ma dit; man iwinjo lembe pare kud i die mac.

³⁷Man kum emaru kwaru, ka kumeno egoyo wi kodhigi yo ng’eigi, man ewodhoi woko ku wang’e, ku tego pare ma dit, kud i Misiri:

³⁸kara eriem thek kud i weng’i ma gi dit gi tek de ma sagu in, kara eroi i ie, kara emi iri ng’om migi ni aba, calu ma tin.

³⁹Ka kumeno ng’ei tin, man iketh adundeni i kume, nia Yehova en e Mungu ma malu i polo man ma piny i ng’om; mange mbe.

⁴⁰Man igwok cik pare, ku lembang’ola pare, m’ang’olo iri tin, kara ibed ber, ku nyithindho peri yo ng’ei, man kara nindo peri ton hai i ng’om, ma Yehova Mungu peri mio iri, mi nja.

⁴¹Musa lund ukoyo adhura adek loka Yordan yo ku wokceng’;

⁴²kara janek copo ringo kuca, m’unego wadi aka ngo, ma k’edage ngo con; man ku ringo bang’ adhura acel ma kind maeni ecopo bedo kwo:

⁴³adhurane e eni: Bezer i langa, i ng’om pambu, ni Jurubeni: man Ramoth i Gilead, ni Jugadi; man Golan i Bacan, ni Jumanase.

⁴⁴Man maeni cik ma Musa ketho i wang’ nyithindho mir Israel:

⁴⁵maeni lembatuca, ku cik, man lembapoka, ma Musa yero ni nyithindho mir Israel, kinde ma giai i Misiri,

⁴⁶loka Yordan, i poga yo ba Beth-peor, i ng’om pa Sihon m’ubimo mi Juamori, m’ubedo i Hecbon, ma Musa ku nyithindho mir Israel gigoyo, kinde ma giai kud i Misiri.

⁴⁷Man gigamu ng’om pare ni piny, ku ng’om pa Og m’ubimo mi Bacan, gin ubimo ario mi Juamori, ma gini loka Yordan yo ku wokceng’;

⁴⁸ugambre Aroer, ma ni dhu poga mir Arnon, cil kum got Sayuni (en e Hermon),

⁴⁹man Araba ceke loka Yordan yo nyangu, cil kum nam mir Araba, the kulo mi Pizga.