Read Alur Poi Mi Cik 7 Bible Online

Poi Mi Cik 7 - Alur bible

Poi Mi Cik 7

¹Kinde ma Yehova Mungu peri biroi i ng’om ka m’icidho i ie nimwonye, man ebiriemo thek dupa woko i weng’i, Jahiti, man Jagirgari, man Jaamori, man Jakanani, man Japerizi, man Jahivi, ku Jayebusi, thek abiro ma dit ma tek de ma saguin;

²man kinde ma Yehova Mungu peri bimiogi i weng’i, man ibigoyogi; dong’ inyothgi pet: kud itim lembariba kugi, kadi kud inyuth kisa igi;

³kadok agama de kud wugembru kugi; kud imi nyeri ni wode, kadi nyare de kud igam ni wodi.

⁴Kum ebiloko wodi ku lubo an, kara gitim ni mungu mange: kum kumeno ng’ecwiny pa Yehova biopo i kumi, man ebinyothi pio.

⁵Ento wutim kumeni i kumgi: wurung pemblam migi, man wutur mbegi migi nziki nziki, man wutong’ mungu m’araga migi piny, man wuwang’ ayi m’ang’ika migi ku mac.

⁶Kum in i dhanu ma leng’ ni Yehova Mungu peri: Yehova Mungu peri goyo wii kara ibed dhanu ni piny pare gire, ma sagu kodhidhanu ceke ma gini i wang’ ng’om.

⁷Yehova ketho mer pare i kumwu ngo, kadi egoyo wiwu de ngo, kum wel mu sagu dhanu ceke; kum wu nok ma sagu kodhidhanu ceke:

⁸ento kum Yehova maruwu, man kum eyenyo etim kwong’ m’ekwong’o ni kwaruwu, Yehova wodhowu woko ku cing’ ma tek, man ewaruwu kud i ot mi ng’eca, kud i cing’ Farao m’ubimo mi Misiri.

⁹Ka kumeno ng’ei nia Yehova Mungu peri, en e Mungu, Mungu mandha, ma gwoko lembariba ku mer mi bero ni ju m’umare man ma gwoko lembang’ola pare cil kum dhanum’ utuk rubanga,

¹⁰man ma culo ni ju m’udage i wang’gi, kara unyothgi: ebigalu ngo ni ng’atu m’udage, ebiculo ire i wang’e.

¹¹Ka kumeno igwok lembang’ola, ku cik, ku lembapoka, m’ang’olo iri tin, kara itimgi.

¹²Man ebitimbre, kum wuwinjo ba lembapoka maeni, man wugwokogi wutimogi de, nia Yehova Mungu peri bigwoko lembariba ku mer mi bero kudi m’ekwong’o ni kwaru:

¹³man ebimeri, ebimio mugisa iri de, man ebimedi; ebimio mugisa bende kum kodhi m’i ii ku nying’ piny m’i ng’om peri, en e cam peri ku pigulok peri ma nyasa man mo peri, ku nyai mi lim peri man nyithindh udul rombe peri, i ng’om m’ekwong’o ni kwaru y a emi iri.

¹⁴Mugisa bikwenyi ma sagu kodhidhanu ceke: ng’atu moko mbe ma nico kadi ma dhaku ma mugumba bikwanye i kindwu, kadi i kind lim mu.

¹⁵Man Yehova bikabu tho ceke kud i kumi; man ebiketho tho ma rac moko ngo i wii, m’ing’eyo i Misiri, ento ebikethogi wi ju m’udegi ceke.

¹⁶Man ibinyotho kodhidhanu ceke ma Yehova Mungu peri bimio iri; ngisi kud uneg weng’i i kumgi: kadok mungu migi de kud itim igi; kum maeno bibedo ni uwic iri.

¹⁷Tek ibiwacu i adundeni kumae, Thek maeni dit ma sagu an; acopo yakugi nenedi?

¹⁸kud ilworgi: poi cu kum gin ma Yehova Mungu peri timo kum Farao, man kum Misiri ceke;

¹⁹muloic ma dit ma weng’i neno, ku giranyutha, man musana, ku cing’ ma tek, man bot m’arieya, ma Yehova Mungu peri wodhi woko kudo: Yehova Mungu peri bitimo kumeca kum kodhidhanu ceke ma lworo negi i kumgi.

²⁰Mange ke Yehova Mungu peri bioro pino i kindgi, maram ju m’udong’, m’upondo gigi iri, binyothri ko.

²¹Lworo kud unegi i kumgi; kum Yehova Mungu peri ni i krndi, Mungu ma dwong’ ma jang’oindiri de.

²²E Yehova Mungu peri biriemo thek maeno i weng’i nok nok: kud inyothgi pio, yedi m’i thim umaru nyai i wii.

²³Ento Yehova Mungu peri bimiogi i weng’i, man ebisendogi ku masendi ma dit, maram junyotho kogi.

²⁴Man ebimio ubimo migi i cingi, e ibiketho nying’gi rwinyo ku the polo: ng’atu moko mbe ma bicopo cungo i weng’i, cil m’inyotho kogi.

²⁵Ayi gin m’ang’ika mi mungu migi wuwang’ ku mac: kud iketh cwinyi kum mola ma tar kadi mola ma kwar ma ni i kumgi, kadi kud igame iri, imaru moko i ie i uwic; kum en e ginmajudagu ni Yehova Mungu peri.

²⁶Man kud ikel ginmajudagu i ot peri, man idok ni gin ma jukwong’o calu en: dage ma olo olo; man ikece mandha; kum en e gin ma jukwong’o.