Read Alur Poi Mi Cik 6 Bible Online

Poi Mi Cik 6 - Alur bible

Poi Mi Cik 6

¹Nie maeni lembang’ola, ku cik, man lembapoka, ma Yehova Mungu mu ng’olo ya juponj kowu, kara wutimgi i ng’om ma wucidho i ie nimwonye;

²kara ilwor Yehova Mungu peri, kara igwok cik pare ceke ku lembang’ola pare, m’ang’olo iri, in, ku wodi, man wod wodi, i nindo ceke mi kwo peri; man kara nindo peri ton hai.

³Ka kumeno winj, E Israel, man inen kara itime; kara ibed ber, man kara wumedru dit ku tego, calu Yehova, Mungu pa kwaru, ung’olo iri, i ng’om ma molo cak ku kic.

⁴Winj, E Israel: Yehova Mungu mwa en e Yehova acel:

⁵man imar Yehova Mungu peri kud adundeni ceke, man ku ng’eyong’ec peri ceke, man ku tegoni ceke.

⁶E lembe maeni, m’ang’olo iri tin, bibedo wi adundeni;

⁷man iponjgi cu ni nyithindho peri, man iwec pigi itinde m’ibedo i ot peri, man kinde m’iwotho i yo, man kinde m’ivuto piny, ku kinde m’iai malu.

⁸Man itwigi ni giranyutha i cingi, man gibibedo mi bero i kind weng’i.

⁹Man igorgi wi mbegi mi dhugola mi ot peri, man wi dhugang’ peri.

¹⁰Man ebibedo, kinde ma Yehova Mungu peri biteri i ng’om m’ekwong’o ni kwaru, ni Ibrahim, ni Isak, man ni Yakobo, ya emi iri, adhura ma dit ma ber de, m’igomo in ungo,

¹¹man udi m’upong’ ku gin ceke ma ber, m’ipong’o in ungo, ku kulo m’atong’a, m’itong’o in ungo, podho mir ulok ku yendulam, m’ipidho in ungo, e ibicamu ibiyeng’ de;

¹²e ikuri giri wii maru wil kum Yehova, m’uwodhi woko kud i ng’om Misiri, kud i ot mi ng’eca.

¹³Lwor Yehova Mungu peri; man itim ire, man ikwong’ ku nyinge.

¹⁴Kud ilub tok mungu mange, mi mungu mi dhanu m’utieki gbur;

¹⁵kum Yehova Mungu peri i kindi en e Mungu ma won nyeko; ng’ecwiny pa Yehova Mungu peri maru opo i wii, man emaru nyothi kud i wang’ ng’om.

¹⁶Kud wubidh Yehova Mungu mu, calu wubidhe i Masa.

¹⁷Wugwok lembang’ola pa Yehova Mungu mu, ku lembatuca pare, man cik pare, m’eng’olo iri.

¹⁸Man itim gin ma pwe man ma ber i wang’ Yehova; kara ibed ber, man kara imond man imwony ng’om ma ber ma Yehova kwong’o ni kwaru,

¹⁹kara uriem judegi peri ceke woko kud i weng’i, calu Yehova yero.

²⁰Kinde ma wodi penji i nindo m’ubino, ewacu kumae, Thelembe mi lembatuca ku cik, ku lembapoka, ma Yehova Mungu mwa ng’olo iri ang’o?

²¹ibilund wacu ni wodi kumae, Naka wa ng’eca pa Farao i Misiri: man Yehova wodhowa woko kud i Misiri ku cing’ ma tek;

²²man Yehova nyutho giranyutha ku musana, ma dit man ma rac, wi Misiri, man wi Farao, wi ot pare ceke de, i wang’wa;

²³man ewo dho wa ku kuca, kara eroiwa, man emi iwa ng’om m’ekwong’o ni kwaruwa.

²⁴Man Yehova ng’olo iwa ya watim cik maeni ceke, walwor Yehova Mungu mwa, mi bedo ber mwa thiri thiri, kara egwokwa wabed kwo, calu ma tin.

²⁵Man ebibedo ni bedopwe iwa, tek waketho cwinywa mi timo lembang’ola maeni ceke i wang’ Yehova Mungu mwa, calu eng’olo iwa.