Read Alur Poi Mi Cik 5 Bible Online

Poi Mi Cik 5 - Alur bible

Poi Mi Cik 5

¹E Musa lwong’o Israel ceke, man ewacu igi kumae, E Israel, winj cik ku lembapoka m’ayero i ithwu tin, kara wumak ng’eyogi, man wuketh cwinywu nitimogi.

²Yehova Mungu mwa timo lembariba kudwa i Horeb.

³Yehova timo lembariba maeni ku kwaruwa ngo, ento kudwa, wan, ma kawa ceke wani keni ma kwo tin.

⁴Yehova weco kudu wang’ ku wang’ wi got kud i die mac

⁵(acungo i kind Yehova ku wun i nindo maeca, kara anyuth iwu lembe pa Yehova: kum lworo negowu kum mac, man wuidho malu wi got ungo), ewacu kumae,

⁶An a Yehova Mungu peri, m’uwodhi kud i ng’om Misiri, kud i ot mi ng’eca.

⁷Kud ibed ku mungu mange ndhu an.

⁸Kud itim iri ayi m’ang’ika, kadi ayi gin moko ma malu i polo, kadi ma ni piny i ng’om, kadi ma ni i pi the ng’om:

⁹kud irumbri i bang’gi, katii kud itim igi; kum an, an a Yehova Mungu peri, an a Mungu ma won nyeko, m’aketho dubo mi wego wi nyithindho, man wi dhanum’utuk mir adege man mir ang’wende mi ju m’udaga;

¹⁰m’anyutho kisa de ni dhanum’utuk rubanga ni ju m’umara man m’ugwoko cik para.

¹¹Kud ilwong’ nying’ Yehova Mungu peri mananu: kum ng’atu m’uhyong’o nyinge mananu Yehova bikwane ngo y a embe ku dubo.

¹²Kwir ceng’ sabatu, ubed leng’, calu Yehova Mungu peri ng’olo iri.

¹³Ceng’ abusiel tim tic, tim tic peri ceke de;

¹⁴ento ceng’ mir abirone en e ceng’ sabatu ni Yehova Mungu peri: kud itim tic moko i ie, in, kadi wodi, kadi nyeri, kadi jatic peri ma nico, kadi bong’ peri, kadi koni dhiang’ peri kadi kana peri, kadi lim peri moko, kadi welo peri ma ni dhugang’ peri; kara jatic peri ma nico ku bong’ peri uyom calu in.

¹⁵Man ipoi nia naka in i jatic i ng’om Misiri, man Yehova Mungu peri wodhi woko ku kuca ku cing’ ma tek man ku bot m’arieya: ka kumeno Yehova Mungu peri ng’olo iri ya ikwir ceng’ sabatu.

¹⁶Yung wuru ku meru, calu Yehova Mungu peri ng’olo iri; kara nindo peri ton hai, man kara ibed ber i ng’om ma Yehova Mungu peri mio iri.

¹⁷Kud ineg nek.

¹⁸Kadi kud idubri swa.

¹⁹Kadi kud ikwal kwo.

²⁰Kadi kud ibal wedu.

²¹Kadi kud iketh cwinyi kum ci wedu; kadi kud iketh cwinyi kum ot pa wedu, kadi podho pare, kadi jatic pare ma nico, kadi bong’ pare, kadi koni dhiang’ pare, kadi kana pare, kadi gin moko ma tek wedu bedo ko.

²²Yehova yero lembe maeni ni cokri mu ceke wi got kud i die mac, mir afuru, man mi mudho ma bii, ku dwal ma dit: e emedo moko ngo. Man ekiewogi wi bankidi ario, e emiogi i bang’a.

²³Man etimbre, kinde ma wuwinjo dwal m’uai i die mudho, kinde ma got ubegigini ku mac, nia wucoro ceng’ni an, en e juwi suru mu ceke, ku judongo mu;

²⁴man wuwacu kumae, Nen, Yehova Mungu mwa nyutho dwong’ pare man dit pare iwa, e wawinjo dwande ai kud i die mac: waneno tin nia Mungu weco ku dhanu, man ebedo kwo.

²⁵Ka kumeno pirang’o watho? kum mac ma dit maeni binyothowa: tek wawinjo dwand Yehova Mungu mwa kendo, e wabilund tho.

²⁶Kum ng’a mi kind jo ceke ma weg kum, m’uwinjo dwand Mungu ma kwo m’ubeweco kud i die mac, calu wan wawinjo, man gibedo kwo?

²⁷Icor ceng’ni, man iwinj gin ceke ma Yehova Mungu mwa biwacu: man iyer iwa gin ceke ma Yehova Mungu mwa biyero iri; e wabiwinje, man wabitime.

²⁸E Yehova winjo dwal mi lembe mu, kinde ma wuyero ira; man Yehova wacu ira kumae, Awinjo dwal mi lembe mi dhanu maeni, ma giyero iri: giyero dre gin ceke ma giyero.

²⁹A tek gibedo ku wadi adunde maeni, kara gilwora, man gigwok lembang’ola para ceke thiri thiri, kara gibed ber, gin ku nyithindho migi mi nja!

³⁰Cidh iwac igi kumae, Wudok ba hema mu.

³¹Ento in, icung keni i bang’a, man abiyero iri lembang’ola ceke, ku cik, man lembapoka, m’ibiponjo kogi, kara gitimgi i ng’om m’abimio igi kara gimwonye.

³²Ka kumeno wuketh cwinywu kum timo calu Yehova Mungu mu ng’olo iwu: kud wulokru cen i cing’ ma yor acwic kadi ma yor acam.

³³Wuwoth i yo ceke ma Yehova Mungu mu ng’olo iwu, kara wubed kwo, man kara wubed ber, man kara wuketh nindo mu ton hai i ng’om ma wubimwonyo.