Read Alur Poi Mi Cik 8 Bible Online

Poi Mi Cik 8 - Alur bible

Poi Mi Cik 8

¹Lembang’ola ceke m’ang’olo iri tin wuketh cwinywu i kume kara wutime, kara wubed kwo, man wumedru, e wumond wumwony ng’om ma Yehova kwong’o ni kwaruwu.

²Man ipoi kum yo ceke ma Yehova Mungu peri telo ie wii rundi pier ang’wen maeni i langa, kara ejwigi, emul ko ii, kara eng’ei gin ma ni i adundeni, tek ibigwoko lembang’ola pare, kadi ungo.

³E ejwigi, eyio de ya kec unegi, man ekeki ku mana, m’ing’eyo ngo, kadok kwaru de ging’eyo ngo; kara eketh ing’ei nia dhanu bedo kwo ku cam kende ngo, ento ku gin ceke m’uai dhu Yehova e ma dhanu bedo kudo kwo.

⁴Kendi peri ti ngo i kumi, kadok tiendi de kwot ungo, rundi pier ang’wen maeni.

⁵Man pid i adundeni, nia, calu dhanu ponjo wode, e Yehova Mungu peri ponji kumeca.

⁶Man igwok lembang’ola pa Yehova Mungu peri, kara iwoth i yo pare, man ilwore,

⁷Kum Yehova Mungu peri roi i ng’om ma ber, ng’om mi kulo mi pi, mi pi ma dhenyni man wi kulo, ma mol i poga kud ungulu gudi;

⁸ng’om mi nganu ku nganu ma tung’, mir ulok de ku yend ubolo man ulemo; ng’om mi yend ulam ku kic;

⁹ng’om m’ibicamu cam i ie mbit mbit ungo, gin moko birem iri i ie ngo; ng’om ma kidine nyunyu, man i gudine icopo tong’o mola ma kwar ma va silili.

¹⁰E ibicamu ibiyeng’ de, man ibimio mugisa ni Yehova Mungu peri kum ng’om ma ber m’emio iri.

¹¹Bed ku weng’i kara wii kud uwil kum Yehova Mungu peri, m’igwok ko lembang’ola pare ngo, ku lembapoka pare, man cik pare, m’ang’olo iri tin:

¹²kara, kinde m’icamu man iyeng’, man igomo udi ma ber, ibedo i ie de;

¹³man kinde ma dhok peri kud udul rombe peri gimedri, man mola ma tar peri ku mola ma kwar peri gimedri, man gin ceke m’ibedo ko medre;

¹⁴adundeni lund utingre malu, man wii wil kum Yehova Mungu peri, m’uwodhi woko kud i ng’om Misiri, kud i ot mi ng’eca;

¹⁵m’utelo wii kud i langa ma dit ma ng’oyo ndiri, ma thwol mi mac ku ith ni i ie, ku ng’om mi rieu pi ka ma pi mbe i ie; m’uwodho pi iri kud i cana ma kekre;

¹⁶m’ukeki ku mana i langa, ma kwaru ng’eyo ngo: kara ejwigi, man kara emul ii, kara etimi ber i kajik peri ma cen:

¹⁷man kara kud iwac i adundeni kumae, Tegona man tego mi cinga kelo lonyo maeni ira.

¹⁸Ento ipoi kum Yehova Mungu peri, kum en e en m’emio iri tego m’inwang’u ko lonyo; kara eketh lembariba pare cungi m’eng’olo ni kwaru, calu mi ceng’ ma tin.

¹⁹Man ebibedo, tek wii wil kum Yehova Mungu peri, man ilubo tok mungu mange, man itimo igi, irwo igi de, atuco piwu tin nia wubinyothru andha.

²⁰Calu thek ma Yehova ketho nyothre i weng’wu, e wubinyothru kumeca; kum wuwinjo dwand Yehova Mungu mu ngo.